Gijneix dwg ciengz yiekheiq vunz caeuq saenz ndeu, cienbak bi daeuj, gij gangjmieng gaeuqgeq, aeu cungj yizsi cuengqcaeq hawj vunz gingqlau ndeu, daihdaih doxcienz, iemq haeuj gij vwnzva gihyinh moix boux vunz Mauznanzcuz, bi’ndwen lawhvuenh, gungganq ok le cungj vwnzva noz Mauznanzcuz daegbied youh saenzmaed haenx— Feizdauq. Feizdauq yienh’ok le vunzcoj Mauz- nanzcuz gingqbaiq fanh faed seng- cingz gwnzbiengz, gawq dwg gij guhcingq lizsij Mauznanzcuz hwngfat, caemh dwg gij yizcanj dijbauj cienzdoengj vwnzva Mauznanzcuz. Bi 2006, feizdauq Mauznanzcuz ging- gvaq Gozvuyen baecinj lied haeuj le buek daih’it guekgya gaep feih vuzciz vwnzva yizcanj mingzloeg.

Feizdauq youq hingzsik gwnzde ciq aeu buhrog daugyau, hoeng neiyungz gwnzde miz gij daegdiemj Mauznanzcuz naekgywg. “Feizdauq” dwg gyoepheuh loenghfap daengj hozdung Mauznanzcuz, youq Ciuh- mingz Ciuhcingh riuzhengz hwng- hoengh, hainduj dwg aen yizsi vunzcoj Mauznanzcuz aeu yienj heiq- noz cuengqcaeq fanh faed gwnz- biengz, youq swnjcienz ndawde yungzhab le vwnzyoz gwnzbak、gofwen、citheiq、diuqfoux、yaem- wenq、ndaekroq、gaekdeu doenghgij yenzsu yisuz Mauznanzcuz baenz le cungj hozdung fungsug ndawbiengz neiyungz lai cungj lai yiengh ndeu. Gij gofwen、 diuqfoux、 yaem’wenq、citheiq doenghgij yisuz hingzsik de cangdoz le gij maqmuengh gyaeundei vunz Mauznanzcuz minzcuz daihdaih hwnghoengh、mbaenjgouz bi laeng rumz dingh fwn yinz、gohaeux fungsou haenx.

Feizdauq Mauznanzcuz cungj- loih lai, neiyungz lai cungj lai yiengh, gij biujyienh hingzsik cujyau de miz fwennoz、 fouxnoz、 yaem’wenq noz、gojgaeq noz (cienzgangj gwnzbak)、mauhngeg noz gaekdeu geij daihloih. “Feizdauq” gungh miz cibgeij aen ciengzmienh diuqfoux. “Loenghfap” seiz lij aeu nda “daizcuengq”, gaq daizsaenz, youq gwnz daizsaenz “anlaeuz”, venj siengqsaenz, diuq- foux hozdung cungj yungh ban goengsae ndeu daeuj cujciz guh, itbuen dwg youz cibhaj aen diuqfoux gyoebbaenz, biujyienj miz hwnjlae、ciudoh、gaqgiuz、gipva、soengqva、naenghdienh doenghgij neix. Dang goengsae cawjciengq wenqcingj cungj saenz lawz seiz, couh youz goengsae daep aen mauhngeg cungj saenz haenx diuqfoux. Gij foux neix cujyau neiyungz dwg ranz “loenghfap” haenx maqmuengh doenggvaq mbaenj saenz hozdung ndaej daengz “soengqhawj”, hawj lwglan daihdaih hwngvuengh fatdad.

Feizdauq diuqfoux dungcoz miz yamqbaiq unq、yamqdeih hwnjroengz、fat genbuh、heux fwngz loq baiq、diuq yamq iq caeuq baenqcienq heux- gyongx daengj, gig noix miz gij dungcoz yatdiuq haenq hung haenx. Dungcoz gvilwd dwg youq byaij doengh ndawde hwnjroengz diuqyek, unqmbaeu cwxcaih, heiqfaenh haemq yiemzsuk caemrik. Saenzsai dingzlai daenj buhraez、buhnuem, gwnz buh siuq miz gak cungj yiengh doz singdiuh ronghsien haenx, caiq boiq hwnj vengq yap rongh; saenzmbwk cix daenj buh daenj vaq, mbouj daenj vunj, caeuq gij ndangdaenj mehmbwk bingzciengz doxdoengz.

Gwnz yizsi feizdauq yaek yungh daengz mauhngeg noz gungh 36 aen, faen faenz、foux、sienh、yak seiq loih, moix aen mauhngeg cungj dwg aeu gij faexgenq raez 30 lizmij gvangq 20 lizmij baedauq haenx gaekdeu baenz, gak daiqbiuj boux saenz ndeu, faen miz bouxsai bouxmbwk、bouxsienh bouxyak, yiengh naj gak mbouj doxdoengz, yawj bae lumj naj caen nei.