Cienqda 4 bi gij swnghhoz dayoz gig vaiq couh gvaqbae lo, najdoiq bizyez aeu ra hong guh gienh saeh neix, haujlai vunz bienq ndaej yousim dangqmaz. Huz Sunghyiz caeuq Gauh Sanhsanh hix dwg yienghneix, songde baenqlulu dauqcawq ra hong. Ca mbouj lai yaek gaenh song ndwen seizgan lo, gyoengqde lij caengz ra ndaej faenh hong muenxeiq he, gyoengqde hainduj roxnyinh mizdi simgip youh doeknaiq. Da yawj gij doengzhag miz di gvanhaeh haenx cungj ra ndaej hong lo, naemj daengz swhgeij moix ngoenz nyaengqnyatnyat ndit dak fwn rwed buet bae buet dauq dauqcawq ra gunghcoz caeuq gij cingzgingj gouz vunz, caiqlix hix mbouj raen miz maz gezgoj daeuj, caen dwgrengz raixcaix. Aenvih ra gunghcoz mbouj swnhleih simcingz hix bienq ndaej cuet raeuh, duenh seizgan haenx Huz Sunghyiz mbouj siengj ok dou saek yamq, daengx ngoenz gven dou youq ranz, gwn imq le couh moek gyaeuj ninz, ninz ndiu le hwnqdaeuj gwn, roxnaeuz hwnj- muengx gaijmbwq. Couh lienz mizseiz Gauh Sanhsanh heuh de bae baihrog guhcaemz saek yaep, de hix doeng cimh sae ra gak cungj lijyouz gik okbae. Caeuq gaxgonq doxbeij, couh lumj bienqbaenz lingh boux vunz nei. Doeklaeng Gauh Sanhsanh ra ndaej hong lo, youq aen gunghswh hwnjban.

Gauh Sanhsanh haeuj gunghswh bae hwnjban mbouj geij nanz, de couh heuh Huz Sunghyiz caez haeujbae, baenzneix song boux couh ndaej dox ciuqgoq. Huz Sunghyiz baenzlawz cungj mbouj haengj bae.

Gauh Sanhsanh riu de dwg ma byom naengh gwnz fwnz cang dasang. Huz Sunghyiz dingq le cix yiemzsuk dwk doiq Gauh Sanhsanh naeuz:“Sanhsanh, mbouj dwg gou boux vunz neix dasang. Mwngz wnggai rox, bohmeh raeuz soengq raeuz doegsaw mbouj rox sai bae geijlai cienz, danghnaeuz nyaenxheiq bae guh, mboujdanh ngaiz bouxwnq riu caeuq yawjsiuj, hix mbouj rox daengz seizlawz cij rom ndaej cienz bauqdap bouxlaux ne! Caiq naeuz lo, dangh- naeuz daengzcog raeuz song boux doxaeu le, lij aeu youq ndaw singz cawx ranz youq ni, ciuq yienghneix roengzbae daengz seizlawz cij byaij daengz gij muzbyauh haenx ne?” Gauh Sanhsanh dingq le, ngaemgyaeuj naemjnaemj roxnyinh Huz Sunghyiz gangj ndaej hix miz di dauhleix.

Huz Sunghyiz moix ngoenz cungj soengq Gauh Sanhsanh bae hwnjban, roengzban le youh bae coux de. Baez daengz ngoenzsinggeiz gyoengq- de couh dox gaem fwngz bae guhcaemz. Gij saedceij dauq hix gvaq ndaej vaiqvued raixcaix, baez gvaq couhdwg buenq bi lo.

Duenh seizgan haenx ndaw gunghswh yezvu nyaengq dangqmaz, Gauh Sanhsanh doengxhaemh ciengz- ciengz gyaban daengz bet gouj diemj- cung cij ndaej roengzban. Haidaeuz Huz Sunghyiz lijdwg haemhhaemh genhciz bae ciep Gauh Sanhsanh roengzban, doeklaeng mbouj rox vihmaz lienz ngumhngaeuz hix mbouj raen lo, dienhvah ndeu hix mbouj daj gvaqdaeuj. Danghnaeuz Gauh Sanh- sanh daj gvaqbae, de cungj dwg gip gangj song sam coenz vah couh cuengq lo.

Gauh Sanhsanh ndawsim ngeiz- vaeg raixcaix, de gietdingh laeglemx bae yawjyawj Huz Sunghyiz dauqdaej nyaengq maz. Miz haemh ndeu mbouj gyaban, Gauh Sanhsanh baez roengz- ban, couh cigsoh coh ranzco Huz Sunghyiz byaij bae. Baez daengz bakdou ranzco seiz, Gauh Sanhsanh couh ngaez lo, faj doudiet suj ndaej maenhndwtndwt, mbouj rox vunz gaenq gvaq gizlawz bae lo. Gauh Sanhsanh daj ndaw daeh mbon yaek- seiz okdaeuj yaek hai dou haeujbae, yienzhaeuh mbon soujgih okdaeuj daj dienhvah hawj Huz Sunghyiz. Haujlai nanz cungj mbouj ciep, Gauh Sanh- sanh sim mbouj fug, youh caiq daj gvaqbae. Huz Sunghyiz ciep lo, naeuz de seizneix youq baihrog cingq caeuq geij boux baengzyoux gwn ngaiz, heuh Gauh Sanhsanh youq ranz gag cawj gwn, de mbouj ndaej maranz gwn lo.

Gauh Sanhsanh dingq le, nyaenx mbouj ndaej danq gaemz heiq ndeu bwnda hix nyaeuq hwnjdaeuj, duenh seizgan neix daeuj mbouj ciengzciengz raen naj couhsuenq lo, seizneix gig mbouj yungzheih siengj doxcomz gwn can ngaiz ndeu cungj mbouj ndaej, de Huz Sunghyiz dauqdaej nyaengq maz ne? De baenzlawz bienqbaenz yiengh- neix ne? De bingzseiz mbouj dwg yienghneix a. Gauh Sanhsanh ndaw- sim yied naemj yied mbouj deng, de cawj ndei ngaiz byaek le, rubrab gwn geij gaemz couh okdou bae lo.

Gauh Sanhsanh boux ndeu youq gwnz gai gwq byaij gwq byaij, mbwn ciemhciemh fuemx roengzdaeuj, loh- daeng hix rongh hwnjdaeuj lo, gij ngaeuzingj de rag ndaej yienghhaenx raez, yienghhaenx dandog. Sawqmwh henz rwz cienz daeuj aen sing’yaem gig sug ndeu, Gauh Sanhsanh ngiengx gyaeuj muengh gvaqbae, boux haenx cingq dwg Huz Sunghyiz. Cij raen de cingq caeuq dahsau gyaeundei youh nienznomj ndeu doxgot ndaet dwk daj ndaw diemqlaeuj byaij okdaeuj, songde miz gangj miz riu, yienh ndaej caenmaed dangqmaz.

Gauh Sanhsanh roxnaj dahsau haenx, de heuhguh Fangh Meijnaz, dwg doengzhag dayoz gyoengqde, boh de youq ndaw singz hai aen gunghswh ndeu, ndawranz de gig miz cienz. Fangh Meijnaz bingzciengz gwn ndei daenj lengj, hengzdoengh manzgyangq. Miz baez ndeu, Fangh Meijnaz mbouj rox vihmaz youq ndaw suzse caeuq dahsau he ceng hwnjdaeuj, de dang- ciengz doiq bouxwnq youh dik youh vet, gvaqlaeng lij heuh vunz daeuj moeb dahsau haenx dem. Daj baez- haenx hwnj, bouxwnq couh engq lau Fangh Meijnaz lo, mbouj gamj caeuq de ceng maz, vih neix de engq daekeiq lo.

Seizneix raen Huz Sunghyiz caeuq Fangh Meijnaz yienghneix caenmaed fouzbeij, Gauh Sanhsanh heiq hwnj sam ciengh, de goq mbouj ndaej maz, byaij daengz dangqnaj gyoengqde, naeuz:“Huz Sunghyiz, gvaiq mbouj ndaej mwngz mbouj ndaejhoengq maranz gwn ngaiz, yenzlaiz dwg buenx Fangh siujcej gwn ngaiz ha! Caengz caj Huz Sunghyiz hoizdap, Fangh Meijnaz couh yungh gokda yawj le Gauh Sanhsanh mbat he, gig yawjsiuj dwk riu naeuz:“Huz Sunghyiz, neix mbouj dwg Gauh Sanhsanh ma? Gizsaed de hix mbouj loek, caeuq mwngz hix gig doxboiq bw!” Gangj sat couh ngiengx gyaeuj enj aek aijat byaij deuz, lij daegdaengq bungq Gauh Sanhsanh mbat he. Raen Fangh Meijnaz yaek byaij le, Huz Sunghyiz gip lo, de lienzmuengz doiq Gauh Sanhsanh naeuz:“Sanhsanh, doiq mbouj hwnj, seizneix gaenq mbouj miz seizgan lo, ngoenzcog gou itdingh caeuq mwngz gejnaeuz cingcuj.” Gangj sat couh bae gyaep Fangh Meijnaz.

（caengz sat）