Yienzndokmax dwg cungj yozgi ndawbiengz beixnuengx Bouxcuengh haengjgyaez ndeu, gij yiengh aende seuqset ndei yawj, sing yienz rwenz- red byotbet, dwg duj va ronghlwenq geizheih yozgi Bouxcuengh, ndaej haenh dwg “gaiqsien yaem’wenq” Bouxcuengh. Youq Mbanjcuengh giz- dieg bya heu raemx saw neix, youq doengxhaemh ronghndwen ronghsag rumzliengz cifefe haenx, daegmbauq Bouxcuengh ciengzciengz yungh yienzndokmax ngod ok gij diuqgo yinx vunz maez haenx, gij ngon’wenq “fwenhwnz Mbanjcuengh” diemzvan neix, lwnh ok faenh cingzndiep siengjniemh dahsau ndaw sim, gyoebbaenz aen gingj daegbied youh diemzvan maez vunz ndeu. Bi 2010, “yisuz yienzndokmax Bouxcuengh” ndaej lied haeuj swcigih buek daihsam feih vuzciz vwnzva yizcanj mingzloeg

Yienzndokmax Bouxcuengh daj Ciuhsung couh raen miz, daengz seizneix gaenq miz gyawj cien bi lizsij, dwg “yiengh lix” dijbauj feih vuzciz vwnzva yizcanj. Yienzndokmax youq mbangj Diegcuengh caemh heuhguh “yienzndok”、“yienzlek”、“yienzsek”, eiqsei dwg aen yienz iqet ndei yawj aeu gij ndok max、loz、vaiz daeuj guh haenx, ndigah ndaej heuhguh yienzndokmax. “Yienzlek” caemh dwg gij mingzcoh “Dahyienz”“Daeglek” doiq mbauqsau doxgyaez ndaw gojriuz neix gyoebbaenz. Yienzndokmax yaemsaek byotbet ronghsaw、rwenzred ndei dingq, yaemcaet goksad sepset, miz gij rengz byoengqdaeuq, ndaej haenh dwg yaem faedbiengz yaem’wenq yienghnduj ndawbiengz Bouxcuengh. Doengzseiz, yienzndokmax yienjngod gag miz baenz dauq gungfap、fwngzfap caeuq diuqgo gag cauh ndeu, ciengzciengz yungh guh gag ngod、yozgi doxhab buenxyienj roxnaeuz vih go fwen ndawbiengz、yaem’wenq gangjciengq、Heiqcuengh doengh gijneix buenxyienj. Gij diuqgo doxhab buenxyienj haemq mizmingz de miz 《Mbanjcuengh Cin Caeux》《Angq Yawj Gou Yahahai》《Siengj- muengh Ndaw Sim》《Lingzmax Mbanjcuengh》, gij diuqgo ciengz ngod haenx miz 《Diuqcingq》《Diuq Betbanj》《Diuq Couxhek》《Diuq Betyaem》《Diuq Nyaebcaz》doengh gijneix, youq Denzlinz、Dwzbauj doengh rangh baihsae Guengjsae dieg Bouxcuengh comzyouq caeuq Yinz- nanz、Gveicouh mbangj dieg Boux- cuengh、Bouxyaej comzyouq haenx riuzhengz hwnghoengh.

Aen yienzndokmax yiengh cienzdoengj de, dwg youz doengz- yienz、gyaeujyienz、ganjyienz、sug- yienz、ciengaen、maxyienz、diuzyienz caeuq gungyienz doengh gijneix gyoebbaenz. Doengzyienz nyuenz dwg aeu duenh gwnz ndokdoengz goekga duzmax daeuj guh, seizneix cix aeu haujlai gep ndokdoengz goekga max、loz、vaiz ma gyoepnem guhbaenz, raez 10-12 lizmij、ciggingq 5 lizmij baenzneix, gyaeuj gonq de gop naengngwz、naengbya roxnaeuz naenggoep, gyaeuj laeng de hoengq- gyoeng; gyaeujyienz、ganjyienz dwg aeu baenz mbaenq faexgenq roxnaeuz ganjfaexcuk guhbaenz, gwnz hung laj iq, raez 46-60 lizmij, gwnz gyaeujhung gaekdeu baenz gyaeuj- max; capnaep song aen sug, rag song diuz yienz. Dinghyienz d1、a1, ranghyaem d1-e3, miz song aen lai betdoh. Youq gij yozdui Heiqcuengh baihbaek ndawde, yienzndokmax dwg cungj yozgi guhcawj yienjngod ndeu, doengzseiz lij miz cungj yienz- ndokmax cungyaem doengzyienz haemq hung ndeu daeuj doxbuenx yienjngod, doengzcaez dakdaengh diuqciengq, hawj yaem’wenq Heiq- cuengh engq ndei dingq gamjdoengh vunz.