Daegcenz gaenjgaenj muengzmuengz byaij roen, lij seiz mbouj seiz aeu fwngz lumhlumh aen daeh buhgyazgwz. Ndaw daeh bongzbwdbwd, naekgyumgyum, lumj miz gaiq gim ndeu duengq- dawz aensim de, hawj de youh dungxcieg youh sim- angq.

Ndaw daehbuh Daegcenz caen dwg miz gaiq gim, hoeng mbouj dwg gij gimndaek henjmyanmyan haenx, cix dwg gij ngaenzceij yiengjbyadbyad he. Haxbaenh, 20 faen cung gonq, de youq gokgai gip ndaej aen daehbaengz ndeu. Caen dwg hozhawq raen raemxmboq, seizhaenx de cingq simfouz febfeb byaij roen, sawqmwh, laj din baez daemjndoet, de ngaemgyaeuj baez yawj, raen dwg aen daehbaengz ndeu bomz youq gwnz namh, de laihnaeuz dwg labcab, diem din doq dik.

Hoeng aen daeh baez fan gvaqdaeuj, bongz- buetbuet, dik mbouj deuz. Daegcenz gungj hwet gip hwnjdaeuj, gaem youq ndaw fwngz, roxnyinh naekgywtgywt, de geizheih hai yawj. Mbouj hai mbouj roxnaj, baez hai doeksaet yat. Ndaw daeh coux miz song bog cienzceij. De lumj fwngz lax ceizndat nei doq gvenggvak aen daeh haenx bae, yamq din byaij deuz. Ngamq byaij ndaej geij yamq, de youh ngeuxgyaeuj yawj dauqlaeng, raen baih- laeng mbouj miz saek boux vunz, aen sim de diuqbubbub. Aen daehbaengz lumj boux vunz deng sieng ndeu, bamq youq gizhaenx, cingq raemxda rihnengneng gouz de:“Gouq gou ha, mboujnex gou couh rox deng vunz caij dai bae lo!”

De doxdauq gip aendaeh seiz, fwngz saenz- dwddwd. De itmienh vaiqvaiq byaij gvaqbae, itmienh youq ndawhoz gag nai bonjfaenh, mbouj miz vunz yawj ndaej raen, youh mbouj dwg guhcaeg, gaej vueng gaej lau. Baenq gvaq song diuz gai, aen sim de cij miz di dingh roengzdaeuj. De ra gizdieg mbouj miz vunz he, caegcaeg geq gij cienz ndaw daeh, baez geq, ajbak ngubngub. Va! Miz song fanh maenz bae! De cengdi hemq ok sing, ndawsim lumj miz duzdouq ndeu buet hwnj buet roengz. Caen dwg ok nyouh bungz cij guenq lo. Daegcenz cingq vih ra mbouj ndaej cienz nyapnyuk sibsib, lumjbaenz gwnzmbwn rox nei hawj de soengq cienz daeuj. De aenvih mbouj miz cienz soengq caijlaex hawj ranz dahyoux, daengz 30 bi lo, cungj caengz ndaej aeuyah. Ndawranz doeng cauq sae baz, ngamq couq ndaej 40000 maenz, lij ca 20000 dem. Seizneix baenz lo, fangzhwnz ndaej gim doek.

Aen mbanj Daegcenz youq liz yienhsingz 5 leix roen. De hixnaengz mbouj dapci, byaij roen baema. Cingq dwg seizcin, seiqlengq cungj dwg mbawfaex heuyauyau, dujva hoengzfefe. De ngiengxgyaeuj muenghmuengh gwnzmbwn, gwnzmbwn lamzsum- sum, fwjhau lumj gyoengq yiengzbieg youq gwnz bo diegnywj cwxcaih youzbyaij. Daegcenz da rongh naj hai, yamqdin mbaeumbengmbeng. De lumj gaenq ndaej yawjraen aen najnyaeuq daxmeh mbehai lo, hai lumj duj va’gva nei ronghyagyag. Daxmeh hix mbouj aeu caiq vih gij caijlaex de mbouj gaeuq yousim lo. Yienghneix baez ngeix, Daegcenz doq nyaenx mbouj ndaej eufwen hwnjdaeuj:

“Seizcin roegfek haen,

Va’ngaenz seiqlengq sien,

Ngoenzneix gip ndaej cienz,

Aeuyah diemz lumj rwi.”

Mbouj daengz buenq aen cungdaeuz, Daegcenz byaij daengz ranz lo. Daxmeh de cingq youq gyanghongh saeg buh, raen lwg haeujma, couh cam:“Cenz ha, ciq ndaej cienz caengz?” “Ndaej lo, gaej you lu meh.” Daegcenz angqvauvau han daxmeh. “Ciq ndaej couh baenz, baenzneix gou couh cuengqsim lo”， Aen najsaep daxmeh Daegcenz hix hailangh haujlai, youh cam:“Caeuq byawz ciq ne?” “W…… W……” Daegcenz sawqmwh miz di wzwz azaz, gipdoek yiengh saeh neix baenzlawz lwnh hawj daxmeh nyi, mbouj gangj vahsaed maz, de youh hai mbouj ok bak, Daegcenz daj iq daengz hung youq dangqnaj daxmeh caengz gangj gvaq vahgyaj. De mbajmbwdmbwd naeuz:“Youq…… youq gwnz gai gip ndaej……” “Gijmaz?” Daxmeh naj doq bienq- saek, song da cim Daegcenz. Daegcenz mbouj gamj yawj fouq da daxmeh, ngaemgyaeuj gag damz- byoedbyoed:“Aendaeh doek youq gokgai, mbouj miz vunz aeu, gou couh gip……”

Daxmeh baez nyi daj ndaw batraemx saeg buh yut fwngz okdaeuj, ut seuq fwngz, menhmenh doiq Daegcenz naeuz:“Ranz raeuz cibgeij daih roengz- daeuj, caengz dam aeu doxgaiq bouxwnq gvaq, daengz raeuz hix mbouj ndaej vaih gij gvigawj neix. Dawz dauq hawj vunz, caiq gungz cungj yaek miz gaemz heiq!” Daegcenz daj iq couh dingq vah daxmeh, de ndwn hwnjdaeuj, nyoengx danci couh ok bakdou bae.

Daegcenz caij danci coh gwnz gai bae, roxnyinh ga naekgywdgywd. 20000 maenz cienz youq ndaw daehbuh de couh lumj ndaek rin ndeu, daenz ndaej de aek in. De haetneix bae gwnz gai couhdwg yaek bae ciq cienz, de gaenq daj song aen ranz baengzyoux okdaeuj, faen cienz cungj caengz ciq ndaej, hix gvaiq mbouj ndaej baengzyoux de, gij cienz gyoengqde cungj dawz bae cawx ranz moq lo. De cingq naiqnueknuek byaij youq gwnz gai seiz, dingjlingz gip ndaej 20000 maenz cienz neix. Byawz rox de beg angq baez ndeu, cienz haeuj fwngz caengz ndaej raeuj, youh deng biq ok lo. Daxmeh gangj hix deng, gij cienz bouxwnq mbouj wnggai dam aeu, guh vunz yaek miz liengzsim cijndaej. Ngeix daengz neix, Daegcenz ndang soeng haujlai, de dinga baez haenqrengz, danci riengz rumz mbinfifi doxbae lo.

“Lingling……” Sawqmwh aen soujgih yiengj lo. Daegcenz dingz ci ciep denva, gij sing dahyoux daj ndaw soujgih cienz haeuj rwz de. Daegcenz cam miz maz saeh. Baez cam, Daegcenz doeknaiq lo. Dahyoux lwnh de nyi, naeuz bohmeh de heuh Daegcenz vaiq soengq caijlaex daeuj ranz, caiq mbouj soengq couh ep de haq hawj Daegminj lo. Daegminj ranz fouq, ndawranz ciengx geijcib duz vaiznoh, binaengz souhaeuj daihbaj fanh maenz, hwnq miz 3 caengz louz, nem swzcenh ronghsagsag, lij cawx aen ci’gyauzceh, hai haeuj hai ok vifung dangqmaz.

Hoeng, dahyoux de doiq bohmeh naeuz, de caeuq Daegcenz doxndiep doxgyaez, de cij haq hawj Daegcenz, mbouj haq bouxwnq. Ranz Daegcenz yienznaeuz mbouj lumj ranz Daegminj fouqmiz, hoeng de boux vunz gaenx guh youh lauxsaed, seizneix hix ndaem miz cibgeij moux makgam, cograwz cungj ndaej raen ngoenz ndei. Bohmeh euq mbouj gvaq dahlwg, couh daegdaengq heuh Daegcenz soengq 60000 maenz caijlaex, lij daen vahmieng naeuz, ok mbouj ndaej couh mbouj hawj haq. Dahyoux gangj daengz gijneix cungj yaek daej lo. Daegcenz itseiz sim naekgywdgywd, de mwnh- saengsaeng ndwn youq gizhaenx. 20000 maenz cienz baenzlawz cawqceq? Daxmeh heuh dawz dauq hawj vunz, mbouj miz maz loek, hoeng caijlaex hix coi aeu gaenj raixcaix. Daegcenz mwh gip bienq gvai, deng, sien soengq 20000 maenz ngaenz neix guh caijlaex bae hawj ranz dahyoux, suenq ciq yungh, gvaq geij ngoenz ciq ndaej cienz menh soengq dauq hawj bouxdoekcienz.

Daegcenz bienq dauq coh aenmbanj dahyoux caij bae. Aen mbanj ranz dahyoux liz mbanj ranz Daegcenz miz 6 leix roen. Mbouj geij nanz, Daegcenz couh caij danci daengz henz mbanj dahyoux youq. Mbouj rox ok saeh maz, ndaw mbanj cienz ok sing daejnganga, dungxliengz raixcaix. Daegcenz cam mehlaux henz roen, mehlaux haenx danq gaemz heiq le naeuz:“Caen boihseiz lu, ngoenzlwenz Mehgyauh bae haw deng doek bae 5000 maenz cienz, siengsim gvaqbouh, sim deng saek, gouq mbouj gvaqdaeuj, dai bae lo.” Daegcenz baez dingq, dungxcieg bubbub, de lumhlumh aen daehbuh, fwngz lumj lumh deng feiz ndat nei doq suk doxdauq. 5000 maenz cienz aeu diuz mingh bae, boux doek 20000 maenz cienz mbouj dwg mbwn doemq deih lak ma?

Daegcenz baenq ndang doxdauq, caij danci coh gwnz gai cung bae fofo. Daegcenz siengj vaiqdi soengq 20000 maenz cienz dauq hawj vunz. Baenzlawz guh ne? Bae gizlawz ra bouxdoekcienz ne? Deng, ra mbouj raen bouxdoekcienz, soengq daengz baicuzsoj bae gonq. Youq giz gip ndaej ngaenz nem gunghgau, menhmenh ra.