Bi daengz ndwenbet, gyoengq hagseng ndaw dayoz couh baenz le duzmoed gwnz rek ndat lo. Vihmaz ne? Cingzcik bineix hainduj okdaeuj lo!

Siuj Vangz bi’gvaq ngamqngamq daeuj doeg dayoz, dingqnyi naeuz yaek ok cingzcik, de doeksaet yat, hoeng, de ngeix daengz cihgeij ngoenznaengz gaujsi mbouj yaez gvaq bouxwnq, cingzcik wnggai loq ndei gvaq vunz ba. Baenzneix, de couh mbouj miz maz yousim lo.

Raen de sim mbouj gaenj saekdi, couh miz vunz cam:“Siuj Vangz ha, seizneix bouxboux vih gij cingzcik nyaengq baenzmaz bae, mwngz cix ndaej youq gizneix soeng gvaq moumeh bae?”

Siuj Vangz han naeuz:“Cienzcaiz baez di rom, gaujsi gaenq gvaq lo, cingzcik baez gip couh ndei? Baenzneix, gou lij yousim maz dem?”

Bouxde daengx da dwk gangj mbouj ok vah, caj yaep ndeu cij menhmenh naeuz:“Mwngz mbouj rox? Gij cingzcik mbouj dandan dwg faensoq gaujsi bw, gaujsi cij mbouj gvaq dwg dingz ndeu, lij miz doenghgij ndaejciengj gak cungj doxdax、faenz- cieng ndaej fatbiuj、camgya gij hoz- dung caeuq guh ganbu hagseng hix suenq haeuj ndaw cingzcik bae. Seizneix bouxboux nyaengq bae ra baengzgawq cwngqmingz cihgeij yienghlawz ndaej suenq haeuj ndaw cingzcik bae ne!”

Siuj Vangz dingq le gig geizheih:“Youq hagdangz mbouj dwg engq youqgaenj bae doegsaw hagsib ha, vihmaz bouxboux cungj mbouj yungh- sim hag ndei dungxcaiz sawmaeg bae ceng aeu cingzcik maenhndei, dauq- fanj daj gak giz roen mbeuj luenh gauj aeu cingzcik ne?”

“Mwngz huk ha, hagsib ndei aeu sai geijlai goengfou ha, caiq gangj sai goengfou roengzbae le mbouj itdingh gaujsi gauj ndaej ndei. Hoeng, mwngz aeu di seizgan he bae camgya hozdung faen couh ndaej gya. Yienznaeuz baez ndeu ndaej faen mbouj lai, hoeng, daengx bi bae camgya, ndaej gij cingzcik couh beij gij vunz roengz- rengz doegsaw dij lai bw.”

Siuj Vangz dingq le nyinhnaeuz bouxneix gangj ndaej deng, hix gaenjgaenj gipgip bae ra cwngqmingz gya faen lo.

Hoeng, de mbouj rox ciengqgo diuqfoux, bingzseiz gij doxdax maz hix mbouj camgya gvaq, gij hozdung miz faen gya hix lwnz mbouj daengz de, hix mbouj dwg ganbu hagseng, ra bae ra dauq hix ra mbouj ndaej saek giz ndaej gya faen. Cij miz bien faenz- cieng gaxgonq fatbiuj ndaej gya faen ndeu.

Ngoenz gyau cwngqmingz gya faen, Siuj Vangz raen bouxwnq cungj miz gij cwngqmingz ndaej gya faen baenz bang baenz gyoengq, dan de mbouj miz geij mbaw ceij. Mbouj yungh gangj lo, gij vunz bwh ndaej gya faen lai haengjdingh cingzcik ndei raeuh, lij ndaej ciengjyozginh dem, naeuz mbouj dingh lij ndaej bauj- soengq bae boux lauxsae mizmingz laebdaeb hagsib.

Doeklaeng, gij cingzcik Siuj Vangz itbuen, aeu mbouj ndaej maz ciengjyozginh, de hozgenz raixcaix. Mingzmingz boux doengzhag wnq gaujsi yaez gvaq de lai, cingzcik cix ndaej ndei gvaq de, lij ndaej ciengj- yozginh! Caen dwg “ndaemnaz siengj gwn haeux, mbwn mbouj caeuh hix nanz; miz cienz cawx haeuxsan, cancan ndaej gwn imq.”

Hoeng de cij ndaej ienqmingh ndwi lo, bimoq hix ei vunz yiengh- haenx guh cijndaej lo.