Huz Sunghyiz caeuq Gauh Sanh- sanh dwg ranznden, song ranz cij gek faq ciengz ndeu, gyoengqde daj iq itheij guhcaemz itheij majhung. Daj doeg siujyoz hwnj, Huz Sunghyiz caeuq Gauh Sanhsanh couh youq aen hagdangz doegsaw, itcig daengz dayoz bizyez.

Songde cingzcik itcig gig ndei, youq ndaw ban baizmingz mbouj dwg daih’it couhdwg daihngeih, ndaej daengz lauxsae haenh, caemhcaiq gyoengq doengzhag hozhaenz raixcaix. Cuhcungh seiz gyoengqde caez youq aen ban ndeu, Huz Sunghyiz dang bancangj, Gauh Sanhsanh dwg yozsiz veijyenz, mizmbangj doengzhag couh loenghriu naeuz songde lumj doiq ndeu nei, Gauh Sanhsanh dingq le mbouj daiq angq, Huz Sunghyiz di he hix mbouj hozndat.

Caen hix mbouj dwg gangjgyaj, Huz Sunghyiz daj iq couh doiq Gauh Sanhsanh gig ndei. Seizhaenx lajmbanj lij caengz miz geijlai aen ranzlaeuz, ca mbouj lai cungj dwg ranznamh gaeuq youh vaih. Seizhah ndatfwg vunz lajmbanj ceiq gyaez gwn cukhaeuxyangz soengq lwgmanh. Moix ngoenz cuengqhag maranz le, Huz Sunghyiz ciengzciengz daj faq ciengz baihhaenx heuh naeuz:“Sanhsanh, gwn lwgmanh lwi?” Danghnaeuz Gauh Sanhsanh yaek gwn, couh iet fwngz haeuj gehciengz dek haenx bae, Huz Sunghyiz gig vaiq couh ndenq gvaqdaeuj. Huz Sunghyiz miz maz doxgaiq ndeigwn, itdingh noix mbouj ndaej faenh hawj Gauh Sanhsanh. Mwhde youq ndaw mbanj doeg siujyoz seiz, lajbyonghngoenz baez cuengqhag maranz rubrab gwn song vanj cukhaeuxyangz soengq lwgmanh roengz dungx le, Huz Sunghyiz caeuq Gauh Sanhsanh couh doxiu hwnj bya bae gvej nywj roxnaeuz raemj fwnz. Gauh Sanhsanh vunz iq ndang byom mbouj miz maz rengz, guh maz cungj beij mbouj hwnj Huz Sunghyiz baenz- haenx vaiq youh riengj, Huz Sunghyiz moix baez cungj yiedsim bang de.

Dauqdaej dwg lwgnyez, Huz Sunghyiz caeuq Gauh Sanhsanh hix mbouj laehvaih, gig gyaez guhcaemz. Miz baez ndeu, Huz Sunghyiz caeuq Gauh Sanhsanh youh aemq loz hwnj bya bae gvej nywj lo. Mboengqhaenx cingq seizhah ndatfwgfwg, gyoengqde bin daengz gwnz bya seiz gaenq baegfofo hanh lae rim ndang lo. Naengh roengzdaeuj yietnaiq hanh suk le, yawjyawj seiqhenz gofaex mwncupcup heuswdswd, duzroeg youq gwnz nyefaex ciuz “cici caca”, gak cungj va ndoi heuh mbouj ok mingzcoh hix hai ndaej hoenghfwgfwg. Gij gingjsaek geijlai maez vunz ha! Songde caiq hix goq mbouj ndaej baenzlai lo, Huz Sunghyiz youq ndaw ndoengfaex buet bae buet dauq dauqcawq gyaep roeg, roxnaeuz lumj duzlingz nei riengjret bin hwnj gwnz faex bae mbon rongzroeg. Gauh Sanhsanh couh nyaengq dwk mbaet gak cungj va ndoi, yienzhaeuh san baenz aen gongx gyaeundei ndeu daenj youq gwnz gyaeuj. Gyoengqde couh baenzneix youq ndaw ndoengfaex caenhcingz guh’angq, mbouj roxnyinh seizlawz daengngoenz hoengzdoeng- doeng menhmenh doek bya bae lo.

Gyoengqde fwt geiq ndaej lij caengz gvej nywj hane! Mwh gyoengq- de ngamq gvej ndaej buenq loz nywj seiz mbwn couh fuemx roengzdaeuj lo. Gauh Sanhsanh gip ndaej yaek daej, de doq aeu genbuh uet gij hanh gwnz naj doq naeuz:“Baenzlawz guh cijndei ne? Baenzneix baema lauheiq deng daxboh ndaq bw!” Hoeng, Huz Sunghyiz dingq le cix mbouj vueng mbouj muengz naeuz:“Baenzneix ba, ndaw loz gou gij nywj neix cienzbouh hawj mwngz, yienghneix ndaw loz mwngz couh cang rim bae, gou lingh gvej couh ndaej lo.” Gangj sat de sikhaek ndingq gij nywj ndaw loz gaeq haeuj ndaw loz Gauh Sanhsanh.

De muengz gvej geij gaem nywj cuengq laj daej loz swhgeij, caiq bae euj geij nyefaex coq youq gwnz nywj ndaw loz cengq hwnjdaeuj, yienzhaeuh caiq cuengq geij gaem nywj haenx hwnjbae couh aemq baema lo. Haemhhaenx daxboh Huz Sunghyiz bae gven dou rienghcwz seiz fatyienh duzcwz mbouj rox vihmaz gwn nywj le aen dungx lij mboep ndaej lumj yaek nem saej nei, lij raen liz bakdou rienghcwz mbouj gyae miz bog nyefaex he, couh cam daeglwg dauqdaej dwg maz saeh. Huz Sunghyiz cijndei gangj vahsaed lo. Gyo’ndaej daxboh Huz Sunghyiz vunz swnh hoz unq, rox le mbouj dub Huz Sunghyiz, cijdwg daengq Huz Sunghyiz aeu geiq guh saeh youqgaenj gonq.

Gauh Sanhsanh mbouj rox gwih danci, Huz Sunghyiz sim’in Gauh Sanhsanh, de haethaemh cungj doz Gauh Sanhsanh bae hagdangz, baez doz couhdwg 6 bi. Ciemhciemh, Gauh Sanhsanh ndawsim fubfab mbouj- dingz, miz cungj cingzeiq gig geizheih ndeu gaenq ciemq youq aen sim de lo, hawj de gag roxnyinh baez raen daengz Huz Sunghyiz couh nyaenx mbouj ndaej naj hoengzfefe sim diuqbubbub, caiqlix hix mbouj lumj gaxgonq yienghhaenx mboujlwnh miz maz vah cungj ndaej seizbienh gangj okdaeuj.

Doeg dayoz le, yozsiz beij gauh- cungh soeng le haujlai, Huz Sunghyiz caeuq Gauh Sanhsanh bingzseiz cungj dwg doq doegsaw doq dajgoeng ra gwn, mbouj heuh ndawranz geiq saek faen cienz. Ndaejhoengq seiz, Huz Sunghyiz caeuq Gauh Sanhsanh couh itheij bae guhcaemz, bin bya、youzraemx、cawx doxgaiq, gizgiz ce roengz gij rizdin caeuq gij sing riu vaiqvued gyoengqde.

（caengz sat）