Mboengqneix, denyingj dinj banj Vahcuengh 《Deqcaj》 diemj yawj gaenq daengz 16 fanh lai baez, hawj haujlai bouxyawj miz yaenqsiengq laeg youh gamjdoengh.

Ciuq cam rox, bouh benq neix youz Dunghlanz Yen Minzyijgiz guh okdaeuj, yungh lwgnyez louz mbanj guh daezcaiz ingj, lwnhgangj le gij gojgaeq bouxcujyinzgungh iq Myauz- myauz caeuq bohmeh okrog dajgoeng dauqranz ngamq raennaj youh aeu doxbiek. Bouh benq neix daj cogeiz couzbwh、geizgonq ingj、geizlaeng guh daengz doeklaeng guhsat ginggvaq 3 ndwen lai, bouh benq neix baez boqok, couh ndaej daengz vunz gak hangz ndawbiengz gvangqlangh gvansim, bouh benq neix hix dwg bouh daeuz denyingj dinj banj Vahcuengh Hozciz Si gag ingj okdaeuj, doiq gyagiengz minzcuz doxgiet, coicaenh ndawbiengz doxhuz hwngfat miz gij cozyung gaenxmaenx.

Ciuq cam rox, daj bi 2011 hainduj, aen yienh neix gaenq haiguh “denyingj gohgi Vahcuengh haeuj bak mbanj, fugsaeh lajmbanj moq sevei cujyi” hozdung, haenq doi hong hoizguh caeuq boqcuengq denyingj vah minzcuz vunznoix, daengz bi 2017 riengbi, aen yienh neix gaenq boqcuengq denyingj Vahcuengh 1176 ciengzbaez, bouxyawj daengz 23.5 fanh vunzbaez. Fanhoiz loegguh 42 bouh benqgojgaeq Vahcuengh, 19 bouh benqgohgyau, ndawde bineix ndwen 5 gaenq loegguh sat《Ak Lo, Aen Guek Raeuz》 banj Vahcuengh deihfueng, yaek youq ndwen 7 soengqlaex hawj laeb dangj 97 hopbi.

(Veiz Vanjswh/韦婉姿)