Ngoenzde banhaet, dou geij hujgeiq guhdoih haici bae youzcet swnhlinz gunghyenz Cibfanh Daihsan Sangsih Yen.

Ci haeuj daengz dieggyaiq Sangsih Yen seiz, couh yawjraen gij ndoi gyae’gyawj hunghung sangsang, diuz loh haeuj ndoi bae youh lingq youh ngutnyeuj, yiengh lumj gig yungyiemj, dwglau dangqmaz. Mwhde gou daegbied gingqfug daegnuengx guh haici haenx, dangh haici youq diuz loh neix baez mbouj haeujsim aiq deng fan roengz laj lueg laegngaux bae bw.

“Yawj, gij fwjmok haenx caen gyaeu ha!” Boux doengzdoih ndeu sawqmwh haengjheiq hemq hwnj- daeuj. Daihgya caez yawj ok rogcueng ci bae, mwngz coenz gou coenz doxcanj lwnh gij gingjsaek gyaeundei. Gou hix muengh okbae, va, caen ndeiyawj dahraix! Baenz caengz baenz caengz fwjmok goemq ndaej gij dingj- ndoi sang haenx deihdwtdwt, lumj bwnzdenz nanoem ndeu cw hawj lwg gvaigvet ninz caemrwgrwg nei, geijlai cwxcaih, geijlai vuenyungz. Seizneix gou cij roxnyinh gij hoengheiq miz di mbaeqmbwt, diuz loh yied daeuj yied gaeb lo, hix yied daeuj yied yiemj lo. Neix cijdwg cingqcaen roen haeuj ndoi, haxbaenh gij loh haenx mbouj suenq ndaej maz. Gingjsaek gyaeu lai mbouj rox lau, dou caenh ngonzyawj doengh gij dingjndoi sangsad goengq rangh goengq, gij faex baihnaj nyignaj daeuj fwdfwd youh deuz gvaq laengci bae fwdfwd, sim’angq yangzyangz, diuz loh laj loekci miz geijlai yung- yiemj caeux couh lumz seuqsat lo. Caen dwg:

Biek aenbiengz goenjoj,

Cuenq naj coh diegndoeng,

Guenj mwngz deng naeuz loeng,

Soengyungz gvaq mwhneix.

Sawqmwh aen ci “cw” sing he dingz roengzdaeuj, dou geij boux lij laihnaeuz miz maz saeh, laxlawz gaenq daeuj daengz bakdou swnhlinz gungh- yenz lo. Dou angqfwngfwng roengzci. Aen bakgvaengh gunghyenz gig gyaq- ciq ndeu angj youq dangqnaj, bak- gvaengh baihndaw dwg gij ndoi faex mwncup ndaetndwt goengq sang gvaq goengq. Dou haenqrengz cibcuk ndij diuz roen byaij haeuj ndoeng bae. Haeujbae raen miz haujlai vunz hix lumj dou nei sam boux haj boux guhdoih daeuj yawjyawj goengq ndoi, miz haujlai lij daiq lwg daeuj.

Dou haeujbae daengz aen dieg guhcaemz daih’it dwg “vaengz caemx raemxyw”. Yenzlaiz mwh doekfwn, doengh faex ndaw ndoeng neix supsou le daihliengh raemxfwn, fwn dingz le gij raemx lij yo youq ndaw doenghgo haemq nanz, gij yw ndaw gak cungj doenghgo haenx couh ndaej menh- menh riengz raemx yungzgaij lae okdaeuj, rom baenz aen “vaengz caemx raemxyw”. Ndaw vaengz hamz miz 300 geij cungj yw, ndaej gaj nengz、hoh ndang、rongh naj daengj. Vunz roengz vaengz bae dajcaemx ndokndang soengswt、siu naet cawz naiq, yw ndaej baenzbaez gyaeujdot、ninz mbouj ndaek daengjdaengj. Cienzgangj dahsau lengj Dahlanz ndaw denyingj《Yinghyungz Mbeiguk》 ndang baenz nyan, de roengz aen “vaengz caemx raemxyw” bae daj- caemx le, mbouj geij ngoenz ndang nyan de couh ndei lo, naengnoh engqgya ronghwenj. Gyoengq boux- youz cungj doxcanj roengzbae cimq mbat he, boux miz bingh maqmuengh ndaej ywbingh, boux mbouj miz bingh maqmuengh ndaej re ndang ndei. Dou geij boux daeuj cetcet guhcaemz, mbouj ngeix daengz gizneix lij miz giz dajcaemx, mbouj bwh daiq vaq- gyaengh dajcaemx daeuj, caenh ndaej hozhaenz bouxwnq ndwi lo.

Dou ndij diuz dah iqetet coh lueg byaij haeujbae, hix ndaej yawj daengz haujlai doenghyiengh mizyinx dangq- maz, lumj faexyaemyiengz go nangq go doxgeuj, gij “cingzmuengx” gogaeu geuj faex. Engq yinxdaeuz lijdwg youq gwnz loh haeuj ndoeng bae, miz duz nyaenmak ndeu buet daengz baihnaj dou daeuj, gou ngamq dawz aen soujgih yaek ingjsiengq, de youh mbouj rox ndonj haeuj gyawz bae. Song henz roen faex gak cungj gak yiengh maj deihdwt, gogo sangsadsad, cw mbwn hoemq namh, ngiengxgyaeuj mbouj raen daengngoenz, caenh ndaej raen gofaex ndaet nywjhaz sang, dingzlai mbouj rox coh, hoeng miz di ndaej aeu ma guh yw. Henz rwz seiz- seiz nyi ndaej geij boux doengzdoih haenh mbouj dingz bak caeuq duzbid duzroeg luenh swenj luenh heuh. Gou fwt ngeix: Aiq dwg dou gauxca ndaw ndoeng lo? Roxnaeuz dou daeuj nem ndaw ndoeng dox yungzhab, caeuq ndaw ndoeng caemh angq?

Daengngoenz swng hwnjdaeuj,

Ciuq haeuj lueg haeuj ndoeng,

Ciuq ndaej vaminz hoengz,

Ingj roengz daemz roengz dah.

……

Yu, mbouj rox bouxlawz eu hot fwen ndeidingq. “Byu lu” sing ndeu, duzroeg raizva gig ndeiyawj he mbe fwed daj gwnz gyaeuj gou mbin gvaqbae, yaep he, couh nyi duzde heuh cici cetcet, seizneix lumj raemx doengh bing fanj, song hamq dah gwnz faex baenz bang baenz gyoengq roeg heuhsiegsieg, daengx lueg daengx ndoeng cungj nauhyied hwnjdaeuj! Sing vunz、sing roeg、sing bid、sing raemx lae gyoeb baenz souj go rwenz, hawj vunz roxnyinh geijlai simsoengz angqyangz!

Mbouj rox mbouj nyinh, dou daeuj daengz le Vaengzdahsien, youq gizneix, dou caencingq ndaej yawj daengz gij leixhaih daswyenz. Mwngz yawj daswyenz yungh gij dinfwngz ak caux ok aen “diegsien gwnzbiengz” neix, miz rin miz raemx sangjfwtfwt, miz mbajraiz ciuz mboq. Aen vaengz laeg mbouj raen daej, seiqlengq gij rin geizheih daengjsak, gyoengq mbaj henj mbinyigyig gwnz geij cumh va. Aen vaengz baihgwnz miz nga raemx he lae roengz, baenz diuz raemx- diuqdat iq ndeu, daj giz gyae yawj bae, lumj benq sagaen he riengz rumz doenghfidfid, raemx lae bungz daengz rin sinzsusu, sanq ok baenz gvaengz baenz gvaengz hapraemx. Gizdieg baenzneix gyaeundei bouxlawz mbouj maij? Cienzgangj mwh Dahcaet dah- sien roengz lajbiengz daeuj lij youq neix dajcaemx gvaq. Gou nyaenx mbouj ndaej duet haiz lohdin cimq roengz ndaw raemx bae, hix gamjsouh gamjsouh gij yinxdaeuz “dahsien daj- caemx”.

Dou ngamq byaij gvaq Vaengz- dahsien, cingq yaek laebdaeb byaij haeuj ndoeng bae, gwnzmbwn fwt “bili bala” doek fwn roengzdaeuj, raemxfwn baenz diemj baenz diemj lumj lwgduh, yaep he byoemgyaeuj cungj dumz caez, dou mbouj saek boux raek liengj riengz ndang, cijndei buet haeuj laj ndaek rin laux he bae ndoj. Ndaek rin laux neix lumj yiemhranz, dou dox- caenx ndoj lajde, yawj gij fwn baihrog, boux doengzdoih he ienq mbwn naeuz:“Haxbaenh lij ronghsag, baenzlawz doek fwn lo ne? Doek fwn hix mbouj yawj seizhaeuh.” Gou hix roxnyinh miz di simnyap, sawqmwh ndaej nyi sing dahsau ndeu eufwen naeuz dou:

“Mehmbwn daengq naeuz raeuz,

Aeu gaej you gaej heiq,

Raemxfwn miz cingzeiq,

Gienq beix yiet yaep ndeu.”

Sing fwen gig wenq, gou cimh sing fwen bae ra, raen boux dahsau he guh eu, laxlawz de hix deng fwn “rag” haeuj laj rin neix daeuj yietnaiq. Geij boux doengzdoih dou bouxboux cungj fwt cingsaenz gvaekgvaek hwnjdaeuj, mwngz coenz gou coenz doxcanj caeuq dahsau neix gangjgoj.

Dahsau neix naeuz daxgoeng de mwhgonq youq ndaw ndoeng neix guh bingcaeg, gaenlaeng de cienj gvaq- daeuj bangcoengh gaijfangginh hoenxbaih gij bingcaeg wnq, doiq gaijfang miz goenglauz, de lij ndaej lingx yiengj dem. De lij lix seiz bibi cungj daeuj neix dauq youz dieggaeuq, seizneix mbouj youq lo, lwglan couh lawh de daeuj cunz dieggaeuq. Dou ndawhoz gag aeueiq dahsau neix, de dwg daihlaeng boux yinghyungz, danghnaeuz mbouj miz ciencien fanhfanh boux vunzak lumj daxgoeng de baenzneix mbouj lau dwgrengz mbouj lau daimingh, raeuz bae gyawz miz ngoenzneix daeuj neix cunzcet guhcaemz, bae gyawz miz ngoenzneix saedceij vuenyungz? A, goengq ndoi Cibfanh Daihsan, mwngz mboujdanh dwg gizdieg ndei guhcaemz, engq youqgaenj dwg gizdieg ok yinghyungz ndeu ha!

Fwn doek miz saek song aen cungdaeuz couh dingz lo, baez yawj seizgan yaek daengz banringzgvaq 4 diemj lo. Aenvih roen gyae lai, dou mbouj ndaej mbouj biek dahsau neix okbae lo. Dou doq byaij okdaeuj doq cienqgyaeuj yawj doxdauq, raen gij goengq ndoi sangngaungau deng fwjmok gyuemluemz dwk nanwtnwt, myoxmwdmwd yawj mbouj cingcuj. Gangj coenz vah lauxsaed, dou caen mbouj gamsim couh baenzneix deuz ha. Hoeng haemh lo, caiq mbouj byaij vaiq di couh yaek laep youq neix lo.

Dauqma daengz giz dingzci, dou hwnj ci daengh doxdauq, geij hujgeiq laebdaeb naeuz：“Caj yawj ngoenzlawz ndaejhoengq, dou caiq daeuj cet baez ndeu, daeuj caeux di, daiq vaqgyaengh dajcaemx daeuj dem.”