5 nyied 25 hauh, ciengz doxdax gojgaeq Cuengh Gun song vah daegbied ndeu youq Dunghlanz Yen Vujcon Cungsim Siujyoz gawjhengz, 15 boux senjsouj camgya doxdax haenx daj Vujcon Cin gak aen siujyoz daeuj haenx ciuq faen cuj faenbied yungh “Vahgun”、“Vahcuengh biucinj”、“vah bonjdieg” sam cungj vah neix ma hoedheux aen cawjdaez hailangh yienjgangj.

Doengh laeq senjsouj camgya doxdax haenx giethab bonjfaenh hungmaj ginglig、ranzmbanj funghmau、henz ndang saedlaeh caeuq gij cihsiz hag ndaej, roxnaeuz yungh Vahcuengh mbanjranz guhriu miz yinx haenx, roxnaeuz sing cingz naekcaem dwk gangj gij gojgaeq gangcan senhlez, gaijgwz hailangh gvaqdaeuj mbanjranz bienqvaq funghmau moq, cingzlaeg dwk danq rizloh hungmbwk dangj.

Mbat doxdax yienjgangj song vah neix, fungfouq le hagdangz vwnzva swnghhoz, gikcoi le gij yiedcingz gyoengq hagseng hagsib Cuengh Gun song vah, engq gyalaeg le gyoengq hagseng rox “seizseiz dingq dangj vah、ciengxlwenx riengz dangj byaij”.

(Dangz Danh/唐 聃)