Youq Sihngoz Yangh Liujnanz Gih Liujcouh Si, miz cungj yaem- wenq ciuhgeq gawq miz funggek yisuz daegbied caeuq daegsaek deihfueng naekgwd、youh miz goekdaej vunzlai caeuq gijdij yisuz sangswd ndeu riuzcienz hwng- hoengh— “gyonglaz Gauhsah”, dwg aenvih youq Mbanj Gauhsah Sihngoz Cunh Daiyangzcunh Cin Liujnanz Gih riuzcienz cix ndaej aencoh neix, aeu gij lizsij gyaenanz caeuq hohroq haeujyinh haenqnaemq angqyangz de, baenz le duj va yisuz gyaeundei daegbied ndeu, fatbiu gij homvan yinxvunz haenx, caemhcaiq cugciemh baenz le cungj vwnzva ndawbiengz youq ranghdieg Liujcouh okmingz ndeu. Bi 2007 ndaej lied haeuj swcigih feih vuzciz vwnzva yizcanj mingzloeg.

Gyonglaz Gauhsah youh heuh guh “hoih bet bauj”, nyuenz dwg yaem’wenq caeqcuengq mbaenj saenz rangh dieg Fuzgen Nanzcing Yen. Ciuhcingh satbyai seiz nduj Minzgoz, vunz Fuzgen senj daeuj Mbanj Gauhsah youq, “hoih bet bauj” riengz dwk cienz haeujdaeuj, daengz seizneix gaenq miz 300 lai bi lizsij. Gij yaem’wenq ndaekroq de neiyungz gvangqlangh, hainduj dwg dauqngeix lizsij, caeqcuengq goeng- coj, gvaqlaeng mboujduenh yienj- bienq、dembouj, ciemhciemh hwngfat baenz ndaej biujdap gij eiqsei caeqcuengq、aeuhaq、angqhoh fung- sou、angqhoh ngoenzciet ngoenzangq doenghgij biujyienj hingzsik neix riuzcienz daengz seizneix. Gyong、laz、canj、lingzbungq dwg haj cungj yozgi youqgaenj gyoebbaenz aendoih gyonglaz Gauhsah. Ndaekroq bienq- vaq lai yiengh, hohroq cingcuj, heiqfaenh angqyangz nauhyied. Gyonglaz Gauhsah miz 10 aen banj (diuzbuj), miz itloh cungj swnh、(va)moiz hai mbat ngeih、sam yiengz hai hoengh、seiq geiq ciu caiz、haj fuk haeuj dou、roekroek daih swnh、caet (ndau)ndeiq ciuq rongh、bet sien gvaq haij、gyaeu nanz seiqgyaiq、cib cuk cib ndei. Ciengzmienh yienjroq mbwk raeuh, daiq miz funggek vwnzva fungsug ranghdieg Minjnamz Fuzgen. Aenvih gij haeujyinh de daegbied, gawq sohsed naekcaem, youh biujyienh ok gij angqyangz nauhyied yienhsaed, cienz haeuj Liujcouh le sikhaek caeuq gij hoz- dung fungsug ndawbiengz Liujcouh doxboiq doxdaengh, baenz le cungj yaem’wenq guhlaex hoihmiuh、gvaq cieng gvaq ciet、aeuhaq soengqcangq daengj ciengzdieg noix mbouj ndaej ndeu.

Gyonglaz Gauhsah dangguh yisuz ndawbiengz, de gawq miz gij yinxdaeuz saedceij ndawbiengz ciuh- geq, baijok gij fungsug caeqcuengq daegbied gaxgonq, doengzseiz youh yienhsag dwk daiq miz gij funggek yaem’wenq minzcuz vunznoix dieg- wnq, caemhcaiq yungzhab le gij vwnzva diuzbuj dangdieg. Yienjroq hwnjdaeuj yienznaeuz mbouj miz gij cocat cuengqlangh gyong baihbaek, caemh mbouj miz gij gyong hung laz hung “song Guengj”, hoeng de cix doenggvaq baenz dangz ndaekroq daegbied de, yungh rwsing、eiyiengh、dab’eiq、 cienzcingz、 goemjsaeh daengj soujfap daeuj baijyienj yinx- daeuz saedceij. Hohroq mbaeu naek numq gaenj, camca bae yungh, baenzbaenz ndaej hawj vunz miz cungj gamjsouh yisuz yaem’wenq haenqnaemq lumjbaenz raemxrij yaeng lae, doqgyaeuj gangjsab; youh sawqmwh lumj fanj rumzhwx doek fwnraq, byajmig byajraez ndeu. Biujdap ok gij singqgek nyangqgenq gyoengqde ndiepgyaez saedceij, haengjgyaez bingzlingz, gamj caeuq haemzhoj doiqdingj haenx.