Bi seizgan he gig vaiq gvaqbae, ndwencieng daeuj daengz lo, Feihfeih caeuq Dahfung dajgoeng maranz lo, gij vunz caeuq Aubet itheij bae dajgoeng haenx hix aemq daeh hung daeh iq angqfwngfwng maranz lo, hoeng daengz ngoenz ndaep lij caengz raen aen ngaeuz Aubet. Simjbet dwk dienhvah gvaqbae naeuz dwg gvanhgih lo. Simjbet dungx cieg linlin, gag naemj: De dauqdaej dwg bingh lo roxnaeuz fatseng maz saehcingz lo?

Miz boux vunzmbanj he doiq Simjbet naeuz:“Simjbet ha, mwngz lijdwg caenndang bae yawjyawj ba.” Dingq vunz baenzneix gangj le, ndawsim Simjbet yub hwnj yub roengz, de roxnyinh bouxgvan itdingh miz saehcingz muenz de lo, de aeu caenndang bae Gvangjdungh yawjyawj cijndaej.

Bihaenx ndwencieng, ranz boux- wnq daengx ranz vunz comz youq giz ndeu gwn ngaiz gwn caeuz gangjgangj riuriu nauhyied raixcaix, ranz Simjbet cix mbouj miz saekdi heiq gvaqciet, aen sim Simjbet luenh lumj ndaij nyungq nei.

Gvaq cieng sat lo, Simjbet couh riengz gij vunzmbanj bae Gvangj- dungh ra Aubet. Baengh vunzmbanj yinxloh, Simjbet gig vaiq couh ra daengz aen cangj Aubet, seizneix de cij rox Aubet yaek daengz cieng seiz couh mbouj rox gvaq gizlawz bae lo.

Vunzmbanj cam boux vunzhong ndeu raen mbouj raen gvaq Aubet, de naeuz:“Gyoengqde song gvanbaz ngamq buen deuz mbouj geij nanz, bouxsai haenx caen mingh ndei, aeu ndaej yah oiq youh lengj, yawj daeuj mbouj geij nanz couh seng lwgnyez lo!”

“Maz song gvanbaz, seng lwg- nyez?” Simjbet baez dingq, cadi laemx roengzdaeuj, yawj daeuj de caen cai deng lo, aen sim Aubet siengj seng lwgsai lij caengz mied, gag boux ndeu okdaeuj dajgoeng couh bae ra boux- wnq seng lwgsai. Simjbet cengqgengz mbouj hawj swhgeij laemx roengzbae, de youq ndawsim vet: Mwngz duz cukseng neix.

Youq Gvangjdungh ra mbouj raen Aubet, Simjbet cijndei itloh lae raemxda siengsim maranz.

Gienh saeh neix gig vaiq couh youq ndaw mbanj cienzhai lo. Caezgya cungj gig doengzcingz Simjbet, naeuz Aubet fouz liengzsim, aeu ndaej Simjbet boux mehmbwk yienghneix ndei, song dahlwg youh yienghneix ndeigyaez, de mboujdanh mbouj rox bae insik, dauqfanj guh gij saehcouj neix okdaeuj, caen naemj mbouj doeng de dauqdaej dwg maz vunz.

Siengsim gvaq le, seizgan raez le, Simjbet hix yawj ndaej hai lo, de naemj: De bienqsim vut lwgyah bae caeuq bouxwnq seng lwgsai, gou cix youq ranz vih de siengsim lae raemxda, yienghneix guh di he hix mbouj dij. Daj seizneix hwnj, gou aeu vih swhgeij、vih Feihfeih caeuq Dahfung song dahlwg ndeindei guh roengzbae. Gou mbouj saenq mbouj miz de daengngoenz couh mbouj swng hwnjdaeuj.

Saehcingz gaenq baenz yiengh- neix, Feihfeih caeuq Dahfung hix ciengzciengz nai Simjbet naeuz:“Daxmeh ha, mwngz hix gaej naemj baenzlai lo, dou couh dangq mbouj miz daxboh suenq lo, mwngz aeu ndeindei haeujsim ndangdaej swhgeij.”

Miz vunz haenh Simjbet dwg boux mehmbwk aek gvangq sim langh ndeu. Naed haeux ciengx bak yiengh vunz, bouxwnq gangj gij vah neix mboujlwnh ndei roxnaeuz yak, Simjbet mbouj dawz haeuj rwz, de nyinhnaeuz seiqvunz dinjdet, byaij ndei diuz loh swhgeij, caih bouxwnq baenzlawz gangj cungj ndaej.

Feihfeih caeuq Dahfung daengz nienzgeij doxaeu lo, gyoengqde song cejnuengx vihliux fuengbienh ciuqgoq Simjbet, cungj haq youq ndaw mbanj. Gyoengqde seng lwgnyez le Simjbet couh youq ranz yawj lan, mbouj caiq bae guh hong reih lo, saedceij gvaq ndaej cwxcaih youh vaiqvued.

Ngoenz he, Simjbet cingq umj lan youq ndaw gyanghongh guhcaemz, miz bouxsai geq he yien laeq lwgsai ndaej roek caet bi he gvaqdaeuj. Bouxsai haenx heuh naeuz:“Meh Feihfeih ha, gou dauqma lo.”

Dingq gij sing’yaem baenzneix sug, Simjbet dingh da sijsaeq baez yawj, doeksaet lo, neix mbouj dwg bouxgvan swhgeij ma? Suenq hwnj- daeuj gaenq miz 8 bi mbouj raennaj lo, de bienq ndaej youh geq youh byom youh ndaem, byoemgyaeuj hix yaek hau caez, gwnz naj dem le haujlai diuz riznyaeuq, diuz hwet sohrwd de hix miz di gungj lo. Laeq lwgsai henz ndang de, song fwngz ndaetndaet gaemhdawz genbuh de, naj nyaenq dwk muenghyawj Simj- bet.

Faenbiek 8 bi mbouj miz saekdi siusik, seizneix bouxgvan cix sawq- mwh maranz, lij daiq laeq lwgsai ndeu dem. Simjbet mbouj rox gangj maz cijndei.

Aubet raen Simjbet umj lan mbouj ok sing, cix “bu dung” sing he gvih roengz baihnaj Simjbet bae, raemxda lae mug hix rih dwk naeuz:“Meh Feihfeih ha, mwngz couh yienzliengh gou ba, gou rox gou doiq mbouj hwnj mwngz, hix doiq mbouj hwnj song dahlwg raeuz.”

Simjbet naeuz:“Raeuz song boux youq 8 bi gaxgonq couh mbouj miz maz gvanhaeh lo, mwngz miz maz doiq mbouj hwnj gou.”

Aubet muengh Simjbet uet le uet raemxda, naeuz:“Seizneix gou gaenq bienqbaenz vunz yienghneix, cien loek fanh loek cungj dwg gou loek, cingj mwngz seizneix couh dingq gou daj goek gangj daeuj ba.”

Aubet naeuz bihaenx de bae daengz Gvangjdungh dajgoeng le, mbouj geij nanz couh roxnaj dahsau ndeu. Aubet ciengzciengz caeuq dahsau haenx guhcaemz gangjgoj, lij cawx buhvaq caeuq gak yiengh doxgaiq hawj de dem. Dahsau haenx seizhaenx ngamq ndaej 20 bi, gag boux ndeu youq rog dajgoeng, ndaej daengz Aubet bouxsai neix gvansim caeuq bangcoh, de gamjdoengh raixcaix, mbouj geij nanz song boux couh gwn ninz youq giz ndeu lo.

Aubet itsim siengj seng lwgsai, de couh lwnh aen siengjfap neix hawj dahsau haenx nyi. Mbouj ngeix daengz dahsau haenx caen dapwngq lo. Mbouj geij nanz dahsau haenx couh miz- ndang, Aubet angq raixcaix, de youh lau Simjbet rox, bihaenx yaek daengz cieng seiz, songde couh laeglemx buen deuz.

Doeklaeng bohmeh dahsau haenx mbouj rox daj gizlawz rox gij saeh neix, ra daengz gyoengqde, ndaq Aubet haih dahlwg gyoengqde, bik dahlwg gvet lwg ndaw dungx bae. Aubet youh daiq dahsau buen daengz gizwnq bae ndoj.

Couh baenzneix deuzdeuz ndoj- ndoj gvaq saedceij, doeklaeng dahsau haenx caen seng laeq lwgsai he, seizneix ndwn youq henz Aubet, heuhguh Siujhuj. Haeuxsan gaenq cawj baenz ngaiz, dahsau haenx hix sim gam cingz nyienh riengz Aubet gvaq ndwenngoenz. Bi’gvaq, dahsau haenx ndaej bingh dai bae lo.

Geij bi neix gvaqdaeuj, Aubet itcig lau Simjbet caeuq bohmeh dahsau haenx ra raen, bi he aeu buen geij mbat ranz, lijaeu guh hong ciengx Siujhuj song mehlwg caeuq yw bingh, loengh ndaej de baeg raeuh, lij caengz ndaej 50 bi, hoeng yienghsiengq gaenq bienq geq caez lo.

Feihfeih caeuq Dahfung dingqnyi daxboh maranz, hix gipmuengz gvaq- daeuj yawj, gyoengqde baez raen Aubet doq ndatheiq, Feihfeih naeuz:“Mwngz daj gizlawz daeuj？Dou mbouj roxnaj mwngz!”

Aubet naj cik lumj feiz coemh nei ndwn youq gizhaenx, coenz vah ndeu hix gangj mbouj ok bak. Gvaq yaep ndeu, de aemq hwnj hingzlij, yien dawz Siujhuj, naeuz:“Gizneix ce mbouj ndaej raeuz song bohlwg, byaij ba.”

Siujhuj ngiengx gyaeuj yawj le yawj Aubet, naeuz:“Daxboh, raeuz yaek bae gizlawz?”

Aubet riu le riu, lumhlumh aen gyaeuj iq de naeuz:“Lwg ha, gizlawz coux ndaej raeuz song bohlwg raeuz couh bae gizhaenx.” Siujhuj lumj rox youh mbouj rox nei ngaekngaek gyaeuj.

Da yawj Aubet caeuq Siujhuj yaek yamq din byaij bae lo, Simjbet daj baihlaeng hemq naeuz:“Boh Feihfeih ha, danghnaeuz mwngz nyienh ce roengzdaeuj, gizneix lij dwg ranz mwngz.” Cienq ndang de youh doiq song dahlwg naeuz:“Feihfeih Dahfung ha, couhsuenq de caiq yak hix dwg daxboh sou, sou mbouj wnggai gangj gij vah haenx okdaeuj, seiqvunz bouxlawz cungj mbouj miz loek ne?”

Feihfeih naeuz:“Daxmeh, mwngz mbouj dwg fangzhwnz gangj vahloq ba, dwg de doiq mbouj hwnj raeuz sam mehlwg gonq, mwngz seizneix vihmaz dauqfanj bangcoh de?”

Simjbet naeuz:“Vunz lix youq gwnzbiengz gig mbouj yungzheih, seiqvunz dinjdet, bouxvunz rox swh- geij guh loek le, cijaeu gaijcingq gvaqdaeuj couh baenz lo.

Feihfeih caeuq Dahfung ngaem- gyaeuj naemj le naemj, mbouj ok sing lo.

（sat）