Vunz naeuz baihnamz raemx lai, mbanj dou hix dwg yienghneix, yienznaeuz giz dou mbouj miz dahhung, hoeng mbanjmbanj miz daemz miz rij, lij miz gij suijgu hunghung iqiq dem. Doengxhaemh ronghndwen ciuq roengzdaeuj, ciuq ndaej raemxdaemz raemxrij hausak- sak, gyaeundei raixcaix.

Gyoengq vunzmbanj maij youq ndaw daemz ciengx bit、ciengx hanq caeuq ciengx bya. Mbangj vunz mbouj miz daemz haenx, hozhaenz dangq- maz, naemj bae naemj dauq, bekbek ndaekga, miz banhfap lo, youq ndaw naz cuengq roengz geij duz bitlwg, daengz ngoenz gvaqciet couh mbouj yungh bae gwnz haw cawx bit ma gaj lo.

Gyawj bya baengh bya, gyawj dah baengh raemx. Ngoenznaengz ndaej- hoengq, vunz maij haeuj ndaw suenbyaek bae vet geij duzndwen, euj gyaengh faexsiek ndeu haeuj set bae henz daemz henz rij dinghdingh maeuq saek diemj baj cung nanz, couh mbouj you haemh neix mbouj miz byaek gwn lo. Boux hong nyaengq mbouj ndaejhoengq bae ep bya haenx, siengj gwn bya couh daengz gwnz haw bae cawx, gwnz haw bi daengz byai cungj miz daixbaj bya gai.

Hag lai couh gvai, guh lai couh rox. Gwn bya lai le, vunz hix naemj ok gak cungj fuengfap loengh gwn. Bya iq gangj lai, cien gwn cij baenz；bya hung noh feih van, itbuen cawj dang. Gij neix daihgaiq vunzvunz cungj naemj ndaej daengz. Lij miz boux ngah laeuj haenx, couh maij guh byaseng.

Yienznaeuz mbanj dou dingzlai vunz maij gwn byaseng, hoeng bi daengz byai hix mbouj raen vunz loengh geijlai baez daeuj gwn, cawz le bouxgeq. Aenvih guh byaseng gangj vi hix vi——bya caeuq boiqliuh lengq- lengq miz. Gangj nanz hix nanz——guh byaseng aeu yungh haujlai goengfou cij guh ndaej baenz. Heh bya、yot gangj、faeg liuh cungj gig gyangjgiu, dingzlai bouxcoz cungj yiemz mazfanz couh mbouj maij guh.

Bouxgeq guh byaseng couh caixhangz lo. Gyoengq bouxgeq lajmbanj gaenq mbouj bae naz bae reih ngoenznaengz youq ranz mbwq- mbatmbat, couh ngeix loengh gij gwn. Baez ndaej duzbya haemq hung, couh angqfwngfwng dawz ma guh byaseng, iu geij boux beixnuengx baengzyoux caez daeuj gwn laeuj caimax.

Mbanjran miz vunz ciengx bya, cix mbouj raen miz vunz ciengx sae, yienghneix gyoengqvunz ngoenz- naengz maij gwn bya, mbouj maij gwn sae. Hoeng lij miz di sae gag sanj gag maj youq ndaw daemz ndaw naz, mwh vunz cuengq daemz cuengq naz, daxmeh cungj bae gip ndaej saek gaen baj sae dauqranz nem byaekgyajlaeu caez cawj dang van sisi, hawj gou yied gwn yied siengj gwn.

Duzbaeu duzgungq hix mbouj miz vunz ciengx, ndaw daemz ndaw naz caemh gag sanj miz, mwh hagdangz cuengqgyaj gyoengq lwgnyez dou ciengzseiz bae gaeb daeuj cauj gwn guhcaemz.

Gizsaed youq lajmbanj dou, lij dwg bitgaeq youqgaenj di. Song cungj noh neix mbouj dandan dwg gij byaek ndei, mwh gvaq ciet lij dwg gij doenghyiengh aeu bae caeq coj. Yienghneix, ranz vunz lajmbanj mbouj miz bya mbouj youqgaenj, hoeng itdingh aeu miz bitgaeq. Song yiengh noh vunz youh haemq gyaez gwn nohbit, aiq dwg duzbit ngoenzngoenz ndaej roengz raemx dajcaemx, noh de engq nyangq, caemhcaiq ndaej gwn bya iq、gwn sae、gwn gungq noh engq van.

Mwh ndwensam, bit baenz duz dumq cug le lij aeu dawz bae gwnz ndoi caeq coj. Caj dauq ranz noh bit caeux caep lo, caiq dwk roengz rek cawj couh mbouj ndei gwn, vunz- mbanj couh ronq ndei noh bit, caeuq makcengz makmoizsoemj doxgyaux gwn. “Nohbit makcengz” daegbied ndei gwn, dwg cungj byaekgwn mizmingz mbanjranz he.

Ok baihrog daeuj doegsaw le, gij byaekgwn mbanjranz couh hoj ndaej gwn daengz lo, baezbaez ngeix daengz, cungj gag hozngah gvaq ndwi.