Bouxlaux mbanj dou cungj yienghneix son lwgnyez: Hag ndei sam bi, hag rwix sam haet.

Song coenz vah neix daj seiziq gou couh dingq bouxlaux gangj lai lo. Miz seiz dingq lai le gou lij yienghneix han bouxlaux:“Gaej gangj baenzlai, gangj lailai gou dingq daengz rwz cungj nuk lo.” Hoeng daengz seizneix gou yaek bienqbaenz bouxlaux le, cij rox daeuq gij eiqsei song coenz vah neix, doengzseiz cij rox vah bouxlaux caen dwg deng lai ak lai. Aenvih gou miz geij boux baengzyoux, seizcoz cungj dwg vunzndei, siengj mbouj daengz gvaq le “sam bi”—— Gizsaed dwg gvaq le haujlai bi le, geij boux baengzyoux neix cungj bienq rwix lo.

Raeuz bouxboux cungj miz baengzyoux, hix cungj miz baengzyoux bienqbaenz bouxrwix. Dauhleix neix gou cungj rox, hoeng caen bungz daengz baengzyoux swhgeij bienq rwix le, gou lij dwg siengj mbouj daengz! Lijdwg doeksaet yat!

Geij boux baengzyoux gou bienq rwix haenx, miz saek boux guh vunz soqlaiz mbouj gangj liengzsim geijlai, doeklaeng bienqbaenz vunzrwix guh saehrwix mbouj miz maz geizgvaiq, hoeng miz 3 boux baengzyoux ndei vunz youh sienh youh simndei, daengz laeng hix bienqbaenz vunzrwix, gou loq fangzhwnz cungj loq mbouj daengz 3 boux de rox bienq rwix.

Sien gangj boux daih’it gonq. Seizcou ngoenz he haetromh, gou hwnq congz le, raen aen daengngoenz ngamq okdaeuj haenx hoengz gyoengqgyoengq, ngoenzneix dienheiq ndei lai, gou hix sim sangj raixcaix. Seizneix soujgih gou yiengj lo. Dienhvah dwg goenglaux bouxsug lajmbanj dwk daeuj, goenglaux neix hai bak couh swenj hwnjdaeuj:“Nuengx ha, dai lo dai lo. Nuengxiq gou ra mwngz ciq cienz gvaq lwi? Danghnaeuz mwngz ciq cienz hawj de gvaq, baezneix dainyaengq (dai vunz) lo !”

Vunz ngamq hwnq congz de couh bak haeu gangj dai bae dai dauq, goenglaux neix deng fangz haeuj ndang ha? Nuengxiq de dwg vunz maz? Vihmaz nuengxiq de aeu ra gou ciq cienz?

Nuengxiq de heuhguh Daeg- dungh, gou caeuq Daegdungh dwg baengzyoux ndei. 30 lai bi gaxgonq, gou caeuq de doengz ban doeg siujyoz, gvaqlaeng youh doengzban doeg cunghyoz. Lwgnyez guhdoih bae doegsaw mbouj suenq maz, youqgaenj dwg ranz de doiq ranz gou miz aencingz. Seizhaenx, ranz gou hoj lai, bi lawz daengz sam seiq nyied haeux cungj mbouj doh gwn, daengz mboengq haenx de cungj rag gou bae ranz de gwn haeuxcuk, yienghneix gou cij mbouj deng dungxiek gvaq donq.

Doeklaeng gou gauj ndaej daihhag, gaendwk youh youq baihrog gunghcoz, de gauj mbouj ndaej daihhag, couh dauqma ndaw mbanj guh hongnaz. Yienznaeuz song dou boux youq Namzningz boux youq lajmbanj, doxgek geij bak leix loh gyae, hoeng dou lij lumj seiziq yienghhaenx guh baengzyoux, lij gingciengz baedauq dem. Cib lai bi gonq, gou bang de youq Liujcouh ra ndaej faenh hong guh, de daiq mehyah caeuq daeglwg caez daengz Liujcouh dajgoeng. Gvaq geij bi le, de naeuz mbouj nyienh bang vunz dajgoeng lo, aeu swhgeij guh laujbanj. Youh gvaq geij bi le, gou bae Liujcouh okcai, de hai gyaq ci gyauceh moq daengz cicamh ciep gou, lij daiq gou bae yawj aen ranz moq de ngamq cawx ndaej haenx, aen ranz moq de youh hung youh gvangq, miz 4 aen rug, song aen diengzhaex. Youq ndaw singz cawx ndaej ci youh cawx ndaej ranz, baengzyoux gou fatcaiz lo, gou sim- angq gvaq maz bae. Ndwengonq, de youh dwk dienhvah hawj gou naeuz:“Gou yaek bae Namzningz cawx gyaq ci moq dem, gyaq ci neix Liujcouh mbouj miz gai, aeu 70 lai fanh bw.” Gou dingq le mbouj rox gangj maz ndei, aeu vah mbanj dou daeuj gangj, baengzyoux neix dwg cungj vunz ndaw mingh miz gim, cungj vunz neix siengj mbouj fatcaiz cungj nanz.

Gou ngoenz gvaq ngoenz geq lwgfwngz caj de daeuj Namzningz cawx ci, caj bae caj dauq cungj mbouj raen de daeuj, seizneix dauq ciep ndaej dienhvah daeggo de. Daeggo de naeuz:“Daegdungh famh saeh hung lo, de mbouj rox ndoj bae gizlawz lo, seizneix gungh’anh cingq dauqcawq ra de aeu gaeb de.”

Laxlawz, Daegdungh dwg famh saeh yaeuh vunz aeu cienz. De yaeuh haujlai baengzyoux caeuq vunzmbanj aeu cienz, naeuz aeu roengzbonj bae guh ranzlaeuz, ngoenzlaeng dauq boiz cienz hawj daihgya aeu beij cienzbonj lai haujlai, de gungh ciq gyoengqvunz 200 lai fanh maenz……

（caengz sat）