Geiq ndaej lij iq seizhaenx, Aubet caeuq Simjbet ngamq doxaeu, gyoengq vunzmbanj cungj haenh songde sai baenzmbauq mbwk baenz- sau caen doxboiq.

Aubet ndangdaej hungsang cangqcwt miz rengz, Simjbet bwnda lumj mbawliux, song da hung youh rongh, naj hau gemj maeq, ndeiyawj raixcaix.

Aubet caeuq Simjbet byaij daengz gizlawz cungj dwg mbaq baengh mbaq gen ngaeu gen, miz gangj miz riu. Gyoengqde mboujlwnh byaij daengz gizlawz cungj miz haujlai aen lwgda hozhaenz dwk muenghyawj myaiz lae, cigdaengz vunz byaij gyae le lij ndiengq din yiet hoz muengh.

Seizhaenx ndaw mbanj gij lwg- mbauq caengz aeu yah haenx cungj yienghneix naeuz, danghnaeuz aeu yah couh wng aeu lumj Simjbet yienghhaenx, couhsuenq ninz gwnz caz oen hix ndaek.

Doxaeu bi daihngeih Simjbet couh seng dahlwg ndeu, an coh guh Feihfeih. Aubet baez daih’it dang daxboh, gig angq, de umj hwnj Feihfeih couh naeuz:“Gou miz dahlwg neix saeg buh couh ndaej lo, maqmuengh baezlaeng daxmeh mwngz caiq seng daegnuengx ndeu daeuj caeuq mwngz guhdoih.”

Song bi gvaqbae, Simjbet youh seng dahlwg ndeu, an coh guh Dahfung.

Aubet miz di mbouj angq lo, de nyaeuq naj coh mbwn heuh naeuz:“Mbwn ha, mwngz vihmaz baenzneix doiq gou, dwg mbouj dwg yaek hawj ranz dou cued ciuh bae ha!” Aubet saetmuengh raixcaix, naiqnueknuek ninz youq gwnz congz sam ngoenz sam hwnz mbouj hwnq. Daengz haet daihseiq, Aubet cij raih hwnq congz daeuj bae yawj Simjbet song mehlwg.

Aubet umj hwnj Dahfung couh naeuz:“Dah neix caeuq Feihfeih maj ndaej geijlai doxlumj ha, doiq lwgda youh hung youh ndaem, daengzcog majhung le itdingh dwg dahsau gyaeundei he, cij hojsik mbouj dwg lwgsai.”

Simjbet dingq Aubet baenzneix gangj le cix naeuz:“Seng sai seng mbwk, lwg lawz mbouj dwg lwg ne?” Aubet dingq le menhmenh cuengq Dahfung youq ndaw rungj mehyah, mbouj sing mbouj yiengj byaij okbae lo.

Seng Feihfeih caeuq Dahfung le, Aubet caeuq Simjbet song gvanbaz mbouj lumj gaxgonq doxndei lo. Gij beizheiq Aubet bienq ndaej yied daeuj yied yak, doengh mbouj doengh couh fatheiq, ciengzciengz mbouj miz saeh ra saeh caeuq Simjbet doxceng. Mizseiz ceng sat Aubet lij roxnyinh mbouj gaijheiq, dauqcawq boemz doenghyiengh.

Miz baez ndeu, Aubet caeuq Simjbet youh vih gienh saeh iq he doxceng hwnjdaeuj, Aubet hujdeng- deng buet haeuj ndaw ranzdajcawj bae, raen rek boemz rek, raen vanj boemz vanj. Mbouj yaep ndeu, couh loengh aen ranzdajcawj gaebgeb ndaej luenhfoenfoen.

Simjbet siengsim daej naeuz:“Mwngz baenzneix daengxngoenz cij rox caeuq mehyah doxceng suenq maz bouxsai, luenh fat beizheiq boemz doxgaiq dauq baenzneix miz rengz, danghnaeuz guh hong hix baenzneix buekmingh couh ndei lo.”

Gyoengqde ngamq caux gyaranz, Feihfeih caeuq Dahfung lij iq, Simjbet moix ngoenz cawz le ganqciengx song dahlwg, mbouj ndaej guh maz, ndaw ranz cijmiz Aubet boux ndeu guh hong, souhaeuj noix, ndaw ranz gig gungzhoj. Rek vanj deng dad vaih le couh mbouj miz banhfap cawj gwn lo, youh mbouj miz ngaenz cawx, Simjbet mbouj ndaej mbouj ma ranzdaiq aeu rek vanj daeuj yungh. Doxceng gvi doxceng, saedceij lij aeu gvaq roengzbae, Aubet cijndei okrog bae ra hong guh, guh saek ndwen hong ndaej di cienz le youh maranz.

Ndwenngoenz gvaq ndaej gig vaiq, baez cienqda Feihfeih caeuq Dahfung hix ciemhciemh majhung lo. Aubet caeuq Simjbet lij dwg caeuq gaxgonq doxdoengz ciengzciengz vih neix vih haenx doxceng mbouj dingz.

Miz baez ndeu, gyoengqde doxceng seiz, Feihfeih gaemhdawz fwngz Aubet naeuz:“Daxboh, mwngz gaej caeuq daxmeh doxceng lo, ndei lwi?” Gangj sat, de youh byaij daengz henz ndang Simjbet, naeuz:“Daxmeh, mwngz hix aeu lumj gou nei dingqvah, mboujnex daxboh baez fatheiq hwnjdaeuj couh mbouj ndei lo.” Dahfung lij iq, cij rox daej dwk, gaem dawz gavaq daxmeh mbouj cuengq.

Saedceij yied gvaq yied nanz, Aubet caeuq Simjbet doxceng hix ciemhciemh daj doenghbak bienq- baenz doenghfwngz. Miz baez he doxceng seiz Aubet fak faj naj Simjbet baez he, Simjbet in dwk lwgda yapfeiz bae, gwnz naj sikhaek yienh- ok rizyaenq daeuj. Lumhlumh faj naj manhsatsat neix, Simjbet caen siengj sikhaek lizhai aen ranz siengsim neix.

Simjbet baihgwnz miz sam daeggo, ndaw ranz cijmiz de dah lwgsau dog, bohmeh gyaez de couh lumj naed caw rongh gwnz fwngz nei, soqlaiz caengz ndaq haenq saek coenz, engq mbouj gangj doenghfwngz moeb lo.

Simjbet saedcaih ngeix mbouj daengz caeuq Aubet doxaeu seng song dahlwg neix le bouxgvan couh bienq- baenz yienghneix, de naemj: Nanz- dauh miz laeq lwgsai he beij maz cungj youqgaenj ma?

Gaxgonq youq ranz dang lwgsau, haujlai daegmbauq daeuj gouz swh- geij, swhgeij seizhaenx vihmaz cix bienbien yawj hwnj de bouxvunz neix ne? Simjbet yied naemj simcingz yied nyapnyuk, nyaenx mbouj ndaej danq gaemz heiq raezraez ndeu.

Seng lwgsai gienh saeh neix, gaenq youq ndawsim Aubet ok rag did ngaz, de ciengzciengz naengh youq gokciengz citien danqheiq, ienq swhgeij mingh yak mbouj miz lwgsai.

“Mwngz boux vunz neix baenz ndei, danghnaeuz seiq neix mbouj miz laeq lwgsai he daeuj swnjciuh caen hojsik lai lo. Lwgsau suenq maz, majhung le lij mbouj dwg haq bae ranz vunz guh bawx, beg bang vunz ciengx hung.” Boux gangj fouzsim, boux dingq miz eiq, gij vah haenx couh lumj fag mid raeh camz haeuj ndawsim Aubet bae nei, hawj de yied naemj yied dwgrengz, yied naemj sim yied luenh.

Miz ngoenz ndeu, Aubet lumj- baenz bienq lingh bouxvunz nei, de gaemhdawz fwngz Simjbet riuhehe naeuz:“Meh Feihfeih ha, gou naemj gvaq lo, raeuz caiq seng laeq lwgsai ndeu, ndei lwi?”

Simjbet baez dingq daengz gij vah neix sikhaek couh nyaeuq bwnda lo, naeuz:“Bingzseiz mwngz doiq gou cungj dwg naj saepsatsat, ngoenzneix cix baenzlawz doiq gou riuhehe hwnjdaeuj, gou laihnaeuz daeng- ngoenz daj baihsae hwnjdaeuj lo, ngeix mbouj daengz mwngz dwg miz saeh gouz gou ha. Seng lwgsai gienh saeh neix raeuz song boux mbouj rox doxceng geijlai baez lo, seizneix gou couh lauxsaed lwnh mwngz nyi, gou gaenq seng lwg mbouj ndaej lo, hix mbouj dajsuenq seng lo. Feihfeih caeuq Dahfung suenq mbouj suenq lwg? Nanzdauh mwngz rox baezlaeng itdingh seng lwgsai? Mwngz mbouj geiq ndaej yah Yinzgvei ha?”

Vah naeuz ndaw mbanj yah Yinzgvei, de laebdaeb seng le 3 dahlwg le, Yinzgvei mbouj fugheiq mbouj miz lwgsai, heuh yah de laebdaeb seng. Doeklaeng youh seng le song dahlwg. Yinzgvei vanzlij mbouj fug, de doiq yah de naeuz gwnz haw boux suenqmingh sienseng hawj de cim siengq gvaq, naeuz mingh de miz lwgsai, de youh bik yah de seng lwg. Yah de bienq ndaej youh byom youh nyieg, doeklaeng guh hong nazreih cungj mbouj miz rengz lo, daengx bi caeuq guenqyw doxbuenx, vihneix Yinzgvei ienqhoij dangqmaz.

“Gij saeh neix hawj vunz rox- nyinh geijlai siengsim ha, dailix gou cungj mbouj caiq byaij diuz loh yah Yinzgvei!” Simjbet couh coenz vah ndeu caeuq Aubet naeuz.

Simjbet mbouj miz vah sieng- liengz, Aubet got gyaeuj naenghyung youq gwnznamh mbouj ok sing.

Raemx lae mbouj duenh, saedceij mbouj dingz, Feihfeih caeuq Dahfung doeg cuhcungh bizyez le couh okbae dajgoeng lo, ndaw ranz cij lw Aubet caeuq Simjbet song bouxlaux. Vunz noix vah engq noix, ndaw ranz bienq ndaej caemrikrik, caem ndaej hawj vunz diemheiq yaek mbouj ndaej bae.

Mbouj geij nanz Aubet hix okbae dajgoeng lo, Simjbet boux ndeu youq ranz guh hong, saedceij gvaq ndaej an’onj youh caemrwg, hong naek hong mbaeu Simjbet boux ndeu gag guh, de mbouj gyangz dwgrengz gvaq.

Aubet okbae dajgoeng le, de gig noix dwk dienhvah maranz, hix mbouj raen geiq saek di cienz dauqma. Simjbet mbouj geiq song gvanbaz gaxgonq fatseng gij saehcingz mbouj vaiqvued, de ciengzciengz dwk dienhvah hawj Aubet, daengq de youq rog guh hong aeu haeujsim ancienz, aeu insik ndangdaej swhgeij.

（caengz sat）