Miz ngoenz ndeu, de gienq gou naeuz: “Mwngz yunghsim veh mbaw veh gyaeundei ndeu vei, yienghneix gyoengq lwgnyez aen singhgiuz mwngz couh geiq ndaej gienh saeh neix lo. Danghnaeuz miz ngoenz ndeu, gyoengqde okbae liuh, gijneix doiq gyoengqde gig miz yungh.” De youh naeuz:“Mbangjseiz, yiengh hong ndeu gvaq saek song sam ngoenz cij bae guh, caemh mbouj miz gijmaz, hoeng danghnaeuz dwg ciemz faexceizlingz cungj saeh neix, couh dwglau lai lubw, mbouj ciemz de bae couh baenz nanh lo. Gou bungz gvaq miz aen singhgiuz ndeu, miz boux gik ndeu youq gwnzde, de lamq gvaq sam go faexlwg……”

Dingq Lwgvuengziq naeuz yienghneix, gou couh veh mbaw veh aen singhgiuz neix okdaeuj.

Gou mbouj gyaez lumj boux goengguhdauh nei gyaez gyauq vunz, hoeng faexceizlingz dwglau dangqmaz, vunzlai cungj mbouj rox de dwglau lai, danghnaeuz miz vunz youq aen singhgiuz de loengroen couh yungyiemj lai lobw. Yienghneix, baezneix gou mbouj ndaej mbouj gyauq vunz lo. Gou doiq gyoengq lwg- nyez naeuz:“Gyoengq lwgnyez sou ha, siujsim gofaexceizlingz bw!”

Gyoengq beixnuengx gou caemh mbouj rox yungyiemj henz ndang. Vihliux hawj gyoengqde siujsim yungyiemj henz ndang, gou couh roengzrengz veh mbaw veh neix, baenzlawz dwgrengz goj dijndaej. Gyoengqsou aiq yaek cam gou naeuz: “Vihmaz ndaw bonj saw neix mbouj miz saek mbaw veh lumj mbaw veh faexceizlingz neix veh ndaej ndei, hawj vunz doeksaet, hawj vunz lumz mbouj ndaej ne?” Yaek han coenz vah neix cix ngaih lai lo. Mbawveh wnq gou goj sawq gvaq veh ndei di, hoeng veh mbouj baenz go. Mwh gou veh faexceizlingz, miz cungj simcingz gaenjgip he bik dwk gou veh de ndei bae.

（7）