Mwh cuengqgyaj, gou daengz ranzcoj lajmbanj bae guhcaemz. Seizneix, cingq dwg seiz geiqciet “suengciengj”. Gyoengq vunzhung moix ngoenz caeux ok laep haeuj, gou ne, boux vunz youq ndwi ndeu, roxnyinh mbwqmbatmbat.

Doengxhaemh, gyoengq vunzhung dauqma lo, gou cengqmbei doiq daxlungz naeuz: “Daxlungz, gou daengx bi maeuq youq ndaw singz, mbouj rox gij haeux hausagsag neix daj gizlawz daeuj, ngoenzcog gou siengj caeuq sou bae gvej haeux, ndaej lwi?” Couh lumj gou liuh daengz ityiengh, cingqcaen, daxlungz doeksaetyat naeuz: “Mwngz rox lwi? Ndaw nazraemx miz haujlai non, haeb dawz mwngz, fajga mwngz deng hoengz deng gawh, mwngz siengj cungj gaej siengj lo.” Seizneix, daxgoeng gangjvah lo: “Gou yawj Linzlinz majhung lo, ndaej sawq guh gij hong lajmbanj lo.” Couh yienghneix, ngoenz daih- ngeih, gou gaem fagliemz, riengz gyoengq vunzhung itheij bae ndaw nanz lo.

Gyanghaet hoengheiq sangj dangqmaz, daeng- ngoenz haet cik ndongq aenmbwn, doenghnaz yawj mbouj daengz gyaeuj haenx haeuxriengz naek- numnum, gaenq deq gyoengqvunz daeuj gvej lo. Gou sup gaemz heiq raezrangrang ndeu, ndawhoz ngeix, ngoenzneix itdingh biujyienh ndei cij ndaej, hawj gyoengqde gaej yawjcuij lwgnyez ndaw singz.

Daeuj daengz ndaw naz, gou ndwn youq baihnaj rongh haeux ndeu, vad liemz couh gvej. Byawz rox fajfwngz gou baez saenz, fagliemz cadi gvej dawz din gou. Gou hemq “aeyo” sing ndeu, hwk dwk hanh conh bae, doq naiqnueknuek roengzdaeuj, ndwn youq ndaw naz ngeizngwdngwd, mbouj gamj caiq gvej lo. Daxlungz raen le, byaij daengz dangqnaj gou, yawjyawj gou naeuz:“Linzlinz, mwngz yiengh- neix gaem liemz mbouj deng, yaek hawj bakliemz cuengq bingz, yienghneix, couh mbouj gvej dawz din lo, caemhcaiq gij haeuxnyangh haenx gvej ndaej youh vaiq youh bingz.” Daxlungz doq son doq gvej hawj gou yawj. Geizheih, gohaeux deihyaenyaen haenx youq laj liemz de baenzlawz yienghneix dingqvah, caezcupcup gvej roengzdaeuj.

Yienghneix, gou hag gij yiengh daxlungz son haenx, gutgungj diuzhwet, siujsim riri gvej hwnjdaeuj, hai, mwngz gaej naeuz, lienzdaemh gvej geij gaem hix mbouj bungq deng din. Gou gvej yaek ndaej buenq rongh haeux, couh baeg dwk diemheiq fofo, gen ga hix roxnyinh unqnemnem. Muengh yawj baenz benq haeuxnaz neix, ndawsim siengj doiqdauq lo. Mehbaj yawj okdaeuj lo, couh doiq gou naeuz:“Suenq lo, mwngz gaej gvej lo, mwngz caengz roengz naz gvaq, guh yienghneix couh ndaej lo.” Gou lumj deng vunz yawjcuij nei, couh dawz gij cingsaenz baenzbaenz mbouj lau haenx okdaeuj, dauqcungz cengqrengz, baez gungj hwet, gveq haeux hwnjdaeuj.

Gou cengqgengz gvej diemj cung ndeu le, saedcaih ndang unq liux lo, daxlungz ep dawz gou soengq ma ranz. Gou cungjsuenq mingzbeg lo, gij hong lajmbanj caen mbouj yungzheih guh, hawj gou engq insik gij vuenyungz seizseix lo.

(bouxsij Luz Gyahsinh bouxhoiz Goenggen)