Mboengqneix, ndaw gyausiz haj nienzgaep it ban Nazboh Yen Cwngz- yangh Cin Cungsim Siujyoz sing go haprwenz, sing go gig miz minzcuz fungcingz, neix dwg gyoengq hagseng cingq yienjciengq 《Gwnzmbwn Ndau- ndeiq Buenx Ronghndwen》 go yiengh- nduj Nazboh.

Ciuq cam rox, vih engq ndei swnjcienz caeuq baujhoh go minzcuz conzdungj Nazboh Yen, vwnzgvangj- giz aen yienh neix soucomz bienraiz le cek gocomz minzcuz conzdungj——《Gwnzmbwn Ndaundeiq Buenx Ronghndwen》, cek saw neix cienz- mienh cingjleix caeuq langhbaij le gij go Cuengh、Gun、Myauz、Yauz、Yiz haj aen minzcuz, baugvat go minzcuz conzdungj caeuq gak loih go minzcuz gaijgwz hailangh doeklaeng cauh moq haenx, caemhcaiq boiq gizbuj go gak minzcuz.

Vih caenh’itbouh daezswng gij naengzlig swnjcienz caeuq baujhoh feihvuzciz vwnzva Nazboh Yen, gyalai gij rengzyingjyangj feihvuzciz vwnzva yizcanj Nazboh Yen, vwnzgvangjgiz aen yienh neix lienzhab yienh gyauyuzgiz doengzcaez haiguh “fwen haeuj hagdangz” hozdung, doenggvaq fat cek saw 《Gwnzmbwn Ndaundeiq Buenx Ronghndwen》 gak ngeihcib dauq hawj daengx yienh gak cungh siujyoz mbouj aeu cienz, hailaeb dangzgoq ciengqgo go conzdungj, dawz gij vwnzva ciengqgo bonj dieg “cingj haeuj” dangzgoq ciengqgo cungh siujyoz, caemhcaiq gujli gak cungh siujyoz cingj canghfwen ndawbiengz、bouxswnjcienz feihvuzciz vwnzva yizcanj daengz hagdangz cienzdoh gij vwnzva fwen Bouxcuengh, hawj go minzcuz byaij haeuj ndawhag、cap rag ndawhag, hawj gij vwnzva fwen Bouxcuengh Nazboh maenhndei ndaej daihdaih doxcienz.

(Lingz Ginghlu)