Ndwen 5 ngoenz 6 banhaemh, bouh daeuz heiqgo minzcuz 《Sam Nyied Sam》 youz gij ngaenzgoek yisuz guekgya laebhangh bangcienz, Guengjsae Yenjyi Cizdonz Gofoux Heiqyienh cauhguh yienjok haenx youq Namzningz Heiqciengz yienj baez nduj.

《Sam Nyied Sam》 hopheux sengmingh caeuq gyaez song aen ciengxlwenx cawjdaez neix cauhguh, yungh aen ciet bouxyoux ceiq gaeuqgeq beksingq Bouxcuengh Guengjsae hamjgvaq ndaej baenz buenq aen sigij——hawfwen “sam nyied sam” guh beigingj, lwnhgangj aen gojgaeq hawj vunz gamjdoengh mizgven ndiepgyaez、loqsiengj caeuq swnjcienz vwnzva he. Ndaw heiq miz song diuz seizgan caeuq hoenggan doxbingz, diuz ndeu dwg aen gojgaeq siliengz song boux bouxcoz sai mbwk Bouxcuengh doxgyaez fatseng youq 20 sigij 50 nienzdaih haenx, diuz ndeu dwg aen gojgaeq gyaep loqsiengj boux bouxcoz Bouxcuengh miz loqsiengj ndeu giensouj caeuq swnjcienz fwen Bouxcuengh, youq mwh 20 sigij 80 nienzdaih gaijgwz hailangh ciuzlouz hoengh neix.

Bouxcoz daujyenj mizmingz Guengjsae Fungz Gyah guh cungj- daujyenj, de naeuz, youq gwnz cauhguh yienjok, bouh heiq neix dwkbyoengq laehgvenq, yungh gij rengz cauhguh、yienjok maenhndei Guengjsae bonj dieg. Aen doih bouxfucwz cujyau youz Guengjsae bouxraizbuj mizmingz Luz Beiz raiz- buj; Guengjsae bouxcozgyah mizmingz Liengz Sauvuj guh bienheiq、raiz swz. Linghvaih, aen doih bouxyienj bouh heiq neix cienzbouh daj Guengjsae Gofoux Heiqyienh daeuj, dwg buek canghgo bouxcoz maenhndei bouxyawj gyaezmaij caeuq sugrox he.

Ciuq cam rox, heiqgo minzcuz 《Sam Nyied Sam》 dwg gij heiqmoeg doiok youqgaenj Guengjsae Yenjyi Cizdonz, riengzdwk yienj baez nduj 《Lohsei Gwnz Haij》《Buhbwnroeg》《Cangcang Vaiq Buet》 daengj gij ngaenzgoek yisuz guekgya daizheiq yisuz cauhguh bangcienz hanghmoeg neix.

(Linz Yenvaz)