Hocouh Si Namzyieng Cin dwg aen yieng Bouxcuengh comzyouq ndeu, beixnuengx Bouxcuengh giz- neix daj ciuhgeq gvaqdaeuj couh bibi comz guh cungj guh’angq hozdung “foux meuzfeiz” ndeu dwg gizwnq mbouj raen miz gvaq. Vunz Namz- yieng dawz “foux meuzfeiz” yawj dwg vunzlai daengx yieng hangh hozdung ceiq hoenghhwd ndeu, ndigah caenh cij youq ndwencieng cij banh, daengz seizneix, “meuzfeiz” Boux- cuengh Namzyieng yied foux yied hoenghvuengh. Bi 2010, “foux meuz- feiz Bouxcuengh” ndaej lied haeuj swcigih buek daihsam feihvuzciz vwnzva yizcanj mingzloeg.

“Foux meuzfeiz” dwg youq gwnz goekdaej aen yizsi caeqcuengq ndawbiengz Bouxcuengh hwngfat hwnjdaeuj, dwg diuqfoux ndawbiengz Bouxcuengh yungzhab le vwnzva Cunghyenz caeuq vwnzva vunznduj Lingjnamz youq giz ndeu, funggek yisuz daegbied. Ciuq vunzlaux dang- dieg lwnh naeuz, goengcoj Boux- cuengh Namzyieng ngamq daeuj daengz Namzyieng seiz, dauqcawq dwg ndoi fwz bya ndoq, nyaenyak gig lai, gyoengqde youq gizhaenx haifwz dajndaem, hoeng seizhaenx duznou gig lai cungj daeuj caeg gwn gij haeux gyoengqde, vih gyaep duznou deuz, vunzlai Bouxcuengh Namzyieng couh bae cawx meuz ma ciengx, duzmeuz dawz duznou gyaep deu lo, haeux ndaej fungsou, vunzlai ndaej gwn ndei youq onj, baenzneix couh gingqcungh saenzmeuz, doeklaeng cix banh gij hozdung aeu fiengz- nyangj cug baenz “meuz raez” daeuj gyaep “duznou”、mbaenjgouz vunzlai ndang cangq haeux ndaej fungsou. Dangguh haidaeuz aen hozdung “foux meuzfeiz”, gyoengq vunzlai Boux- cuengh Namzyieng itbuen youq liggaeuq ndwencieng ngoenz cibngux doengxngoenz youq coengceiz goeng- coj banh caeqcuengq yizsi, riengz- laeng diuq foux meuzfeiz, aeu neix geiqniemh goengcoj, muengh saenz- meuz bang vunzlai miedraeg duznou、hen ndei gij doxgaiq fungsou.

“Foux meuzfeiz” Bouxcuengh faen song cungj, cungj ndeu foux meuz raez, cungj ndeu foux vunz- meuz. Foux meuzfeiz itbuen dwg daj ndwencieng coit daengz cibngux gaeujngoenz banh, hoeng gvaq cieng cibngux couh mbouj ndaej foux lo. Foux meuz raez caeuq “foux lungz- feiz” Bouxgun、Yauzcuz lumj di, ndigah “foux meuzfeiz” caemh heuh- guh “foux lungz nding”. Binaengz meuz raez cug ndei le couh gungj- ngaeu dwk baek youq ndaw naz, doengxhaemh le, daengx mbanj lauxnyaeq saimbwk doxcomz youq henz dong feiz, diemj dawz yieng- saenz, baek hwnj gwnz “ndangmeuz” bae, yienzhaeuh boq loxlez roq gyonglaz, gij vunz foux meuz haenx couh yaengx “gyaeujmeuz” caeuq “ndangmeuz” hwnjroengz dwk foux hwnjdaeuj; seizneix baihnaj miz geij boux lwgnyez song fwngz dawz gaem yieng diemj dawz hoenxngauq ndeu, ngeng swix ngauz gvaz dwk yatdiuq, cang guh “duznou” buetbongh; ndaw gyanglaep, baihnaj miz “duznou” gaem yieng nyex “gyaeujmeuz”, baihlaeng miz “meuzfeiz” coemj swix coemj gvaz gyaep “duznou”, dajbeij aen eiqsei “duzmeuz gaeb duznou”, yienj ciudaeuz ndaw bi moq fungsou, ciengzmienh nauhyied hoenghhwd. Vunzlai sien hopngomx aen mbanj foux hop ndeu, ciepdwk caiq bae daengz gwnz haw biujyienj. Foux vunzmeuz couh dwg bouxvunz cang guh “meuz” diuq foux, “vunzmeuz” gyaeuj daep “mauhmeuz”, song gen、song ga cungj hot cug cagfiengz, doengxhaemh le comz youq rog mbanj, diemj dawz yiengsaenz, baenz diuz baenz diuz baek hwnj gwnz mauhfiengz caeuq cagfiengz bae, bouxyienj baiz baenz coijdaengj, youq sing gyonglaz、loxlez buenxha lajde, doq byaij doq foux, baihnaj miz “duznou” buetbongh, baihlaeng miz duz youh duz “meuzfeiz” gaeuz hwet yat coemj. Bae daengz gizdieg haemq gvangq haenx, lij miz biujyienj byaijdoengh “laenz cag” haenx, “meuzfeiz” diuq foux seiz, baihhenz lij miz gij vaiz、max、mou、yiengz、gaeq、bit daengj doenghduz aeu fiengznyangj cug baenz haenx, lajdaej an miz loekci, gwnz ndang caemh baek gij yiengsaenz diemj dawz haenx, riengz aendoih “vunzmeuz” diuq foux, yienj ciudaeuz dajciengx baenz hoengh. Sien youq rog mbanj diuq foux dangq ndeu le, caiq doq foux doq byaij bae daengz gwnz haw biujyienj. Haemh haenx biujyienj sat le, dawz meuzfeiz baek hwnj gwnz dah coemhcag, naeuz dwg “cuengq lungz ma haij”.