Gwnzmbwn miz bouxsien ndeu, coh de heuh guh Yah Vangz. Yah Vangz ciengzciengz vih Bouxcuengh guh saehndei, vih Bouxcuengh cauh faenhaeux、cauh buhvaq, hix vih gyoengqroeg cauh ndoeng. Boux- cuengh raeuz ciuhciuh daihdaih cungj aeueiq Yah Vangz, youq ndawsim ndaejgeiq gij goengdaek de.

Dingqnaeuz gaxgonq Bouxcuengh mbouj rox dajndaem, mbouj miz doxgaiq gwn, hix mbouj miz buhvaq daenj. Yah Vangz youq gwnzmbwn yawjraen lajbiengz Bouxcuengh moix ngoenz cij ndaej gwn gij ragfaex、mbawfaex、ragnywj daeuj demh dungx, caemhcaiq lij ciengz gwn mbouj imq dem, loengh dwk ndangdaej mbouj cangq, hix mbouj ndaej gyaeu. Yah Vangz yawj haeuj ndawda, in youq ndawsim, ndigah de coh lajbiengz vanq naedfaen lai yiengh. Gij naed- faen neix miz faenhaeux、faenhaeux- yangz、faenlwgmaenz caeuq faenlaux- baeg daengjdaengj.

Yah Vangz baez vanq, Boux- cuengh couh doq gip naedfaen daeuj ndaem, ndaem maz ndaej maz, bibi fungsou, gyoengq Bouxcuengh dawz doxgaiq neix daeuj cawj gwn, dauqdaej ndaej gwn imq lo.

Hoeng, Bouxcuengh ndang mbouj miz buh daenj, ga mbouj miz vaq suek, cij dwg aeu mbawfaex、fiengz、naeng doenghduz doenghgij neix daeuj suek ndang. Gij doxgaiq neix baenzlawz suek ndaej raeuj? Seiz- doeng Bouxcuengh bouxboux nit dwk saenzdedded. Yah Vangz doek- caw gyoengqde, couh vanq faenfaiq caeuq faengenmaz roengz lajbiengz daeuj. Bouxcuengh couh bae gip faen daeuj ndaem. Mbouj geij nanz, gyoengqde couh miz maefaiq miz ndaij genmaz daeuj daemj baenz baengz, baenzneix couh miz baengz guh buhvaq lo, daengz seizdoeng hix mbouj rox caiq gengx dai baenzlai vunz lo.

Daj seizhaenx hwnj, Bouxcuengh dauqdaej miz gwn miz daenj, saedceij hainduj gvaq ndaej vuenyungz.

Miz bi ndeu mbwn rengx, bi daengz byai mbouj doek saek naed fwn, gyoengq Bouxcuengh dajndaem le, hoeng gij doenghgohaeux cungj aenvih mbouj miz raemx rwed cungj dai hawq, baezneix Bouxcuengh youh hainduj mbouj miz gijgwn imq dungx lo.

Goengbyaj dwg guenj fwn gwnz- mbwn, cijaeu de swenj “lum lum” caemhcaiq yaengxyaengx fwngz, couh miz fwn doek roengz lajbiengz lo.

Yah Vangz raen Bouxcuengh deng hoj deng nanh, couh bae cam goengbyaj:“Goengbyaj, haujlai nanz mwngz vihmaz mbouj ok saek sing caemhcaiq mbouj ning baez fwngz ne? Baenzneix mbouj doek saek naed fwn, lajbiengz cungj hawq caez, gwnznamh cungj dekhau, Bouxcuengh ndaem gij doenghgo cungj dai hawq, mwngz hawj gyoengqde aeu gwn maz imq dungx? Yienghneix Bouxcuengh lix mbouj roengzbae!”

Goengbyaj naeuz:“Gou seizseiz byajyap, mwhmwh doekfwn, gou baeg lo, ndangdaej haw lai lo, gou aeu yietnaiq yaep ndeu, ndeindei goqhoh ndangdaej gou gonq. Bouxcuengh baenzlawz lix gou camhseiz mbouj ndaej dam lo.”

Yah Vangz baez dingq, simgaenj doq naeuz:“Mwngz yienghneix mbouj ndaej bw! Cij goq swhgeij mbouj goq vunzlai, mwngz guh bouxsien cungj wnggai vih Bouxcuengh guh saehndei, neix dwg cizcwz mwngz.”

Goengbyaj naeuz:“Gou caen baeg dahraix. Mwngz mbouj rox, gou baez byajyap, daengx ndang hanh dumz, moix baez seizneix gou cungj yaek dai baeg bae, gou gaenx guh baenzlai nanz, seizneix hawj gou yietnaiq mbouj ndaej ma?”

Yah Vangz naeuz:“Mbouj ndaej! Gwnzmbwn ngoenz he, lajbiengz bi he. Bouxlawz rox mwngz yaek yietnaiq daengz seizlawz bae! Daengz mwngz geiq ndaej byajyap doekfwn, lauheiq Bouxcuengh cungj dai cingh lo. Danghnaeuz mwngz raen ndat, ok hanh lai, gou vad rumz hawj mwngz, mwngz doq byajyap doekfwn, baenz mbouj baenz? ”

Goengbyaj mbouj ndei eiqsei caiq doi lo, cijndei gangj:“Ndei ba! Gou ei mwngz.”

Gangj sat, goengbyaj couh ndwn ndei, bak de swenj “lum lum”, fwjlaep gwnzmbwn daj gizgyae couh gyoebcomz gvaqdaeuj. Goengbyaj haenqrengz maenj byaj, hanh de couh conh okdaeuj lo, naedhanh hung lumj naed haeuxyangz nei. Mbouj geij mbat, hanh dumz buh dumz vaq, dumz gyaeuj heux hoz, naj nding hoz hoengz. Yawj ndaej ok, goengbyaj byajyap doekfwn caen dwg gwnrengz dahraix.

Yah Vangz haeujsim dwk bang goengbyaj vad rumz, caenhliengh hawj de roxnyinh liengzsisi. Maenj byaj yaep he, goengbyaj yaengx fwngz sang, vadvad geij mbat, couh doek fwn hung lo. Ciengz fwn neix lumj miz vunz dawz rok mbuq raemx, baenz aen liemz nei hawj gwnzmbwn caeuq lajnamh doxlienz.

Yaep he, raemxrij raemxdah lajbiengz rimfoedfoed, Bouxcuengh raen doekfwn vuenheij dangqmaz, daihgya ceng gonq lau laeng buet okdaeuj hawj fwn rwed ndang, gikdoengh ndaej gwnz naj raemxfwn raemxda faen mbouj ok. Caj fwn daengx, Bouxcuengh doq dajndaem, saedceij youh lumj gaxgonq nei mbouj you gwn daenj lo.

Gvaqlaeng gyoengq Bouxcuengh rox fwn hung gouqmingh dwg Yah Vangz bae gouz goengbyaj cij ndaej miz, daihgya cungj docih Yah Vangz, youq ndawsim geiq gij aencingz de.

Yah Vangz mboujdan haeujsim Bouxcuengh gwndaenj, hix hojlienz gyoengq roeg lajbiengz. Seizde gyoengqde baenz bang baenz bang mbin bae mbin dauq, mbouj miz gyawz yietnaiq, hix mbouj miz gyawz cauh rongz. Gyoengqroeg dingzlai dwg douh youq gwnz ranz bouxvunz, gyangngoenz “cici caca” ciuz mbouj dingz bak, gauxca gyoengqvunz gvaq saedceij. Ndigah de couh coh laj- biengz vanq faenfaex. Faenfaex vanq daengz gyawz, gyawz couh miz ndoengfaex. Yienghneix gyoengqroeg couh miz giz cauh rongz an’gya lo. Gyoengqroeg hix itcig mbouj lumz gij aencingz Yah Vangz.

Yah Vangz gwq guh saehndei, sied bae haujlai yienzheiq, ndangdaej de haw lai lo, bibi cungj baenz ciengz bingh ndeu.

Miz coenz vahgeq ndeu naeuz “cibcaet gyaeuj Vangz get, cibbet gyaeuj Vangz dot, cibgouj ninz gwnz- namh, ngeihcib dingh gyanghwnz, ngeih’it Vangz okdoengh”. Dingq- naeuz, moix bi liggaeuq caet nyied cibcaet ngoenzhaenx hwnj, gyaeuj Yah Vangz hainduj in, cibbet gyaeuj de dot, cibgouj de bingh naek ndaej laemx gwnznamh, ngeihcib gyanghwnz de dai bae lo, daengz ngeih’it de oksang. Oksang seiz, gyoengq boux- sien gwnzmbwn daeuj ram de bae daengz gwnz ronghndwen moek.

Yah Vangz hainduj gyaeuj in daengz oksang geij ngoenz neix, lajbiengz ciengzciengz miz fwn, Bouxcuengh heuh gij fwn neix guh Fwnyahvangz. Bouxgeq naeuz Fwnyahvangz dwg gij raemxda gyoengq bouxsien gwnzmbwn daej Yah Vangz.

Yah Vangz oksang ngoenzhaenx, Bouxcuengh siengsim raixcaix, gyoengqroeg hix siengsim dangqmaz. Gyoengqroeg guhdoih mbin hwnj mbwn bae daej Yah Vangz, soengq de oksang. Aenvih siengsim gvaqbouh, gij bwn’gyaeuj caeuq bwn lajdungx duz roeglaej caeuq duz roegbeg yaep he couh bienq hau lo. Ngoenz- neix raeuz lij raen bwn’gyaeuj、bwn lajdungx song duz neix cungj dwg hau, yenzlaiz dwg yienghneix bienqbaenz ne!

Yah Vangz siengj mbouj daengz swhgeij baez dai, gyoengq bouxsien gwnzmbwn、Bouxcuengh caeuq gyoengqroeg lajbiengz baenzneix siengsim, de gamjdoengh dangqmaz, doengzseiz hix sij mbouj ndaej caezgya, ndigah de dai bae geij ngoenz le youh lix dauq moq, laebdaeb vih caezgya cauhfuk.

Seizneix haujlai Diegcuengh cungj daengj miz Miuhyahvangz, moix bi liggaeuq caet nyied cibseiq, Bouxcuengh raeuz cungj dawz yieng dawz noh dawz laeuj bae Miuhyah- vangz baiqcaeq Yah Vangz, geiqniemh de, docih gij aencingz de.

Seizneix, Bouxcuengh raeuz lij miz coenz vahgeq ndeu naeuz “Yah Vangz dai rox dauq, meh raeuz dai bae nauq”. Neix dwg daengq hawj raeuz: Bohmeh lij lix seiz, aeu hauqgingq bohmeh, bohmeh baez dai bae, guh lwg siengj hauqgingq hix mbouj ndaej lo. Aenvih bohmeh raeuz dauqdaej dwg vunzbiengz, mingh cij miz diuz ndeu, mbouj ndaej lumj Yah Vangz, dai le lij rox lix dauq.