Bwzguyauz dwg Yauzcuz nga- nye ndawde nga aeu ndangdaenj ndaej mingzcoh ndeu, gij ndangdaenj de seuqset ronghsag caiqlij daiq miz gij diuh ciuhgeq, louz miz gij yiengh conduj dijbauj、riz lizsij sengdoengh caeuq cungj yisuz caezcienz、lai cungj lai yiengh haenx, dwg aen baengzgawq youqgaenj geiqloeg Bwz- guyauz fungsug fungcingz caeuq lizsij vwnzva ndeu. Bi 2006, “ndangdaenj Yauzcuz” Nanzdanh Yen、Hocouh Si ndaej lied haeuj buek daih’it guek- gya gaep feihvuzciz vwnzva yizcanj mingzloeg.

Bwzguyauz youq gih raeuz Nanzdanh Yen Lijhuz、Bazhih Yauz- cuz Yangh caeuq Gveicouh Liboh Yen Cauzyangz Yauzcuz Yangh sam aen Yauzyangh gapgyaiq neix comz- youq lai, ndaej heuhguh “mbanjranz Bwzguyauz Cungguek”, Lenzhozgoz Gohgyau Vwnzvei Cujciz nyinhdingh de dwg aen minzcuz vwnzva minzcuz louzce ndaej ceiq caezcienz ndeu, naeuz dwg “gaiqbienqrin lix vwnz- mingz vunzloih”.

Gij ndangdaenj Bwzguyauz daegdiemj yienhsag, geubuh boux- mbwk vengqnaj vengqlaeng, ndonj- gyaeuj beq daenj, diuz vaqhau bouxsai bingzciengz saedyungh, yienh’ok gij cienzdoengj caeuq fung- gek ciuhgeq. Gij dozanq gwnz buh de, sai mbwk cungj siuqseuj miz vabakgaeq, yienh’ok Bwzguyauz geijlai gingqcungh duzgaeq. Geubuh bouxsai dwg buh doiqdaeux saek lamzndaem hozlingx daengj, najaek song mbiengj gak siuq gij doz vabakgaeq; diuzvaq aeu baengzhau nyib baenz, dinvaq aeu baengzndaem gopbien; geubuh gvaqciet henzbien cungj aeu baengzlamz gopbien, song mbiengj laenghwet caeuq bien laj raeblaeng cungj siuq miz vabakgaeq caeuq aen doz rizraiz guenghva; gyaeujhoq vaqhau siuq miz haj diuz raizva saek hoengz, riuzcienz naeuz gijneix dwg yaenqfwngz lwed Vuengzyauz caeuq aen cuz wnq hoenxciengq seiz louz roengzdaeuj. Gij buh bouxmbwk faen seizhah seizdoeng song cungj. Buh seizhah dwg najaek caeuq baihlaeng song vengq baengzndaem nyib baenz, cungqgyang louz congh ndonj gyaeuj yungh, vengq baihnaj dwg cingh saek ndaem, vengq baihlaeng aeu cungj dinfwngz nyumx、siuq daengj guh baenz gak cungj dozanq, cik lai gvangq, yiengh lumj aenyaenq nei, riuzcienz naeuz dwg aenyaenq vuengzdaeq fungsoengq hawj Vuengzyauz; song gwnz mbaq aeu vengq baengzndaem 10 lizmij raez ndeu nyibciep, mbouj miz hozlingx mbouj miz genbuh, lajeiq mbouj miz lwggaet, raez daengz gyaeujvunj; mehmbwk baenz bi daenj diuz vunjva baebbap saek ndaem lamz raez daengz gyaeujhoq ndeu, baengzvunj aeu iengfaex veh nyumx baenz sam hongx doxanq, ndaem lamz doxgek, dinvunj aeu maesei henj nding siuq, bienvunj aeu vengq baengzsei saek nding gopbien; gyanghwet najvunj aeu vengq baengz ndaem ndeu venj dwk dangj gij damae gyaeujnyib diuzvunj, caemh ndaej dakdaengh gyaeundei, daenj vunjbaebbap byaij roen hwnjdaeuj bibi buengqbuengq, gawq lumj dujva riengz rumz ci bibuengq yegyeg, youh lumj duz mbajva ndeu diuq foux yekyek, ndei yawj raixcaix. Mehmbwk Bwzguyauz dinfwngz nyib buh maenh’ak, guh dauq buhvunj ndeu aeu baenz bi seizgan, swhgeij daemjrok、dozmae、labnyumx、veh dozanq、siuqseuj, gonqlaeng baenz samcib lai yiengh dangzhong，moix dauq buhvunj cungj dwg gyoengq mehmbwk sai rengz sai simlwed guhbaenz, gij dinfwngz guh ndangdaenj gyoengqde sangdaemq caemh gietdingh le gij diegvih mehmbwk youq ndawbiengz Bwz- guyauz haenx.

Bwzguyauz dwg aen minzcuz daj yiengh gvaq saedceij biengz co’nduj cigciep yat yamq haeuj yiengh saed- ceij biengz ciuhneix ndeu, seizneix lij louzce miz gij saenqsik vwnzva gwnzbiengz daj biengz bouxmeh bienq gvaq biengz bouxboh haenx, gij saenzgeiz de hawj vunz caenh siengj caenda bae yawjyawj、bae naemj- ngeix……