Sam nyied dienheiq raeujrub, va moq angj hai, song hamq Nanzhuz gingjsaek gyaeu. Ndwen 3 ngoenz 23 lajbyonghngoenz, Namzningz ndit raeuj mbwn seuq, gou angqyangz daeuj daengz henz Nanzhuz. Mbouj- gvaq, baezneix gou mbouj dwg bae gizde youzlangh guhcaemz, dauqdwg bae henzde dieg Gvangjsih Minzcuz Bause guh gienh saeh gig miz najda ndeu: Caeuq bause ciemdingh guh canghraiz Sawcuengh.

Mwh gou daj fajfwngz bouxdaeuz bause Banh Cauzyangz ciep daengz bonj cingq “Canghraiz Sawcuengh Ciemdingh”, siengj daengz gou daj bouxsijgauj gig bingzciengz bienq- baenz ngoenzneix boux canghraiz ciemdingh, ndawsim miz haujlai vah aeu gangj……

Gou lij geiq ndaej, gou yamq haeuj Gvangjsih Sawcuengh Yozyau ngoenz nduj, faenh bauqceij 《Bauq Sawcuengh》 (doeklaeng gaij coh baenz 《Gvangjsih Minzcuz Bau》) nem youq henz ciengz duzsuhgvanj, yinx gou yawj haeuj sim. Boux doengzyieng daeuj gizde doeg gonq youq henz ndang gou naeuz, faenh bauqceij neix dwg bauqceij Sawcuengh, gij cih gyoepyaem dwg Sawcuengh! Yienz- naeuz ciyen daih’it gou sij conhyez Sawcuengh, hoeng seizde gou lij caengz rox Sawcuengh baenzlawz sij ne! Siengj mbouj daengz faenh bauqceij neix hawj gou baez nduj raen daengz Sawcuengh, ngoenzneix ngeix hwnjdaeuj caen dwg yienzfaenh ha!

Doeklaeng, moix aen singhgiz ban dou cungj miz faenh bauqceij Sawcuengh neix soengq daengz. Hai- daeuz, caezgya caengz hag Sawcuengh sug, yawj mbaw bauqceij neix lij dwgrengz, mbouj miz geijlai vunz bae yawj. Deq rox gyoepdoeg Sawcuengh le, daengx ban doengzhag doxceng dawz faenh bauqceij neix bae yawj- ngonz. Daengx ban geijcib vunz ngamq miz faenh bauqceij Sawcuengh dog haengjdingh mbouj gaeuq yawj, doeklaeng banhcangj dou bae caeuq bouxsoufat cam aeu le, ban dou cij ndaej dem lai geij faenh.

Daihngeih haggeiz nduj, aen siusik ndeu youq ndaw ban cienzriuz: Banh Gyanghcungh doengzhag bien faenzcieng 《Diuzdah Henz Mbanj Gou》 yungh Sawcuengh sij ndaej daengh youq gwnz 《Bauq Sawcuengh》! Hag Sawcuengh mbouj rim bi couh fatbiuj faenzcieng caemhcaiq miz ngaenz sijgauj roengz daeh, maenh’ak dahraix. Dou hix vih de ndaengmoj! Lauxsae dawz gienh saeh neix daeuj son dou aeu haeujsim hag Saw- cuengh, de lij maqmuengh gyoengq- dou daengzcog miz vunz ndaej guh boux canghraiz Sawcuengh. Mbouj- gvaq gou roxnyinh guh canghraiz Sawcuengh liz gou gyae raeuh, siengj hix mbouj gamj siengj!

Bizyez gunghcoz lai bi, mbouj- lwnh gij hong ndaw fwngz baenzlawz nyaengq, baez ndaejhoengq gou cungj bae bangunghsiz fan yawj bauqceij Sawcuengh caeuq cazci 《Sam Nyied Sam》, daj ndawde gou rox haujlai doxgaiq, daegbied dwg ndaej caep maenh gij giekdaej Sawcuengh.

Geiq ndaej miz bi he gou caeuq geij boux doengzsaeh roengz aen mbanj liz singz gig gyae he bae haeujfaenh “se’gyau” gunghcozdui, seizde aen mbanj haenx lij “sam mbouj doeng” (den、 roen、 raemx cungj mbouj doeng). Aenvih youq mbanjlueg mbouj miz maz daeuj gaijmbwq, couh baebae dauqdauq yawjngonz gij bauqceij cazci Sawcuengh. Baez miz vunzdoih dauq ndaw singz, gou cungj daengq de daiq gij bauqceij cazci Sawcuengh dauq hawj gou.

Miz baez he, daegmbauq iq lij doeg cuhcungh daeuj dieg ninzgwn dou caeuq gou guhcaemz, de yawjraen gij bauqceij Sawcuengh gig geizheih, cam gij cih neix dwg maz. Gou gangj gij cih neix dwg Sawcuengh, dwg gij cih Bouxcuengh raeuz, lij riengz bak doeg okdaeuj. Siengj mbouj daengz daegmbauq doiq Sawcuengh gig miz yinx, saeuq gou son de Sawcuengh. Daj mwhde hwnj, baez ndaejhoengq gou couh son de，de gig coengmingz, mbouj geij nanz de couh rox gag gyoepdoeg lo. Siengj mbouj daengz bi de cuhcungh bizyez, baengh hag gvaq Sawcuengh, de bae bauqgauj Gvangj- sih Sawcuengh Yozyau, doeklaeng caen ndaej bae doeg. Baenznanz gvaqbae, seizneix de gaenq youq aen danhvei guh bouxdaeuz, hoeng lij ciengzseiz daeuj bangunghsiz gou dawz bauq Sawcuengh bae yawj.

Bi 1997, 《Gvangjsih Minzcuz Bau》 daengh ok aen hozdung cwngh- vwnz“Gij Cingz Sawcuengh Gou”. Bide gou youq Minzcuz Cunghyoz son saw. Gou hopheux cawjdaez aeu Sawcuengh sij bien faenzcieng he geiq hawj bause, lumj gou liuhsiengj nei, gou cij ndaej ciengjgujli, bause geiq soengq bonj 《Sawloih Cuengh Gun》 guh huq ciengj hawj gou. Couhdwg faenh ciengj iqeded neix, hawj gou youq diuz roen aeu Sawcuengh sij faenzcieng yawjraen maqmuengh, miz saenqsim laebdaeb byaij baenaj. Doeklaeng, Gvangjsih Minzcuz Bause youh laebdaeb banh gij doxdax sij faenzcieng gvendaengz “Gou Caeuq Minzcuz Bau”、 gij doxdax Sawgun hoiz Sawcuengh doenghgij hozdung, gou hix gaenx bae camgya. Yienz- naeuz mbouj miz baezlawz ndaej geij ciengj daengjgaep, hoeng gou daj gij hozdung ndawde rox gij suijbingz swhgeij caemhcaiq youq gyawz lij aeu roengzrengz. Gou roxnyinh: Yaek guh daengz sugsed aeu Sawcuengh daeuj sij faenzcieng roxnaeuz Cuengh Gun doxhoiz ndaej ndei, lij aeu hag haujlai doxgaiq.

Youq neix gou aeu dwen boux- vunz ndeu, danghnaeuz mbouj miz de, aiq gou couh mbouj miz ngoenzneix lo! De dwg Cinz Gencinh, mwhde de guh minzyijban cujyin. Gaxgonq de youq aen gyauyuzcuj lajmbanj guh hong, aenvih hag gvaq Sawcuengh caemh- caiq rox Sawcuengh haujlai, baihgwnz diuh de daeuj minzyijban. Gou ngamq gunghcoz ndaej geij bi, de ciengzseiz daezsingj gou: Bouxcoz gaej vut conhyez, ngoenznaengz aeu lai yawj di sawbauq conhyez; vanzlij son gou baenzlawz doeg cinj “on” caeuq “oen”、“om” caeuq “oem” 、“ong” caeuq “oeng” doenghgij yinhmeh nanz faen hai. De baez ndaejhoengq couh ngaem daiz aeu Sawcuengh sij fwen roxnaeuz hoiz gij sawndip geq gaxgonq soucomz, ban bi’ndwen laux lij baenzneix buekmingh. Gou dwg buek daih’it daihhagseng hag aen conhyez neix, dauqfanj guh mbouj ok maz, saetnaj lai lo.

Doeklaeng, gou dawz de guh yienghndei, dingh aen muzbyauh ndeu: Itdingh aeu Sawcuengh sij ok geij bien faenzcieng ndei. Ngoenz- naengz gou yawj sawbauq Sawcuengh baez bungz daengz giz mbouj rox couh cam de. Gou menhmenh ra ok aen gvilwd yaemdiuh Vahcuengh biucinj caeuq vahdoj dieg gou, caemhcaiq rox gij yijfaz daegdiemj Vahcuengh, gou liz aen muzbyauh dingh mbouj gyae lo.

Caen dwg “goengfou mbouj yaeuh bouxhaeujsim”, 《Daegnez》 gou sai ndwen lai daeuj sij ndaej youq 《Sam Nyied Sam》 bi 2004 geiz daihsam daengh okdaeuj, raen daengz bien faenzcieng sij ndaej yaenq youq gwnz ceij cazci, ndawsim gikdoengh dangqmaz. Gvaqlaeng bouxbien Cinz Siengzcouh lij daegdaengq dwk denva daeuj caeuq gou doxlwnh faenzcieng neix, gujli gou mbeilaux riengz diuz roen neix byaij roengzbae. Daj mwhde hwnj, gou sij faenzcieng Sawcuengh yied daeuj yied mizyinx, danghnaeuz gek ndaej cib ngoenz bet ngoenz mbouj ndaej sij geij coenz sim cungj mbouj onj.

Daj bide caeuq doeklaeng geij bi, Gvangjsih Minzcuz Bause caeuq Sam Nyied Sam Cazcise habbanh aen “Beizyinbanh Aeu Sawcuengh Sij Faenzcieng”, youq ndawde gou haeuj- sim hwnjdangz, caeuq gyoengq doengzhag gyauhliuz gij ginghyen sij faenzcieng. Doenggvaq geij geiz hagsib, gou lumj duz bya’ndoek youz daengz daihhaij nei yawj ndaej engq gyae、youz ndaej engq gvangq、hag ndaej engq lai.

Baez beizyinbanh he yaek sat, gyoengq bouxbien daiq gyoengqdou naenghci bae youz, ngamjhab seizde Gvangjsih Minzcuz Bause bouxbien Veiz Yennaz naengh youq henz gou. Dou song boux couh hopheux baenz- lawz sij ndei faenzcieng mwngz coenz gou coenz gangj hwnjdaeuj. De haenh bien 《Ra Vuenyungz》 gou sij haemq ndei, lij son gou sij faenzcieng aeu haeujsim maz, lij naeuz gij gamjcingz gou ceiq hab sij sanjvwnz, daengq gou lai sij.

Gou geiq youq ndawsim, haeuj- sim yawj 《Liengzsanh Sanjgeiq》(bouxsij: Cinz Siengzcouh)、《Ngoenz- seng Gamjdoengh》 (bouxsij: Banh Cauzyangz) doenghgij sanjvwnz Sawcuengh mizmingz. Sij 《Goliux Yenzmingzyenz》 seiz, gou mbouj rox baenzlawz yungh Sawcuengh engq ndei bae yienh’ok gij eiqsei cwngzyij Sawgun“婀娜多姿”, vihneix Veiz bouxbien dwk denva caeuq gou doxyaeng lai baez cij gietdingh yungh “unqneuz gyaeundei”. Dahraix, youq Veiz bouxbien naihsim sonyinx baihlaj, gou youh youq 《Gvangjsih Minzcuz Bau》 fatbiuj 《Vabyaek- youzcai Henjgim》、 《Gouz Maq- muengh》 daengj lai bien sanjvwnz, lij ndaej daengz haujlai bouxdoeg haenh. Ndawde, bien 《Danqhaenh Siengh- swhhuz》 lij ndaej Gvangjsih Minzcuz Dayoz bien haeuj gobwnj!

Ngoenzneix baenqgyaeuj yawj doxdauq, gou byaij hwnj diuz roen aeu Sawcuengh sij faenzcieng caemhcaiq ndaej cingzcik haemq ndei, cawzhai swhgeij roengzrengz, engq liz mbouj hai gyoengq bouxbien daeuj bang daeuj rex. Mbouj miz gyoengqde sinhoj naihsim lumj lauxsae gaij cozyez lwghag iq nei, ngoenzneix gou couh mbouj ndaej guh canghraiz Sawcuengh ciemdingh, caen aeu gyo- mbaiq gyoengqde.

Ndaej guh canghraiz ciemdingh dwg gienh saeh ciuhvunz gou gig miz najda he, yienznaeuz fouq rap gwnz mbaq engq naekcaem, hoeng gou itdingh sij ok gij faenzcieng ndei.