Ngoenzneix dwg cietheiq,

Seiqcawq cungj gvaqciet;

Gaj bitgaeq guh dieg,

Iet gyaeuj muengh lwg dauq.

Ciengx gaeq ciengx bit hung,

Lwg cungj mbouj dauqranz;

Bae rog baenzneix nanz,

Go’nywj banz roen mwn.

Ciet daengz muengh lwg dauq,

Dauqranz ndomq daxmeh;

Meh yied ngoenz yied geq,

Deq lwg dauq doxyouq.

Naengh gwnz mbaeklae caeux,

Lwgda gaeuj baihgyae;

Vunz gvaq lajbya bae,

Caez angq laih lwg dauq.

Ciengx yiengz ciengx mou hung,

Cungj caj lwg dauq gaj;

Bakdou miz ci gvaq,

Roxnyinh lwg maranz.

Baihrog ci rumzsauj,

Cauz ndaej meh deng singj;

Meh youq mbonq mbouj ning,

Baenh ninz loq ring lwg.

Ngoenz cieng gap lab caenx,

Caen muengh lwg dauqranz;

Lwg bae rog baenz nanz,

Fanh ngeix byoem dwk hau.

Hoq ndei cung mbaet daenz,

Aen hoz muengh lwg dauq;

Gaj mou coq gwnz cauq,

Muengh lwg dauqranz gwn.