Gaxgonq, youq Bingzgoj Yen Haijcwngz Yangh Gveiliengz Cunh Mbanjganjyangz miz bouxmbauq he heuhguh Luz Yangz, de ngamq ndaej geij bi couh baenz lwggyax, baengx gwn haeux ranz lai majhung, ciengz gwn donq neix fouz donq laeng. Hoeng, vunz gungz ceiq mbouj dinj, de gamj gangj maenh guh, aenvih bang gyoengq vunz gungz doekcoih ndaw mbanj Yangz caizcawj, Yangz caizcawj couh heuh vunz gyaep de ok rog bae. Bihaenx, de ngamq rim 18 bi.

De itcig youq rog, Haijcwngz Yangh moix aen cunh de cungj byaij doh lo. Gaenlaeng de daengz Nazhaij Cunh Mbanjbyayeiz, miz yah laux he soulouz de. Yah laux neix mbouj miz lwg, ganq Luz Yangz lumj lwggeiq, gig gyaez dangqmaz, lij bang ra bawx hawj de. Dahsau dwg Mbanj- faegnyaenq ranz singq Veiz, doxyaeng ndei bilaeng seizcou couh coux haeuj dou. De hix hauqgingq yah laux neix lumj meh caen, “meh lwg” doxbaengh gvaq saedceij. Siengj daengz bilaeng seizcou couh ndaej baenzranz, ndaw sim de angqyangz raeuh, guh hong cungj daegbied roengzrengz. Ngoenz ngeix hwnz loq, de loq raen caeuq dahsau ranz Veiz doxaeu, song boux doxmaij doxgyaez, doengzcaez hauq- gingq yah laux neix, vuenyungz raix- caix, ndiu seiz lij angqvauvau. Mbwn miz rumz fwj fouzfap liuh, cij buenq bi yahlaux baenz bingh naek couh bae lo.

Soengq yah laux neix bae le, miz ngoenz banhaet he, Luz Yangz cingq siengj cingjleix gij doxgaiq yahlaux ce roengzdaeuj, mbouj siengj daengz miz geij ndaek vunz nyengh naeuz gij doxgaiq cungj duh gyoengqde, heuh Luz Yangz mbwn caengz laep seiz lizbae, mboujnex couh dub dai de. Mbouj miz banhfap, de cijndei deuz lo.

De gwq byaij gwq byaij, dungxiek couh ra mak gwn, hozhawq couh ndoet gij raemx ndaw mieng. Baeg lai mbwn guh moeg、namh baenz mbonq, ngengq ndang couh ninz.

Miz ngoenz he, de daengz bak Mbanjfaegnyaenq, siengj haeuj mbanj bae cam gwn amq haeux he, caemhcaiq dajdingq dahsau gaxgonq boiq hawj de. Hoeng, de gaenq geij ngoenz mbouj ndaej gwn, saedcaih byaij mbouj ndaej lo, menhmenh laemx youq henz roen ngunh gvaqbae……

Hix mbouj rox geijlai nanz, miz goeng geq mumh byoem caez hau he, ndwn youq doiqnaj de, vix coh Mboqvaiz goek doiq de naeuz:“Boux hauxseng, mwngz ei diuz roen neix byaij bae, baihnaj mbouj gyae miz saeh ndei caj mwngz.” De cingq yaek cam, goenggeq fwt mbouj raen lo. De naemj: Aiq goeng geq neix vix roen hawj gou bae ra dahsau ranz Veiz. De couh hwnjdaeuj byaij bae. Caen geizheih, daj raen goenggeq le, de byaij roen miz rengz dangqmaz, goenggeq vix diuz roen neix cungj dwg roen rinbenj, song henz miz va hai ndongqbibi, duzrwi duzmbaj youq ndaw va mbin bae mbin dauq.

Vah faen song gyaeuj gangj, Mbanjfaegnyaenq miz boux dahsau he youq gwnz bya langh vaiz, raen Luz Yangz byaij roengz Mboqvaiz bae, laih de nyaenx mbouj ndaej sinhoj bae ra dai gipmuengz buet haeuj ndaw mbanj bae ra vunz. Ndaw mbanj cibgeij boux bouxcoz miz rengz daengz Mboqvaiz bae vez, hoeng, maz cungj mbouj miz, bouxboux doq naeuz dahsau neix da va yawj loeng, cungj dauqranz bae lo.

Baihneix Luz Yangz ei diuz roen rinbenj byaij, mbouj daengz aen seizsaenz couh daengz baihnaj aen laeuz ndongqsaksak, gwnz bakdou hung “lungzgungh” song cihsaw lwenq- da, daengz seizneix de cij roxnyinh gizneix mbouj dwg Mbanjfaegnyaenq, dwg lungzgungh. Seiq boux hoiqmbwk gaenq youq bakdou hung deq haujlai nanz lo. Raen de doq caez bak gangj:“Lwggwiz, cingj gvaq baihneix!” Hix mbouj caj de cam, seiq boux hoiqmbwk couh rex de haeuj lungzgungh bae.

Daiq de daengz aen rug swiq- ndang, swiq ndei vuenh buh moq. Aeya! Buh moq neix lumj rau ndang guh, habndang raixcaix! Vunzlai baez raen cungj danq de caeuq lungz- gunghcuj doxboiq. Congz byaek gaenq baij ndei, lungzgunghcuj ndang nep lungzvuengz, ceh da de dinghdingh yawj coh Luz Yangz. Hoeng, Luz Yangz cungj roxnyinh geizheih, doiq lungzgunghcuj yienh cingz mbouj rox baenzlawz guh cij ndei.

Laeuj gvaq sam boi, lungzvuengz gangj gwn donq haeux neix le, lungz- gunghcuj caeuq Luz Yangz couh suenq dinghvaen, daengz ngoenzndei couh doxaeu. Luz Yangz duenz dahsau neix aiq dwg dahsau ranz singq Veiz yahlaux bang de ra, mboujnex baeq caeuq dahsau ndaw loq de doxdoengz ne? Mboujgvaq dahsau ranz singq Veiz baeq hix daengz lungzgungh ne? Baeq youh baenz dahlwg lungzvuengz ne? De cungj siengj mbouj ndaej doeng, gaxgonq de couh siengj ra dahsau ranz singq Veiz, baenzneix cingq ndei, de doengzeiq gij gietdingh lungzvuengz.

Laeuj gaeuq haeux imq, lungz- gunghcuj buenx Luz Yangz bae youz suenva, miz seiq boux hoiqmbwk fugsaeh. Ndaw suenva, raemx lae cetcet, duzbya menh youz, rumz ci fifi, roeg ciuz va rang, gingjsaek gyaeundei. Mbouj rox mbouj nyinh gaenq daengz lajbyonghngoenz, Luz Yangz roxnyinh gij laeuj ndaw dungx fat lo, gyaeuj miz di nguh, couh dauq rug bae yietnaiq lo.

Ngamq ninz roengz, Luz Yangz couh guh loq lo. De loq raen yahlaux vix najbyak de hemq gangj:“Bouxvunz mwngz sim ma, lumz aencingz gou caez, sim hoj sim haemz aeu lwgsau beixnuengx gou boiq hawj mwngz. Hoeng, mwngz daengz neix yiengj fouqgviq, aen sim mwngz deng ma gwn la?” Fwngzyinx fwt yunghrengz camz najbyak Luz Yangz, in ndaej Luz Yangz diuq hwnjdaeuj. De doq ndiu gvaqdaeuj, daengx gyaeuj hanh rih, najbyak gyumqgywt lij in. De naemj gij vah yahlaux, siengj gij saedceij caeuq yahlaux gvaq. De mbouj gamj daengx, swnh vunz mbouj haeujsim caegcaeg ndonj ok doulaeng lungz- gungh deuz lo.

Miz vunz raen, Luz Yangz daj mboqlungzvuengz okdaeuj, liz de haeuj Mboqvaiz gaenq ndaej buenq ndwen. De rueg gij laeuj gij noh youq lungzgungh gwn okdaeuj, mboujliuh cungj dwg gomez. Miz vunz cam de youq ndaw mboq 15 ngoenz 15 hwnz, baeq lix? De dap de ngamq gwn donq he couh dauq lo, mbouj miz baenz nanz ne.

Yenzlaiz dahsau ranz singq Veiz Mbanjfaegnyaenq couhdwg boux youq gwnz bya langh vaiz haenx, gij vunz ranz singq Veiz baez rox de lij lix, couh vaiqdangq baij vunz daeuj ciep de dauq. Doeklaeng, de couh hwnjdou caeuq dahsau ranz singq Veiz doxaeu seng lwg, ndwenngoenz gvaq ndaej van raixcaix.