Sanhlung Yauzcuz Yangh dwg aen minzcuz yangh dandog Dunghlanz Yen. Geij bi neix daeuj, Dunghlanz Yen Minzcunghgiz doenggvaq ceng- aeu cwngcwz、gyalai bued cienz、gaenxmaenx camgya daengj hingzsik, mboujduenh gyalai gij ligdoh bangfuz minzcuz yangh, hawj Mbanjyauz haemq gungzhoj doeklaeng haenx yienghsiengq bienqvaq hungloet.

It dwg gig yawjnaek. Aen giz neix cujyau lingjdauj gaenxmaenx gvancez doeksaed minzcuz cwngcwz dangj, lai baez bae mbanj minzcuz yangh caeuq ranz bouxguhnaz, bangcoh gaijgez gij vwndiz guh hong ndwenngoenz gven- daengz vunzlai minzcuz. Ngeih dwg gyalai rengz. Youq aen giz neix giepnoix vunz seiz, lij anbaiz song boux ganbu daengz Sanhlung Yauzcuz Yangh guh bouxguhhong bangfuz, ndawde boux ndeu guh faen duicangj guhhong bangfuz Sanhlung Yauzcuz Yangh. Sam dwg laebdaeb laebndei giekdaej sezsih. Dan bi 2018 byongh bi gonq couh anbaiz 108.6 fanh maenz bued roengz hwnjguh roenloh minzcuz yangh, seizneix aen yangh neix gaenq cienzbouh saedyienh aen moegbiu cunhcunh doeng roensuijniz, dingzlai mbanj cungj dajndongj roenloh, yawhsuenq daengz bi 2019 gihbwnj saedyienh aen moegbiu mbanjmbanj doeng roensuijniz, linghvaih, lij boiq- hab gvendaengz bouhmonz doeksaed minzcuz yangh gwn raemx ancienz、gaijguh ranzvaih lajmbanj、daizheiq vwnzva lajmbanj daengj gunghgung fuzvu sezsih, gij ndwenngoenz diuz- gienh vunzlai minzcuz yangh mbouj- duenh gaijndei, ndwenngoenz suij- bingz mboujduenh daezsang. Seiq dwg hwngfat daegsaek canjnieb. Doenggvaq gyavaiq diuzcingj guh ndei nungzyez canjnieb gezgou, hwngfat swnghdai gauhyau nungzyez. Seizneix, Sanhlung Yauzcuz Yangh daengx yangh ndaem gonengznuengx 3000 lai moux, daengx bi ndaej reh 230 dun, gyaqcienz dij 1150 lai fanh maenz; ndaem gohojmaz 2000 lai moux, daengx bi canjciz 130 fanh maenz; ndaem makhwzdauz daengz 11212.9 moux.

（Veiz Swng’yang/韦盛向）