Youq Fuconh Yauzcuz Swciyen, miz cungj fwen gvihaeuj singhab daih ngeih doh ndeu heuhguh fwenmbaj Yauzcuz, euciengq seiz fat ok gij sing haenx lumj gij sing ndei dingq duznon saenqdoengh fajfwed fat ok nei, lingzdoengh gyaeundei. Cangh- fwen youq guhhong gvaq saedceij roxnaeuz aeuyah baehaq gvaqciet angqhoh seiz euciengq, ok bak baenz fwen, sing fwen neuzned rwenzred, sekrwz ndei dingq, vunzlai cungj gig haengj dingq, cungj minzcuz yisuz daegbied boux ndeu ciengq vunzlai habhaeuj neix caemh yinx gij yisuzgyah ndaw guek rog guek、boux haengjgyaez minzcuz yisuz caeuq gyoengq hekyouz seiqlengq bae yawjngonz dingq ciengq. Bi 2008, “fwenmbaj Yauzcuz” ndaej lied haeuj guekgya gaep feihvuzciz vwnzva yizcanj mingzloeg.

Fwenmbaj Yauzcuz youq swcigih raeuz Fuconh、Cunghsanh song yienh caeuq Huznanz Gyangh- vaz Yauzcuz Swciyen nem gij dieg Yauzcuz comzyouq seiqhenz haenx riuzhengz, dwg vunzlai Yauzcuz vwnzyoz gwnzbak ndawde aen bouh- faenh gyoebbaenz ndeu, ndawde euciengq ndaej ceiq goksad、ceiq ndei dingq haenx dwg Fuconh. Fuconh dieg youq gyang Byaduh- bangz、Byamungzcuh, dwg diuz roen- hung vwnzva Cunghyenz、vwnzva Cujgoz、vwnzva Yauzcuz haeuj Lingj- namz aeugvaq, Yenz、Mingz、Cingh gvaqdaeuj, Yauz、Gun、Cuengh daengj minzcuz vwnzva doxcaez iemqhaeuj、doxcaez yingjyangj, ciemhciemh gyoebbaenz le gij yaem’wenq ndaw- biengz lai yiengh daegbied Yauzcuz Fuconh, ndawde fwenmbaj baenz le gij fwen hauhbiu Yauzcuz Fuconh, vunzlai Yauzcuz baez roeb saeh’angq couh aeu euciengq fwenmbaj, aeu euciengq fwenmbaj daeuj ngaeu- doeng naemjngeix、doxgyau ging- niemh.

Fwenmbaj youq gij fwenhab song singbouh Yauzcuz ndawde, aeu cungj vahdeihfueng “Begvah deih- fueng Vuzcouh” euciengq, neiyungz nangq daengz geiqsaeh、cienzcingz、caeqcoj、lwnh lizsij daengj gak aen fuengmienh ndaw guhhong gvaq saedceij vunzlai Yauzcuz, ndawde aeu fwenyoux guhcawj, aenvih ndaw fwen ciengzciengz miz “duz dih mbaj”“mbaj dih mbaj”“duz dih dinz” doengh gij cih dak neix, hawj hotfwen yienj ndaej haenqhwd vuetbued, diuhfwen gig miz danzsingq caiqlij seuqset gyaeundei, hawj vunz miz cungj yaenqsiengq angqhoengh、cingzdoengh caiqlij hailangh ndeu.

Fwenmbaj faen baenz dinj raez song loih. Fwen dinj itbuen miz seiq coenz, coenz daih’it、ngeih、seiq cungj dwg caet cih, dawz yinhlaeng, coenz daihsam ciengz gya cih dak、coenz dak; fwen raez cix dwg youq gwnz goekdaej fwen dinj bae hwngfat, couhdwg coenz daihsam de caih canghfwen seizbienh rag raez, aeu daeuj hawj canghfwen lienh rag heiq raez、bak linx caeuq singhoz. Gyoengq canghfwen euciengq fwen- mbaj aenvih ciengzgeiz lienh euciengq caeuq miz gij fuengfap daegbied lienh euciengq song sing- bouh haenx, mbangj canghfwen daj cibngeih、sam bi couh hainduj gapdoiq lienh euciengq, gyoengqde cungj miz gij bonjsaeh maenh’ak youq ciethoh doengjit seiz riengjret euciengq caemhcaiq euciengq coenz fwen cingcuj haenx. Boux canghfwen maenh’ak youq mwh euciengq gij fwen euciengq okdaeuj haenx rwenz- red ndei dingq, couh lumjbaenz bang dinz bang doq ndeu mbin gvaqbae nei, fat ok gij sing vunghvungh haenx, vunzlai couh dajbeij naeuz dwg “yaem duzdinz”“yaem langhraemx”.

Fwenmbaj cujyau dwg yienj- ciengq, mbouj miz gij doxgaiq yunghdawz dingh aeu haenx, gij cozbinj miz daiqbiuj de dwg 《Beix- youx Roengzhaij Gou Roengzhaij》《Mbouj Eu Hot Fwen Hoj Gvaq Ngoenz》doenghgij neix.

Fwenmbaj ndawde daiq miz gij lizsij vwnzva gyaenanz Yauzcuz, dijndaej muzmaeq caeuq swnjcienz. Vih baujhoh caeuq swnjcienz fwen- mbaj Yauzcuz, Fuconh gaenq youq Lenzsanh Cin Lenzdangz Cunh laebbaenz dieg goekdaej swnjcienz, gyarengz bae guh gij hong vatcimh、cingjleix、swnjcienz、hwngfat, gung- ganq canghfwen bouxcoz, guh biujyienj hozdung, aeundaej cingzcik yienhda.