Vangz canghyw byaij youq gwnz gai, yamqdin mbaeumbengmbeng. De cingq ganj bae hwnjban, mbouj, ganj bae gai yw. Haemhlwenz, goenglaux haenx mingzbeg dwk han de, itdingh cawx gij ywbouj de. Guh dan gaicawx neix, foekfoek fanfan baenz buenq bi, de gwn bae geijlai haemzhoj mbouj miz bouxwnq rox ha. Ngoenzneix cungjsuenq guh baenz lo, baenzlawz mbouj hawj de naj haiyabyab?

Yenzlaiz buenq bi gonq, Vangz canghyw youq yihyen diegdaengxci raen boux doengzsaeh de Mungz canghyw ngamq vuenh aen ci moq ndeu, gig geizheih, Mungz canghyw caeuq de ndaej gij cienzgoeng yienznaeuz mbouj doxdoengz, hoeng hix mbouj ca ndaej geijlai, de daj gyawz ra ndaej cienz ne? Baenzneix de couh gangjriu cam Mungz canghyw:“Mwngz bae gizlawz nyaeb ndaej cienz ya?” Mungz canghyw liuqliuq cehda, riu naeuz:“Nyaeb cienzyw ndaej.” Vangz canghyw hozhaenz ndaej youh cam de:“Mwngz youq rog hai bouqyw ha?” Mungz canghyw naeuz:“Mbouj hai bouqyw, hai conghbak couh ndaej.”

Gij vah neix hawj Vangz canghyw ngeizvaeg cim Mungz canghyw. Mungz canghyw ngeux gyaeuj ngonz seiqhenz, sing saeq nam:“Bouxlaux ciengz gangj ‘gaenh dah gwn bya, gyaw bya gwn faex’. Baenzneix gangj, raeuz guh canghyw, couh gwn yw. Gij cienz cawx aen ci neix, cungj dwg vunzbingh hawj gou.” Vangz canghyw doeksaetyat:“Ha! Mwngz mbouj lau dai a?” Mungz canghyw sing daemq naeuz:“Gaej gikdoengh, gou mbouj dwg aeu hoengq ndwi. Gou bang vunz gaw ywbouj hawj vunzbingh. Gou ndaej cienz, vunz- bingh ndaej yw, song mbiengj cungj canh.” Vangz canghyw sim diuq boegboeg cam:“Baenzneix guh mbouj deng famh saeh?” Mungz canghyw riu dap:“Vunzbingh gag nyienh cawx, gou youh mbouj ep gyoengqde aeu, mbouj gwn oet, deng famh maz saeh? Mwngz naeuz hawj gou yawjyawj. Gou gangj hawj mwngz gij fap canh ngaenz, baenzlawz guh mwngz gag naemj lo.” Gangj sat, Mungz canghyw couh byaij haeuj laeuz yinhyen lo.

Vangz canghyw dingqnyi gij vah Mungz canghyw, siengj bae guh hoeng de mbei iq youh lau oksaeh. Hwnz- neix, Vangz canghyw youq gwnz mbonq fan bae fonj dauq ninz mbouj ndaek. Yaek ranzrongh seiz, de moengjmoengj doengjdoengj, lumj miz boux vunz ndeu doiq de naeuz:“Mwngz lau maz, yaek oksaeh ne, Mungz canghyw senq deng lo. De seizneix mbouj dwg fatcai ndaej cienz bae cawx ci la?”

“Mbei hung miz max gwih, mbei siuj gwn bwnviz.” Vangz canghyw sawqmwh siengj daengz coenz vahsug neix. Guh! Hoeng, gai yw hawj boux vunzbingh lawz ne? Youq ndaw uk dawz gij vunzbingh de sug haenx raeng gvaq dangq ndeu le, de dajsuenq bae ra boux mehlaux he gonq. Baenzneix, Vangz canghyw caeuq Mungz canghyw aeu ndaej geij hab ywbouj yaek dawz bae gai.

Ngoenzhaenx, de deq ndaw fuengzbingh mbouj miz bouxwnq le, cij cangguh cazfuengz daeuj daengz henz mbonq boux mehlaux neix. De lumj guhcaeg lau vunz yawjraen nei, caenhliengh cuengq sing daemq doiq boux mehlaux neix naeuz: “Daxbaj, gij bingh mwngz ndei lo, ndaej ok yihyen lo. Hoeng, mwngz maranz lij yaek gwn di ywbouj, aenndang cij fukndei ndaej vaiq bw!” Gangj sat de caegcaeg daj ndaw daeh buhhau mbon hab yw he okdaeuj, ndenq hawj mehlaux neix yawj.

Mehlaux riumbw naeuz:“Docih mwngz lo Vangz canghyw. Seizneix lij bae gyawz ra boux canghyw lumj mwngz nei baenzneix haeujsim vunzbingh dem! Mwngz gangj yw neix ndei gou couh saenq mwngz! Doek- laeng gou couh heuh dahlwg gou bae nem bohlungz de ciq di cienz daeuj cawx.” Vangz canghyw sawqmwh naj hoengzgoedgoed. Gai yw hawj vunz- gungz, aen sim de doq unqnemnem roengzdaeuj, de sing unq gangj:“Mehbaj, mbouj yungh gwn gij yw neix hix baenz, yw neix bengz di. Gou lingh hai danyw cienh hawj mwngz. Gij yaugoj cungj ca mbouj geij lai.” Naeuz sat, Vangz canghyw cienq ndang doq deuz ok fuengzbingh.

Daj baezneix hwnj, Vangz canghyw caiq mbouj nyaenxsim ra vunz gai ywbouj lo. Hoeng, baez- naengz Mungz canghyw cam daengz gienh saeh neix, de lumj doiq mbouj hwnj Mungz canghyw nei, naj mong- yemyem, mbouj gangj ok sing lawz. Dauqdwg Mungz canghyw vunz daih- liengh, hix mbouj cam lai, gangj hawj de gij ginghyen, lij gaisau boux vunzbingh he hawj de. Boux vunz- bingh neix dwg goeng lauxbanj ndeu. Gizsaed Vangz canghyw hix sug de. De daj gyaeuj daengz din cungj daenj mingzbaiz, rox lox vunz, ciengzseiz bang canghyw banhsaeh, gyoengq canghyw cungj haengj caemh de baedauq. Vangz canghyw ngeix, fanjcingq de miz cienz, couh ra de gai ywbouj lo.

Caen dahraix, goeng lauxbanj neix mbouj miz di yaemhywx doq hanbak naeuz cawx, lij cam Vangz canghyw wnggai cawx geijlai hab cij ngamj. Bonjlaiz Vangz canghyw siengj gai noix di hawj de, de cix gag euq aeu cawx baenz fanh maenz cienz ywbouj. Hoeng, goeng lauxbanj neix naeuz seizneix gij cienz de dawz bae aeu huq lo, gvaq geij ngoenz cij ndaej hawj cienz ywbouj. Vangz canghyw raen de caensim raixcaix, youh dwg Mungz canghyw gaisau, couh cuengqsim hawj de geij hab ywbouj gonq. Byawx liuh, buenq ndwen gvaqbae, goeng lauxbanj lij caengz hawj Vangz canghyw cienz ywbouj. Moix baez daj denva hawj de, de cungj naeuz gvaq geij ngoenz dem. Mbouj rox geijlai baez geij ngoenz lo, daengz seizneix 5 ndwen lo, vunz ndoj haeuj gyawz bae, aen ngaeuz de cungj mbouj raen. Vangz canghyw gag danqheiq, coem lo! Gij cienz ywbouj neix cij ndaej de gag hawj lo. Hoeng, de cix mbouj gamj bauqgingj, gij saeh neix baenzlawz ndaej raen ndit ne! Danghnaeuz cienz okbae, de lij baenzlawz guh canghyw!

Gaemh roeg mbouj dawz, dauq deng aengaep nap fwngz. Vangz canghyw yied siengj yied hozfod, deng vunz yaeuh aeuqheiq lai lo. Mehyah Vangz canghyw lij mboenmboen saex- saex, naeuz:“Doengz guh canghyw, Mungz canghyw gvai lumj duzlingz, mwngz cix ngawz lumj lwgsawz. Neix mbouj dwg gwnz feiz rwed youz maz? De ndaw hoz haebmaenj, itdingh yaek aeu boiz doxdauq.”

Vangz canghyw mbat neix hag gvai lo. De lumj cuengq denyingj nei dawz gij vunzbingh haenx cug boux cug doxbeij. Doeklaeng, de nyinh- naeuz, goeng vunzlaux neix ceiq hab lo. Goenglaux neix gij cienz duiyouh lai, ndaw ranz mbouj miz youheiq. Ceiq hawj vunz cuengqsim dwg, goenglaux neix gag daeuj ra de hai gvaq ywbouj, baezhaenx de lij gienq goenglaux neix mbouj aeu maezsaenq ywbouj lai, gwn byaek gwn noh habdangq couh ndaej lo. Seizneix cingq hab ra boux goenglaux neix lo. Gij saeh gai ywbouj caen swnh, Vangz canghyw ngamq dwen ndaej song coenz, goenglaux neix doq ajbak riu lo, sangjsadsad han naeuz ngoenzcog couh heuh lwg de dawz cienz daeuj aeu ywbouj.

Daengngoenz gyanghaet rongh- sagsag, rumzcin ci gvaqdaeuj raeuj- rubrub. Vangz canghyw yamq ok bak dendih, seizneix de raen bouxlawz cungj roxnyinh gig angq, bak diemz- subsub caeuq vunz doxdongx. Sawq- mwh, de yawjraen Mungz canghyw daj gehhongh byaij gvaqdaeuj, henz ndang lij miz song boux daenj buhsihcangh gab de youq cungqgyang. Vangz canghyw ajbak siengj caeuq Mungz canghyw dongx, hoeng Mungz cangh- yw naj mbwng yauyau caemhcaiq naiq nuegnueg ngaem gyaeuj mbouj gamj yawj de.

Vangz canghyw singsaeq cam dah husw henz ndang de：“Ok maz saeh la?” Dah husw neix naeuz:“Vangz canghyw, mwngz mbouj rox ha? Mungz canghyw doisiu ywbouj bengz hawj vunzbingh, gij ywbouj hix mbouj rox daj gyawz ndaej, aiq dwg gij canjbinj ‘sam fouz’, deng vunzbingh gauq lo, ngaiz gijveij cazdawz lo.” Vangz canghyw naj doq bienqsaek, ndang saenzdwdwd. De siengj cienq- ndang byaij deuz, baez diem din, sawqmwh daemjndoet, aenndang bibi buengqbuengq yaek laemx. Dah husw neix doq fuz dawz de, siujsim sisi cam naeuz:“Vangz canghyw, mwngz gyawz in?”Vangz canghyw gangjmbaj mbwdmbwd dwk naeuz:“Mbouj…… Mbouj miz maz. Gou…… gou daemj- doet ndwi,” ndaw bak de lij damz byoedbyoed, “Cadi ho……cadi ho……” Gyoengqvunz henz ndang de hix mbouj rox de baenzlawz, cij doxcim myoegmyoeg.