Ndwen 4 ngoenz 20, ngoenz daihsam ngoenzgyaj cietfwen “sam nyied sam Bouxcuengh” bi 2018 Guengjsae, mbanjranz Louz Samcej Hozciz Si Yizcouh Gih Mbanjliuzhoz banh langhbaij gij vwnzva Fwen- cuengh, doenggvaq eu fwen、bau aendomq daengj hozdung lai cungj lai yiengh, yinx ndaej haujlai bouxhek daeuj yawjngonz caeuq daejniemh gij vwnzva minzcuz conzdungj.

Louz Samcej dwg canghfwen Bouxcuengh ndawbiengz cienznaeuz, de coengmingz lingzsingj, rox eu fwen lai, sing fwen ndei dingq, ndaej haenh baenz “sienfwen”. Gyoengq- vunz gig gyaezmaij Louz Samcej, gij gojgaeq caeuq gij geiqsij caeuq de mizgven haenx miz gig lai, gyoengq- vunz aeu binaengz “sam nyied sam” （liggaeuq ndwensam cosam） guh baenz ngoenzciet daeuj geiqniemh de.

Ciuq cam rox, bi 2006, “fwen Louz Samcej” Hozciz Si Yizcouh Gih bauq haenx ndaej senj haeuj buek daih’it guekgya gaep feihvuzciz vwnzva yizcanj mingzloeg, caemhcaiq ginggvaq guekgya gvendaengz danh- vei gaujcingq yenzgiu gietdingh Yizcouh Gih dangguh mbanjranz Louz Samcej.

(Gungh Siengzyouj/龚祥友)