Laux Vangz youh gag youq diuz roen henz gunghyenz byaij bae byaij dauq, sing’yaem roeg rwenz mbouj ndaej yinx de haeujsim bae dingq, de hix mbouj bae louzsim vamoq haetromh. De ciengzseiz lizhai gij dieg vunzlai, couhsuenq yawjraen miz gyoengq bouxlaux doxcaemz, siengj camgya, hoeng hix cij ra aen dieg- dingh bae naengh ngonz gyoengqde diuqfoux、ciengq heiq. Mbouj dwg mbouj siengj bae ra gienh saeh angq daeuj gaijmbwq, cijdwg lumj duzroeg ngamq daeuj aen ndoeng moq youq aeu sai seizgan bae roxnaj seiqhenz. Caiqnaeuz de dwg boux bouxlaux lajmbanj, daeuj daengz aen ndoeng ganghginh suijniz——aensingz ngamq ndaej buenq bi.

Laux Vangz caengz nem lwg de buen haeuj ndaw singz lij youq lajmbanj seizhaenx, de yiengjsouh dwk gij angqyangz ndaemnaz langh vaiz. Yienznaeuz yah de dai ndaej lai bi, de gag youq, hoeng youq lajmbanj miz hong guh caemhcaiq miz caencik baengzyoux. Seizneix de youq gungh- yenz cix ra mbouj raen gij angq ndwenngoenz moq, couh lumj roeglaej mbin haeuj ndaw gyoengq roeggacak bae nei. Mizseiz yawjraen daeng- ngoenz doek bya fwj ndinghoengz, yinx hwnj de ngeixdauq: Youq mbanj guh hong dauq, caeuq vaiz caez byaij ma. Gizneix mbouj raen naz mbouj raen vaiz, bae gyawz ra saeh angq.

Lwgsai laux Vangz, Daegvangz, dwg boux lwghauq, hoeng mbouj rox sim daxboh. Yawjraen daxboh ngoenzngoenz bae gunghyenz youz cix naiqneknek dauqranz. Gienh saeh gvaiq neix cix hawj de ndaej ngeix de lij iq seiz roengzdangz boh bae coux de maranz, hoeng ciengz deng bae ra de, aenvih de ngah caemz lai, roengzdangz buet bae gyawz youz mbouj rox. Boh laux lwg ciengx, de hix siengj buenx daxboh, hoeng gyang- ngoenz de miz hong yaek guh! Baenzlawz guh ne?

Gyaeuj de baez cienq, song da fwt rongh, yawj coh bingzmuq soujgih, siengj ok aen banhfap ndei he. Caj daengz gyanghaemh caeuq laux Vangz caez naengh youq gwnz sahfaz, de gangj:“Boh, mwngz youq singz lij youq ndaej gvenq lwi? Gou bang mwngz cawx aen soujgih, baenzneix mwngz couh ndaej ciengzseiz lienz- haeh gou lo.” Doq gangj doq dawz aen soujgih cinwngz hau youh moq ndenq daxboh. Laux Vangz ciep gvaqdaeuj, ndawsim lumj gaxgonq ranz miz aen densi nei gikdoengh, angq naeuz:“Gou hix suenq boux miz soujgih cinwngz lo!”Daegvangz dingqnyi, sim hix angqvauvau, gangj:“Boh, gyangngoenz gou bae guh hong, mwngz mbwq roxnaeuz siengj gou daengz banngoenz ndaej daj denva hawj gou gangjgoj.” Laux Vangz ngaekgyaeuj.

Huq moq cungj dwg ciuyinx vunz, mizseiz hix rox gaijbienq boux vunz he. Lwg baengzyoux Daegvangz cawx le aen dennauj ndei, couh caemmaez haeuj ndaw youzhi dennauj bae, bohmeh de yungh sat banhfap cungj mbouj ndaej gouq de okdaeuj, gij vuenzyungz hix noix youq ndaw ranz ok gvaq lo. Ndaej soujgih moq le, hainduj laux Vangz hix mbouj miz maz, gvaq geij ngoenz, Daegvangz lumj youq gwnz ndang boh yawjraen aen ngaeuz lwg baengzyoux de.

Gaxgonq laux Vangz moix ngoenz lij rox bae gunghyenz byaijbyaij yawjyawj, hoeng seizneix de engq gyaez youq ndaw ranz boenz soujgih, Daegvangz baez roengzban dauqranz couh yawjraen boh naengh youq sahfaz boenz soujgih, mizseiz lij cim bingzmuq angq riu. It lienz geij cib ngoenz cungj baenzneix, Daegvangz yied daeuj yied you.

Daegvangz caegcaeg bae yawj boh dauqdaej boenz maz, cix deng daxboh yawj rox, faj fwngz he sikhaek dangj bingzmuq soujgih, faj fwngz he naenx roengz gen’gvanhgih. Couh- suenq baenzneix, Daegvangz da raeh yawjraen di, hix rox boh boenz maz, de gienq naeuz:“Boh, mwngz hix rox boenz veihsin lo, caen lek! Seizneix ciengzseiz miz gij sinhvwnz gangj vangjloz loxyaeuh. Raeuz mbouj ndaej deng yaeuh, aeu geiqmaenh: Louzsim gij seizgan boenz veihsin, siujsim vunzvaih caeuq gvangjgau gyaj, bauj- hoh ndei saenqsik swhgeij, hix gaej daiq maez soujgih bw……”

Laux Vangz mbouj gyaez dingq, lumj caiq dingq rwz deng nuk nei. Ciengj dwk gangj coenz he:“Rox lo!”

Daegvangz rox boh nyap lo, bak doq daengx, hoeng sim naemj: Mbouj ndaej hawj boh deng yaeuh!

Ngoenzsinghgiz, ndit ndei va hai, Daegvangz ndaejhoengq, muengh caeuq boh caez okbae youq ndaw singz cienqcienq, hoeng laux Vangz engq ngah youq ranz. Daegvangz rag fwngz boh siengj okdou, laux Vangz cix mbouj nyienh byaij, gangj:“Caj di, okbae couh mbouj miz Wifi lo. Gou aeu veihsin caiq caeuq baengzyoux gou gangjgangj goj yaep ndeu.”

Daegvangz ra raen gihvei, dawz gvaq souhgih boh yo ndei. De gig vaiq youq gwnz soujgih swhgeij saeuj diuz sinhvwnz de caeux ra ndei, hawj daxboh yawj, caemhcaiq doiq boh naeuz:“Boh, mwngz yawj, ngah boenz soujgih doiq ndang vunz mbouj ndei, gaxgonq gou hawj mwngz cawx soujgih mbouj dwg muengh mwngz maez boenz de!” Sing Daegvangz gangj vah miz di hung, de muengh boh ndaej dingq haeuj rwz.

Laux Vangz deng lwg naeuz, sim baenzlawz ndaej fug, hoeng dingq vah lwg gangj hix mingzbeg di, de naeuz:“Lwg a, aen singhgiz ndeu, 5 ngoenz mwngz cungj bae guh hong, caeux bae haemh dauq, baenzlawz rox gou gwq boenz soujgih, lij naeuz gou maez soujgih dem.”

Raen Daegvangz mbouj oksing, de youh naeuz:“Ngoenzhaenx, gou bae gunghyenz, miz aen donz bouxlaux hag daigizgienz cingq ciu vunz. Miz boux bouxlaux gvaqdaeuj iu gou camgya, gou naemj haeuj ndaw bae lienh ndang hix ndei, couh doengzeiq lo. Haeujbae le aeu saujmaj gyoengqde haeuj aen ginzveihsin, naeuz youq gwnzde doxiu gij seizgan lienh ndang. Seizde yienznaeuz gou ndaej soujgih haujlai nanz, hoeng lij mbouj rox yungh, gyoengqde couh menh son gou. Youq ginzveihsin mboujdan iu seizgan lienh ndang, lij roxnaj haujlai baengzyoux moq, caeuq gyoengqde gangjgoj gig miz yinxdaeuz, hawj gou roxnyinh youq ndaw singz mbouj caiq dwg boux dog lo. Bingzciengz dou bet diemj daengz cib diemj hag daigizgienz, banringzgvaq song diemj daengz seiq diemj youq aen diemq gwn caz gangjgoj……”

“O! Dwg baenzneix……” Daeg- vangz baezneix cij rox, dwg de siengj loeng lo. Daj buen haeuj singz hwnj, hong yied lai yied muengz. Hong lumj hawj swhgeij caeuq daxboh baen baenz song aen seiqgyaiq, yawj mbouj raen hix dingq mbouj nyi sim daxboh caencingq baenzlawz naemj. Daeg- vangz yawj dwk soujgih, fwt ngeix hwnj:“Hei! Boh, raeuz boh lwg song boux lumj caengz gya veihsin, gya le raeuz doxgyau couh fuengbienh lo.” Laux Vangz riu naeuz:“Ndei a, vaiq di, daeuj.” Daegvangz ndenq soujgih daxboh dauq, laux Vangz coux gvaq suglienh dwk saujmaj gya baengzyoux veihsin Daegvangz.

Cib ndwen doeklaeng, laux Vangz aeu ndaej boux bawxmoq he, Daegvangz hix youq de ndaej 20 geij bi caiq coux daeuj boux daxmeh moq, miz vunz buenx laux Vangz ndawranz ngoenzngoenz cienz ok sing riu.