“Fouxvaizcin Bouxcuengh” Sih- linz Yen gaenq riuzcienz baenz 350 lai bi, biujdap cungj yiengh ciuhnduj sohsed ndeu, haenhdanq gij ndei duzvaiz caeuq bouxvunz guhbuenx doxhuz caemhyouq、gaenxmaenx guhhong haenx, mbaenjgouz saenz- vaiz hawj vunzraeuz daiq daeuj gitndei hab’eiq; yienj ndaej ndujndet cocat、daiq miz yiengh ciuhnduj, miz gij daegsaek minzcuz diegde caeuq ndawcomz lai yiengh, ndaej laux- hangz canghmaeq heuhguh “gaiq bienqrin lix” yisuz vwnzva ndaw- biengz Sihlinz, dwg gaiq dijbauj yisuz ndawbiengz ciuhgeq Bouxcuengh raen mbouj lai ndeu, bi 2006 ndaej lied haeuj buek daih’it swcigih gaep feihvuzciz vwnzva yizcanj baujhoh mingzloeg.

“Loenghyahvaiz” eiqsei dwg “diuqfoux loenghfoux gyaeujvaiz”, youh miz gij eiqsei “diuq foux- vaizmeh”. Cungj foux neix dwg youq ndwencieng caeuq seiz ndaemcin guh hozdung caeqbaiq seiz diuq, ndigah youh heuhguh “fouxvaizcin”. “Loenghyahvaiz” seiz ciuhgeq youq gij mbanj Bouxcuengh ranghdieg baihsae Guengjsae、baihnamz Yinz- nanz daengj riuzcienz, seizneix cijdan Sihlinz Yen Nazcoj Myauzcuz Yangh Babwnz Cunh Mbanjdohbwnz riuz- cienz roengzdaeuj, mbangj neiyungz gaenq saetcienz. Hozdung “loengh- yahvaiz” itbuen daj ndwencieng cocaet hainduj daengz ndwensam cosam guhsat, faen sam duenh bae guh: It dwg caeqbaiq saenzvaiz、coux saenzvaiz; ngeih dwg diuqfoux yienj- heiq; sam dwg soengq saenzvaiz. Gij yizsi coux soengq saenzvaiz guh ndaej gig hoengh, faenbied youq banhaet caeuq banringzgvaq guh; gij biujyienj wnq cix youq doengxhaemh guh, miz foux gyaeujvaiz、dwkgienz、eufwen daengj.

“Gyaeujvaiz” “loenghyahvaiz” dwg aeu dukfaexcuk san baenz yiengh gyaeujvaiz le caiq nem caengz ceijsa ndeu hwnjbae, daz saek ndaem veh ok cehdavaiz, ndang vaiz dwg aeu baengzndaem roxnaeuz baengzmong longz, yawj hwnjbae yiengh rongh- lwenq miz daegsaek. Mwh biujyienj, cawz gyaeujvaiz le, lij miz mauhngeg、cax、faggiemq、faexmbaenq、fagca、fagcuiz doenghgij doxgaiq yunghdawz neix, yozgi miz laz、gyong、nauzcemq、loxlez、 ngeihyienz、aendig、hauh- gaeuvaiz daengj guhbuenx dem, ca mbouj geijlai yungh caenh gij doxgaiq diuqfoux yienjheiq ndawbiengz riuz- cienz youq ranghdieg Guekgaeunding ciuhgeq haenx.

Moix bi ndwencieng cocaet, vunzmbanj youq goenglaux ndaw mbanj daiqlingx lajde roq gyong roq laz、diuq fouxgyaeujvaiz, doxcaeh bae daengz Gamjokraemx caeqbaiq cingj saenzvaiz dauqma ndaw mbanj caeuq vunzlai gvaq ciet caemh angq. Vunzlai dauqma daengz gizdieg guh hozdung ndaw mbanj, biujyienj couh hainduj lo, youq ndaw sing gyonglaz、loxlez haenx, boux foux gyaeujvaiz fwngz yaengx gyaeujvaiz daep youq gwnz gyaeuj, ndang longz baengzvaiz, diuqyekyek foux haeuj ndaw cungq- gyang, yiengq vunzlai hengzlaex, guh ok buetbongh、diuqsaet、linx rix lwg、haeujninz、rag cae、doznaek、dox- daemj daengj gij yiengh doenghyeb haenx; riengzlaeng couh miz boux langhvaiz daep mauhngeg byaij ok- daeuj, caeuq vaizvuengz itheij foux- doengh, hensouj vaizvuengz; ciepdwk miz gak cungj gaem doxgaiq dwkgienz biujyienj youq seiqhenz vaizvuengz、bouxlanghvaiz yienj hwnjdaeuj, vunz buenx vaiz foux, roxnaeuz faen cuj doxhoenx biujyienj, guh gij yiengh hoenxmoeb duzvaiz caeuq henzsouj duzvaiz hoenxdingj haenx, eiqsei dwg caeuq duzgvaiq duzfangz、guk beuq manaez doxhoenx daengj. Gak cungj biujyienj doengzcaez bae guh, caemh ndaej dandog bae guh. Youq ndaw gyang diuqfoux dwkgienz yietnaiq seizgan, canghfwen couh eu fwen doiq fwen hwnjdaeuj. Gij fwen heuhguh “fwen bouxnoengz”, dwg caen hoz caen sing euciengq, sing seuqsat goksad, ndei dingq dangqmaz; gij neiyungz fwen gig lai, miz haenhdanq goengcoj Baeuqroxdoh, miz haenh- danq duzvaiz gaenxhong dwgrengz, maqmuengh rumz swnh fwn yinz, bouxvunz doenghduz bingzan, haeux- gwn fungsou, caemh miz euciengq guhhong gvaq saedceij, ranznden doxhuz, vunzmbanj doxgiet, aeueiq vunzlaux gyaez lwgnding, doiq fwen- youx daengj lai cungj lai yiengh.

Gij biujyienj “loenghyahvaiz” neiyungz bauhamz fungsug caeqbaiq、diuqfoux、 yaem’wenq、 dwkgienz、fwen daengj, bauhamz le fungcingz fungsug minzcuz、yisuz ndawbiengz daengj haujlai yenzsu minzcuz, ndawcomz lai cungj lai yiengh. Riengzdwk seizdaih hwngfat, “loenghyahvaiz” gaenq demgya le haujlai neiyungz moq, engq ndei bae haenhdanq sevei moq、saedceij moq.