“Lazgimngaenz” dwg aen goj dieg haenx bouxboux cungj saenq ndeu. Riuznaeuz gaxgonq Gamjlaep baihndaw, miz aen laz ronghcagcag lumj gim ndeu, aen laz haenx ciengzciengz loq raen loq fouz, baez miz vunz byaij gvaq giz gaenh, aen laz haenx couh gag yiengjnoengnoeng hwnjdaeuj, gij sing haenx rox mbin gvaqdaeuj, riengz baihlaeng bouxvunz byaij. Dingqnaeuz byawz ndaej lumh aen laz neix couh fatcaiz. Miz gij vunz mbeilaux gaenq duet buh roengzdaeuj naemj cumh aen laz neix dawz maranz yo. Hoeng, aen laz neix cungj lumj rox nei, vunz baez iet fwngz gvaqbae, de couh mbin deuz, liz vunz mbouj gyae hix mbouj gaenh, cungj dwg mwngz byaij de doengz byaij, mwngz dingz de doengz dingz. Gij vunz dangdieg cungj saenq ndaw Gamjlaep miz aen laz neix gvaq. Seizneix coih diuz goengloh he doenggvaq ndaw gamj bae le, caiq hix mbouj miz vunz ndaej raen aen laz neix lo.

Riuznaeuz ndaw Gamjlaep miz ndaek rin heuhguh “rin vaiz riz”. Cingciuz seiz gizgaenh Gamjlaep miz aen mbanj he heuhguh Mbanj- gyahfungh, ndaw mbanj miz ranz ndeu ciengx miz duz vaiz hung he, mbouj rox daj seizlawz hwnj, duzvaiz neix mbouj gwn nywj mbouj gwn haeux, hoeng yied maj yied hungmaengh, yied maj yied bizcangq, cae reih cae naz rengzfwgfwg. Bouxcawj roxnyinh geizheih, laeglemx cazyawj duzvaiz neix. Miz haemh ndeu byonghhwnz, bouxcawj raen duzvaiz neix byaij ok lajriengh, cigsoh coh Gamjlaep byaij bae, byaij daengz ndaw Gamjlaep giz ndaek rin raeuzrad youh mwnzlulu ndeu cij dingz roengzdaeuj. Gij raemx gwnzdingj gamj baez caek baez caek ndik daengz gwnz ndaek rin neix, duzvaiz couh iet linx riz gwn gij raemx gwnz rin. Baenzneix laebdaeb riengz le geij haemh, bouxcawj roxnyinh lo, laxlawz duzvaiz neix dwg riz gwnz gij raemx gwnz rin ndaej maj- hung. Gienh saeh neix cienz okbae le, gyoengqvunz ndaw mbanj bouxboux cing vaiz daeuj riz, duz vaiz lawz riz le, doeklaeng mbouj gueng nywj hix gag maj ndaej hung.

Gamjlaep baihlaj miz aen mbanj he heuhguh Mbanjrunghnganz, ndaw mbanj miz ndaek vunz he sim gig dam, haemh ndeu de laeglemx daemj daengz ndaw Gamjlaep, naemj umj ndaek “rin vaiz riz” maranz gag yungh. De umj ndaek rin neix ngamq byaij geij yamq, laj din baez raeuz, “rin vaiz riz” daj gyang fwngz de lot roengzdaeuj, coh bakgamj ringx bae, doek daengz aen gamj wnq laeg bae. Daj baezneix hwnj, gyoengqvunz caiq hix mbouj raen ndaek “rin vaiz riz” gvaq lo.

Gaxgonq, boux guh gaicawz ciengz byaij gvaq Gamjlaep. Aenvih ndaw gamj ndeiyawj, haujlai boux guh seng’eiq cungj daiq baengzyoux daeuj youz, guhdoih youq ndaw gamj dep laeuj doiq sei, seizneix gwnz dat ndaw gamj lij louz miz gij sei boux canghsei Cinghdai.

Gamjlaep gingj gyaeu dwg mbwn caux,

Sau mbauq daeuj daengz simdaeuz hai.

Saeq ngonz gizneix caen ndei lai,

Mbouj yungh gvaq haij ra diegsien.

黑岩佳景本天工，

携手登临兴倍浓。

细味此间无限趣，

何须蓬岛访仙踪。

Gamjfangz

鬼 岩

Gamjfangz youq baihsae Bwzfungh Cunh, caeuq Gamjrongh caeuq Gamjlaep gaq baenz sam ga. Daj Gamjlaep hwnjdin, byaij coh baihsae aiq ndaej song goengleix gyae, couh daengz Gamjfangz lo. Aen gamj neix coh heuhguh “Gamjfangz” mbouj dwg aenvih ndaw gamj miz fangz, dwg aenvih aen gamj neix caeuq gij gamj wnq mbouj doxdoengz, ra raen aen gamj neix caemhcaiq haeuj aen gamj neix bae, mbouj feiq di goengfou mbouj ndaej, couh lumj duzfangz nei, miz youh hoj raen, raen youh hoj rox.

Gamjfangz miz gamj rog caeuq gamj ndaw, gamj rog bakgamj hungmbwk, ndaw gamj gvangqlangh, rim da dwg rinrouj rinrangz, boux mbouj rox baez yawj laihnaeuz yawjraen Gamjfangz caez lo, gizsaed mbouj dwg hane. Youq gamj rog giz gungx he, miz aen bak gamj iq ndeu, lumj aen bak doengj gvangq nei, daj gizneix haeuj gamj ndaw bae. Vunz yaek haeujbae, aeu ninz roengzdaeuj, yaengyaeng nod coh naj, haeuj daengz gamj ndaw, seiqcawq laepnyamnyam, couhdwg miz daeng rongh hix ngamq ndaej yawjraen gaiq dieg iq laj din ndwi, mbouj rox aen gamj geijlai gvangq, hix mbouj rox miz geijlai raez, mwngz ae sing ndeu, seiqlengq haplangh, sing ae yied bae yied gyae, nanznanz mbouj sanq.

Gamj ndaw gij rinrangz gwnz hung laj saeq lumj baenz dah baenz sau dingqdaeuj ndwn nei, miz siengq miz yiengh ndeiyawj raixcaix. Byaij gvaq gij rinrangz neix, dwg benq “nazmbaeklae” ndeu. Raemx daj “nazmbaeklae” baihgwnz lae roengz- daeuj, haucancan caemhcaiq liengzsisi. “Naz- mbaeklae” doiqnaj, daengq rin、rek rin、vanj rin yienghyiengh cungj miz. Byaij gvaq “nazmbaeklae”, daeuj daengz benq “reih bya”, ndawde rinrouj ndaek sang ndaek daemq, lumj gofaex、lumj duzdoengh, rim da cungj dwg. Mwngz naemj lumj go maz couh miz go maz, mwngz naemj doenghduz maz couh miz duz maz. Gwnz dingj gamj, gij raemx baez caek baez caek riengz gij rinrangz ndit roengzdaeuj, yiengj “dungdung dengdeng”, lumj vunz roq gyong laz, lumj vunz boq loxlez, gyoeb baenz gij go mwngz caengz dingq gvaq, geizheih youh rwenz.

Gij raemx gamj ndaw saw ndaej lumj gyaj nei, rongh daeng ciuq gvaqbae, luemjmyigmyig, gij ngaeuz rinrouj rinrangz ingj youq ndaw raemx, yawj ndaej vunz dava uk luenh, haenhdanq mbouj dingz. Vunz youq ndaw gamj, cij roxnyinh maz heuhguh duzfangz daeuj gaek bouxsien daeuj caux, cij roxnyinh maz heuhguh gij dieg bouxsien.

It loh yawj, it loh haenh, it loh doeksaet hix it loh dwglau, lau baenzneix gwq yawj gwq yawj lumz doxdauq, lau baenzneix gwq byaij gwq byaij doeklaeng ra mbouj ndaej raen gij roen okbae lo……

Byaij ok bakgamj, naj da ronghcagcag, cuengq da yawj bae, reihnaz benq rangh benq, ranzlaeuz aen nem aen, goengloh diuz daep diuz. Ndaw mbanj oenq dajcawj gozngveungveu biu hwnj mbwn bae, sing bitgaeq heuh, sing mou yiengz swenj, seizneix mwngz cij roxnyinh youh dauq daengz gwnzbiengz, cij roxnyinh haxbaenh lumj gaenq youq diegsien youzlangh nei.

Gij gingjsaek Bwzfungh Cunh gyaeundei, seizneix caengz ndaej haifat, hoeng, couh lumj aen caw nei, youq giz doekgungx hix iengj ndaej ronghsaksak.

（sat）