Banhaet daengz hagdangz, gou youq ndaw bangunghsiz gaij cozyez, banhcangj daiq song boux doengzhag daeuj ra gou. Gou ngiengxgyaeuj yawj gvaqbae, boux he raemxda lij hoij bangx bwnda ndongqliklik, boux he baij ok gij yiengh gig mbouj fugheiq dem.

Gou cuengq gonj bithoengz roengzdaeuj, ngenggyaeuj naihsim dwk cam:“Guh maz la?” Gou fatyienh gyoengq hagseng doeg daengz sam nienzgaep, gij beizheiq hix gaendwk yied daeuj yied hung. Daegbied dwg seizneix yaek gaujsi le ndaej cuengq- gyaj, gyoengqde cungj gig simfouz caemhcaiq ndaengj, ngoenznaengz mbouj dwg song boux neix nyangq bak, couhdwg song boux haenx doxmoeb.

“Lauxsae, gyoengqdou cingq youq cauhcangz caemz aen youzhi ‘sik mingzbaiz’, de daegdaengq aeu din daeuj laeuz gou, hawj gou deng laemx youq gwnz namh.” Boux hagseng gangj.

“Gou mbouj dwg daegdaengq, dwg de buet gvaqdaeuj bungq deng gou, gou ndwn mbouj maenh ndang ngeng couh ngad deng de.” Lingh boux hagseng doq euq naeuz.

Boux hagseng mbouj fugheiq haenx heiqhwnj fofo naeuz:“Mwngz youh aeu din dik gou.”

“Mwngz laeuz gou, gou cij dik mwngz.”

“Ndaej lo, gaej ceng lo!” Raen songde ceng ndaej naj hoengz goekrwz nding, gou sikhaek hat sing ndeu, lauheiq gij saeh iq bienqbaenz saeh hung.

“Dingh……lingh……lingh……” Dingjlingz youq seizneix, aen lingz hwnjdangz yiengj lo. “Sou dauq gyausiz bae hwnjdangz gonq, ciet laeng roengzdangz caiq daeuj ban- gunghsiz gangj.” Aen lingz neix yiengj ndaej caen gibseiz, cingqndei gou hix siengj hawj songde dingh roengzdaeuj ngeixngeix. Gangj dwk, gou dawz sawson yijvwnz byaij coh gyausiz bae.

Ngoenzneix ngamq hwnj daengz goq daihcib’it, yaep he aeu hag cih moq. Mbehai sawson, yawj dwk gij cih moq gou yaek son, ndawsim sikhaek miz aen cawjeiq ndei lo.

Bonjlaiz doeg daengz sam nienz- gaep, gij cih moq mbouj aeu gangj ndaej baenzneix ciengzsaeq, hoeng dangz goq neix gou aeu saeqsim bae gangj. Bien govwnz neix miz “枚、邮、爽、柿、菠、萝、粮、杨” 8 aen cih moq, Gou hawj gyoengq hagseng doeg gij yaem cih moq sug le, couh son gyoengqde baenzlawz sij. Gou daj cih “枚” son hwnj, hawj gyoengqde yawj coh cih ‘枚’, cam:“Sij cih ‘枚’ seiz, raeuz aeu daegbied haeujsim maz ne?” Vah baez gangj sat, doq miz hagseng yaengx fwngz hwnjdaeuj dap:“Lauxsae, sij cih neix seiz, baihswix ‘木’ aen bitveh ceiq doeklaeng aeu suk haeujbae di.” Gou hawj de naengh roengz, haenh naeuz:“Da mwngz raeh raeuh!”

Raen miz haujlai hagseng gaendwk ngaekgyaeuj dwddwd, gou hawj gyoengqde ra lij miz aen cih moq lawz hix miz gij bitveh caeuq cih “枚”doxdoengz， aeu miz di bienq. Mbouj geij nanz, gyoengq hagseng couh faenfaen ra ok cih “柿” “粮” caeuq cih “杨”. Ra ok geij aen cih neix le, gou youh cam:“Vihmaz sij geij aen cih moq neix aeu miz gij bitveh aeu bienq, byawz lij ndaejgeiq ne?” Gou menhmenh lox gyoengq hagseng dauqngeix hwnj gij cihsiz doenghbaez gou son gvaq.

Cijraen gyoengq hagseng mwngz yawj gou, gou ngonz de, miz boux hagseng sing daemq yaebyaeb naeuz:“Lauxsae naeuz bienq couh aeu bienq!” Ai! Yawj daeuj gij cihsiz son gvaq haenx aeu ciengz dawz okdaeuj gangj cij ndaej, mboujnex lumj gij haeux sou ma mbouj ndaej dak rox fatmwt hwnj bwn nei.

Gou dawz cih “枚” daeuj guh laeh, youq gwnz bwzbanj son hagseng sij. Gou youq ndaw denzswjgwz sij song aen “枚”, aen he bitveh miz bienq, aen he mbouj bienq. Gou cam:“Song aen cih neix miz maz mbouj doxdoengz? Langh mbouj doxdoengz youh vihmaz baenzneix sij?” Gou raen lwghag mbouj fugheiq ngamq daj ndaw bangunghsiz ma yaengx fwngz ndaej gig sang, couh heuh de hwnjdaeuj gangj.

De ndwn hwnjdaeuj miz saek miz yiengh dwk gangj:“Gou nyinhnaeuz aen cih daih’it mbouj ndeiyawj, baih- swix ‘木’ caeuq baihgvaz ‘攵’ sij ndaej hung doxdoengz, yawj hwnjbae lumj song aen cih. Langh gangj dwg aen cih he youh ‘biz’ lai lo. Aen cih daihngeih sij ndaej ndei, baihswix ‘木’ bit doeklaeng sij baenz ‘丶’, suk haeujbae nyiengh dieg hawj baihgvaz ‘攵’, aen cih “枚” yawj hwnjbae song mbiengj guhdoih, mbouj gaex ndaej ndaet, cibfaen ndeiyawj.”

“Mwngz gangj ndaej ndei!” Dingq de gangj sat, song fwngz gou “ba ba” bek hwnjdaeuj, ciepdwk gangj:“Bingzseiz raeuz muengh sij cih ndaej youh cingq youh ndeiyawj, cawz aeu menhmenh sij, lij aeu haeujsim yawjyawj aen cih neix miz di bitveh aeu nyiengh dieg okdaeuj, baenzneix aen cih sij okdaeuj couh doxgiet baenz aen cingjdaej, mbouj rox aenvih miz gij bitveh suk di couh gig mbouj gyaeundei! Caezgya rox lwi?” Boux lwghag haenx dingq le, ngaekgyaeuj dwddwd dwk naengh roengzdaeuj.

Gou swnh bak gangj roengzbae:“Bingzseiz caeuq doengzhag guhdoih guhcaemz roxnaeuz hagsib seiz, hix aeu lumj gij cih neix doxdoengz, aeu rox doxbang doxnyiengh caemhcaiq doxndei doxhuz. Caezgya hag sij cih, hix aeu hag guh vunz.”

Roengzdangz le, gou youh cingj song boux hagseng haxbaenh banh- cangj daiq daeuj haeuj bangunghsiz gangj vah. Gou gangj:“Dangz goq son sij cih, sou rox lauxsae yaek gangj maz lo. Lauxsae mbouj bihbingz byawz. Cij dwg aiq sou doxbungq seiz, miz boux he naeuz doiq mbouj hwnj roxnaeuz doxrag fwngz caez hwnjdaeuj, couh mbouj rox fatseng gij doxceng caeuq doxmoeb lo!” Songde dingq le naj- mong ndaej ngaemgyaeuj roengzdaeuj, hoeng gij da laeglemx doxnyeux, sawqmwh riu hwnjdaeuj.

Dang lauxsae baenzlai bi lo, baez daih’it aeu gij cih moq daeuj son hagseng gaej doxceng doxmoeb. Sijsaeq ngeix le ngeix, mboujguenj son maz, youq ndaw sonhag bae dazyinx hagseng roxsoq, gou nyinhnaeuz neix cij dwg gij cozyung hungmbwk laux- sae.