Mengnaezhwng Ginhcouh namh- niu daegbied, cienzbouh hongfwngz guh, dangzhong gyaqciq, aenmeng bienqvaq lai yiengh, youq yisuz dajcang baihneix yungh fap gaekdeu cienzdoengj, lizsij vwnzva daejrom nanwt, miz gij dijndaej saedyungh、dijndaej yawjngonz caeuq dijndaej souyo gig ndei haenx. Bi 2008 dinfwngz oenqguh aenmeng (dinfwngz oenqguh mengnaezhwng Ginhcouh) ndaej lied haeuj buek daihngeih guekgya gaep feihvuzciz vwnzva yizcanj mingzloeg.

Dinfwngz oenqguh mengnaez- hwng Ginhcouh dwg dinfwngz dangzhong fwngzguh cienzdoengj ranghdieg Ginhcouh Si. Ciuq Ginh- yen yenci geiq naeuz, aenmeng nyuenz dwg aennaez, “hwng” couh dwg gij eiqsei haengjgyaez seizhwng, “naezhwng” song cih gyoeb hwnj- daeuj, eiqsei de couh dwg gij aennaez Ginhcouh vunz gwnzbiengz haengj- gyaez. Mengnaezhwng Ginhcouh cungj dinfwngz ndawbiengz cienz- doengj neix, gaenq miz 1300 lai bi lizsij, caeuq mengsa’gyaemq Yiz- hingh Gyanghsuh、aenmeng Gensuij Yinznanz、aenmeng Yungzcangh Cungzging bingzbaiz heuhguh “seiq cungj aenmeng mizmingz Cungguek”. Dinfwngz guh aenmeng miz cungj gangjfap “it oenq ngeih namh sam baenjguh” neix, oenqcoemh dwg hothoh ceiq youqgaenj. Guh meng- naezhwng miz aeu namh、dub namh、baenjguh aennaez、baenzaen、cingj- coih aennaez、raemhdak、niemhyawj aennaez、dajcang、oenqcoemh、niemhsouh aenmeng、muzlwenq doenghgij hongh neix. Mengnaezhwng Ginhcouh cawz miz caez gij daeg- diemj aenmeng mizmingz wnq le, lij gag miz gij daegdiemj bonjfaenh: It dwg aeu gij naezhau naezgyaemq baihdoeng baihsae song hamq Dah- ginhcouh guh yienzliuh, naez hamq- doeng(naezhau) guh noh, naez hamqsae(naezgyaemq) guh ndok, ciuq beijlaeh doxgyaux ndei, hawj noh ndok doxdaemx cij suenq aen ndei; ngeih dwg dinfwngz gaekdeu dienz- bouj caeuq gij aenmeng wnq mbouj doengz, mengnaezhwng Ginhcouh naezniu daegbied, namh saed saeq- naeh, seizbienh baenjbet, canghguh- meng ndaej cigciep youq gwnz aennaez gaekdeu hotsei roxnaeuz veh dozveh, aeu gij fuengfap doeddeu、bingzdeu、sienqdeu、gyoengdeu daengj, gaekdeu baenz soujsei, fukveh bya raemx va roeg daengj ndeiyawj, gig miz gij funggek begmiuz veh Cungguek, daj ndaw daengz rog sanq fat ok saekyiengh cienzdoengj deihfueng noengznwd; sam dwg yisuz “yiuzbienq” mengnaezhwng Ginhcouh youq hangz guhmeng ndaw guek raeuz caenh miz faenh dog, yisuz dijyawj de gig sang. Mengnaezhwng aenvih gij namh de daiq miz liuhsaek, youq mwh baenjguh mbouj demgya gij liuhsaek aenmeng wnq, aennaez youq oenqcoemh seiz dohndat caeuq diegheiq bienqvaq mbouj doengz, cix fatseng yiengh “yiuzbienq”, okyiuz muz lwenq gvet nyaq le, couh okyienh gij saek caeuq rizraiz ronghlwenq haenx, lumjbaenz doengzgeq、raiz- mbwn、heudiet、fwjgyaemq、raizguk daengj rizraiz gagbaenz, cingqcaen dwg “ndaw feiz gouz bauj, nanz ndaej aen ndeu, ndaej aen haeuj fwngz, mbouj miz aen doengz” ha. Meng- naezhwng Ginhcouh aen cingqmaek de namh genq saeqnaeh、gij sing genqgywt、ndongjndat gietsaed, sing ndaekroq sekbyot, caeuq gij sing roq ngoemxcaem cungj meng wnq mbouj doengz.

Mengnaezhwng Ginhcouh gai doh ndaw guek gak dieg caeuq Gangj Au Daiz doenghdieg neix, caemh gai bae daengz Dunghnanzya、Ouh Meij daengj 30 lai aen guekgya dem, gij aenmeng ndei ciuqgonq couh miz 20 lai aen guekgya gaep bozvuzgvanj souyo. Ciuq gyoepsuenq mbouj caez, mengnaezhwng Ginhcouh aeu gij lizsij gyaenanz、dangzhong gaeuqgeq、yisuzsing sangvid de, gyawj bak bi daeuj youq gak aen gozci caeuq guekgya gaep hoihbaijlangh gwnzde gonqlaeng aeundaej 60 lai hangh daihciengj, ndawde bi 1915 doiq bingz bya raemx va roeg meng- naezhwng Ginhcouh soengq bae camgya aen Bahnazmaj Seiqgyaiq Bozlanjvei youq Meijgoz Giuginhsanh banh haenx dued ndaej gim- baizciengj, dwg Cungguek guh aenmeng lizsij gwnzde baez daih’it dued ndaej seiqgyaiq gaep gim- ciengj.