Vah bouxbien：Bineix, bause caeuq Yiz Ciz、Yinj Fuzgen、Cungh Hihcwngh、Luz Yuzgangh、Lingz Siuyangh 5 boux canghraiz Sawcuengh ciemdingh, aeu gyoengqde raiz faenzcieng ndei hawj bause, bause daegdaengq aeu aen banj neix daeuj daeng gij faenzcieng gyoengqde. Haj boux canghraiz neix raiz faenzcieng Sawcuengh seizgan nanz lo, miz haujlai faenzcieng ndaej gak gaep ciengj gvaq.

Bause caeuq canghraiz Sawcuengh ciemdingh dwg baez daih- it, lij miz haujlai canghraiz Sawcuengh caengz ciem, ngoenzlaeng lij aeu demlai ciem. Muengh gyoengq bouxraiz doengzcaez roengzrengz, aiq doeklaeng mwngz hix dwg boux canghraiz Sawcuengh ciemdingh ne!

Lauheiq mwngz mbouj saenq gwnzbiengz miz gij raemx baenzneix gyaeundei, miz gij gamj baenzneix geizheih, hoeng gou saenq mwngz itdingh youq ndaw fangzhwnz loq gvaq saenzvah caeuq yienhsaed doxgyauz, riuzgangj caeuq bouxsien gangjgoj. Bingzgoj Yen Fungvuz Cin Bwzfungh Cunh dwg aen mbanj gingjsaek gyaeundei lumj diegsien, byaij haeuj ndaw lumj fangzhwnz. Daengx cunh miz gamj hung gamj iq geij bak aen, ndawde Gamjrongh、Gamjlaep caeuq Gamjfangz ceiq miz daegsaek.

Gamjrongh

光岩

Gadah Bingzcihoz itloh ciengqgo lae bae coh baihdoeng, lae daengz Gamjrongh——aen dou hung baihsae Bwzfungh, Gamjrongh dwg aen gingj- saek daegbied Bwzfungh ndeu. Cien fanh bi gaxgonq, miz goengq bya hungmbwk ndeu dangj gij roen gadah Bingzcihoz, raemxdah lae daengz gizneix baenqcienq mbouj caiq bae naj, cij ndaej baez di baez di daj laj dinbya iemq okbae. Bi doek bi, daih gvaq daih, raemxdah “mbongq” dinbya ndaej aen congh iq lo. Youh mbouj rox gvaqbae geijlai bi, raemxdah daj aen congh iq neix lae bae naj, cung ndaej yied daeuj yied gvangq, couh bienqbaenz aen giuzrin hungmbwk ndeu. Giuzrin sang 50 lai mij, gvangq 100 lai mij, youq gyae yawj bae, lumj aen dou mbwn nei. Aenvih aen gamj neix baihnaj baihlaeng cungj doxdoeng, rongh- sagsag, vunz dangdieg couh heuh aen gamj neix guh Gamjrongh.

Hix miz goj riuznaeuz, gaxgonq goengvuengz Cinzswn cawqleix Dah- raemxhoengz seiz gvaq Bwzfungh Cunh, raen vaengz raemx ndeu deng goengq bya hung dangj, raemx yied comz yied lai, yawj lumj yaek dumh gij reihnaz、gij ranzmbanj Bwzfungh bae lo. De simgip raixcaix, gingz hwnj fag yangj gwnz fwngz, sing hung hat baez ndeu, coh daej din goengq bya hung neix faeg bae. Yaep he, goengq bya hung neix dek ok aen congh van lumj duzdoengz he nei, raemxdah couh “cucu caca” coh baihnaj lae bae lo. Daj baezhaenx hwnj, raemxdah gaenq mbouj caiq youq gizneix comz youq, Bwzfungh Cunh hix mbouj lau deng raemx dumh lo. Aen congh haenx yied daeuj yied gvangq, couh bienqbaenz aen gamj ngoenzneix dou raen lo.

Raemxdah caeuq goengloh doengz bingz ndonj gvaq laj gamj daeuj, raemxdah youq laj gamj lumj boux diuqfoux nei yat gvaq gwnz fai daeuj, bienqbaenz raemxdiuqdan, hau lumj nae nei, sing raemx lae yiengj- humhum, raemx naed sinbyoenbyoen, byawz raen cungj roxnyinh doeksaet.

Raemxdiuqdan baihlaj dwg aen vaengz hung ndeu, raemx lae daengz gizneix couh mbouj caiq ok sing, caemrwgrwg dwk ninz youq ndaw vaengz, giz raemx feuh sawdikdik ndaej yawjraen daej, giz raemx laeg heunaunau lumj aen mbwn lamz. Bya hung bya iq youq ndaw raemx youz bae youz dauq, cwxcaih caemhcaiq angqyangz.

Aen vaengz raemx neix dwg gizdieg ndei cuengq set. Vaengz raemx seiqhenz ndoeng laepngaungau, faex mwnbaenz, rumz liengz cifefe, hoeng- heiq singjsaksak, youq gizhaenx couh roxnyinh sim hai saenz langh, bwt onj uk cingh, hawj vunz lumz ma lumz dauq.

Bi daengz seizhah, bouxyouz baenz bang baenz gyoengq doxciuz aemq gij doxgaiq gwn caemhcaiq daiq gij doxgaiq daenj daeuj daengz laj Gamjrongh capyouq. Banngoenz benz- benz bya, gipgip vacwx, mbaetmbaet makndoeng, epep bya, lienhlienh go, youzyouz raemx; banhaemh geqgeq ndaundeiq, yawjyawj ronghndwen, caemzcaemz ronghrib. Haeuj hwnz dingqdingq sing raemx lae haeuj ninz, riengz sing roeg guh fangzhwnz. Seizneix, ra mbouj raen nyapnyuk, ra mbouj raen siengsim, gij sing hemqcaengcaeng gaenq yied bae yied gyae, gij sing doxceng doxndaq gaenq mbouj caiq youq byairwz heuxgeuj, cij miz cwxcaih caeuq caemrwg dox- buenx.

Gamjlaep

黑岩

Daj Gamjrongh riengz goengloh caeuq raemxdah byaij bae miz saek song goengleix, raemxdah giz satbyai couhdwg aen dou baihdoenghnamz Bwzfungh——Gamjlaep.

Gizneix gingjsaek engq daegbied, gojgaeq engq maez vunz. Raemxdah lae haeuj Gamjlaep bae, caiq hix mbouj lae gvaq gizlawz bae lo, dingqgangj raemxdah dwg lae gvaq gyang bya lae haeuj Dahraemxhoengz bae.

Gamjlaep dwg geij goengq bya comz youq giz he, ndawde dek ok aen gamj ndeu. Gaxgonq bak gamj baihsae dwg aen congh iq he, hung lumj aen bakdou ranz nei, vunz daj gizneix haeuj gamj bae. Baihndaw dat hau roen iq, yamq din caiq mbaeu, hix sing yiengj coeg rwz. Lij miz rinrouj ndaek vang ndaek daengj, gak siengq gak yiengh, ndeiyawj raixcaix, ndawde miz “daemz sien caemxndang” “laz gimngaenz” caeuq “rin vaiz riz” sam cungj gingj dem, gij gojgaeq riuzcienz daengz seizneix.

“Daemz sien caemxndang” dwg ndaw gamj miz ngomx raemx sawdik- dik he, ngomx raemx cungqgyang miz aen daiz rin he, gwnz daiz ninz miz ndaek rin lumj dah sau he, lwgda、aenndaeng、doiqrwz、 aenbak cungj miz caez, aenndang giz gumh giz moj cingcing cujcuj, lumj lix nei. Raemxsaw heux ndang de laeriri, lumj ninz ndaej gig ndaek, cingq fangzhwnz nei, mbouj sing mbouj yiengj……

Riuznaeuz dah sien neix dwg dahlwg vuengzdaeq gwnzmbwn, ngoenz he de daengz lajbiengz daeuj guhcaemz, raen Gamjlaep ndei lai, couh mbouj siengj caiq dauqbae gwnzmbwn. Seizneix bakdou baih- doeng Gamjlaep lij miz ndaek rin lumj duzmax he nei, doiqnaj duzmax miz gaiq rinrangz he, vunz dangdieg heuh gaiq rinrangz guh “rin lamh max”. Riuznaeuz duzmax neix dwg dahsien naengh daeuj, de raen dahsien mbouj dauqbae, couh bienqbaenz ndaek rin ciengxlwenx buenx youq henz ndang bouxcawj. Vangz Gvei dwg Cinghdai bouxvunz roxsaw he, de daengz Gamjlaep daeuj youz, gyaez gij gingj lengj, couh youq gwnz rin gaek roengz hot sei neix:

Gingjsaek gyang bya mbwn caux baenz,

Youz daengz Gamjlaep caen geizheih,

Daemz sien caemxndang lai siengjngeix,

Seiz raen roen goz caih doxdoeng.

山川奇景本天工，

览至黑岩便不同。

仙子浴池堪想象，

还欣曲径任中通。

（caengz sat）