Bya mbouj sang,

Raemx mbouj laeg.

Yaenq hung、baet sien、maeg- yienh baij faenmingz,

Dahraemxsae song mbiengj ok vunzcaiz.

Gwnz daiz guenyaem gingq ciuq iu.

Bingmbwn ciengqmbwn rumz byaj gingj,

Geizbing geizlingh yinx gvaq sae.

Sei baihgwnz neix veh ok gij gingjsaek Seiqdaemz geizheih lo. Song coenz hainduj gangj Seiqdaemz bya mbouj sang, raemx mbouj laeg. Hoeng, vunzciuhgonq gangj “bya mbouj yawj sang, miz sien okmingz; raemx mbouj ciuq laeg, miz lungz couh lingz”.

Coenz daihsam “yaenq hung” dwg naeuz youq goengq bya dog baihswix Mbanjdagaeuq, aenvih goengq bya neix lumj aen yaenq hung he. Coh Yinsanh Cunh couhdwg aenvih goengq bya neix daeuj an ne. “Baet sien” dwg naeuz goengq bya Gveiyinzfungh. Riuznaeuz baet sien caeuq yaek gim couh yo youq gwnz Gveiyinzfungh ndaw Conghdoeng- mbwn. “Maegyienh”dwg aen mboq lingz doeng mbwn Gumzva, aen mboq neix caengz fung raemx hwnj seiz miz cungj rumhoengz maj youq ndaw dinghboengz luenz he, ndigah yawj hwnjbae lumj maegyienh.

“Dahraemxsae” dwg naeuz diuz dah daj Vujmingz Yen baihsae itcig lae coh Bingzgoj Yen, gaenlaeng lae roengz Dahlaigyangh.

“Gwnz daiz guenyaem gingq ciuq iu” dwg naeuz Mbanjgumzva raeb- laeng baihgvaz miz aen dat hau he， bingz lumj aen gingq, gyoengqvunz naeuz aen gingq baenzlai hung haengj dwg guenyaem dawz daeuj ciuq iu- gvaiq, hawj iu’gvaiq yienh ndang caiq gaemh.

“Geizbing geizlingh” dwg naeuz Lungzbanz Cunh Mbanjbyageiz baih- doeng miz song goengq bya, miz goengq he hung, miz goengq he iq, gij yiengh lumj mienh geizbing caeuq mienh geizlingh.

Riuznaeuz nyawhdaeq gwnz- mbwn baij song bang bing mbwn roengz lajbiengz bae baihsae cawz iu- gvaiq, bang he gvaq mboek, bang he gvaq raemx. Ciengqgun diemj bing hwnj ruz seiz nyawhdaeq soengq hawj aen yaenq hung he、ci baet sien he、aen maegyienh he, vanzlij hawj haujlai ngaenz dem. Nyawhdaeq vih re gij ciengqgun dam caiz, daegdaengq veh Dahraemxsae gek gyang, dawz baet sien caeuq yaek gim yo youq ndaw Conghdoengmbwn, dawz gij doxgaiq wnq cuengq youq dah baihswix. Hawj Dahraemxsae baihgvaz song gyaeuj senj vunz daeuj guenj. Ndigah, ndaw sei miz “Dahraemxsae song mbiengj ok cinghyingh” coenz neix lo. Coenz neix miz di lingz. Seiz sat Cingciuz, Lungzbanz Cunh Mbanjbogaeuq miz boux coh heuhguh Cangh Sanhyez, seizde de dang cungjduh, guenj Guengjdoeng、Guengjsae caeuq Yinz- nanz. Daengz seizneix aen dieg neix lij miz vunz ndaej guh guen hung.

Hoeng, gij ngaenz hawj gun yungh youq gyawz ne? Daengz seizneix lij caengz ra ndaej gij riz. Beksingq ciengz naeuz “bak yamq gouj gumz ndaw faex gouj fanh, haenz doiq haenz cib fanh ik lingz bet cien fanh”, gaengawq gij vah neix bae ra, gij ngaenz hawj gun yungh dwg gij namhyouzhau daj Byasuijdaz daengz Mbanjbyageiz. Gij namhyouzhau mbouj bingzciengz, gaxgonq lij miz lauxbanj Guengjdoeng daeuj damq gvaq, naemj youq gizneix guh aen cangjswzconh he.

Anhbangh Cunh Mbanjfuzcai bangx dah miz goengq bya he, youq gyawj roxnaeuz gyae yawj cungj lumj boux ciengqgun he cingq cijveih cien fanh bing caeuq max hwnj ruz. Seizneix gij ruz bienqbaenz gij dieg Mbanjhozcwz、Mbanjdaemzhaz caeuq Mbanjdagaeuq. Seizneix gij coh sam dieg vanzlij aeu gak giz aen ruz daeuj guh coh.

Riuznaeuz ciengqgun nyaengq diemj bing hwnj ruz seiz, lajfwngz de bauq naeuz nyawhdaeq cij soengq yaenq hung hoeng mbouj raen baet sien caeuq yaek gim. Ciengqgun baez dingq doq cienz lingh roengzbae heuh vunz bae caz aen saeh neix. Seizneix youq Mbanjdagaeuq dingjlaeuz yawj coh baihsae, gij bya lumj bingmbwn ciengqmbwn nei bouxboux ngengq rwz coh baihdoeng cienz lingh. Daegbied bungz daengz fwn doek gvaq mbwn ronghsaksak seiz yawj, engqgya lumj. Caezgya riu naeuz danghnaeuz seizde ciengqgun mbouj cienz lingh, lauheiq Seiqdaemz couh mbouj miz gij gingjsaek geizheih neix lo.

Caemhcaiq riuznaeuz nyawhdaeq baij bing bae baihsae cawz iugvaiq, roen mbouj ndei byaij, de couh veh mbat bit he baenz Dahraemxsae, hawj bingmbwn ciengqmbwn naengh ruz bae. Youq guek raeuz raemxdah ciengzseiz lae coh baihdoeng, hoeng, gij raemxdah neix lae coh baihsae bw! Caemhcaiq aenvih nyawhdaeq soengq maegyienh caeuq baet sien, yungh sat aeu yungh raemx lingz gwnzmbwn bae swiq, mbouj ndaej yungh raemx lajbiengz, ndigah de veh dah seiz, youq Dahraemxsae caeuq gij meg raemx lingz gwnzmbwn doxgap gizde dwk mbat bit naek he, megraemx lingz mbwn byoengq ok comz baenz “Mboqlingzmbwn”.