Cam:

Gijmaz youq byai lag,

Lumj duz nag ndaeng nding?

Gijmaz youq gwnz rin,

Lumj duzlingz gyaeujmbangq?

Dap:

Lwghaemz youq byai lag,

Lumj duz nag ndaeng nding;

Lwggva youq gwnz rin,

Lumj duzlingz gyaeujmbangq.

Cam:

Gijmaz ndaemndaetndaet,

Lumj maet mbouj miz mbei?

Gijmaz henjreirei,

Lumj reiz mbouj miz fwed?

Dap:

Lwgraz ndaemndaetndaet,

Lumj maet mbouj miz mbei;

Haeuxfiengj henjreirei,

Lumj reiz mbouj miz fwed.

Cam:

Gijmaz gwed bae doengh,

Bak coengh naj dauq laeng?

Gijmaz gwed daeuj daengz,

Bak gungjgaengz bae gonq?

Dap:

Faggvak gwed bae doengh,

Bak coengh naj dauq laeng;

Noegcae gwed daeuj daengz,

Bak gungjgaengz bae gonq.

Cam:

Gijmaz youq gwnzmbwn,

Haeuj hwnz couh bae ndoj;

Banhaet okdaeuj moq,

Doq bin hwnj baihdoeng?

Dap:

Daengngoenz youq gwnzmbwn,

Haeuj hwnz couh bae ndoj;

Banhaet okdaeuj moq,

Doq bin hwnj baihdoeng.

Cam:

Gijmaz lumj gaeunyangj,

Rangh gvaq gak mbaenq bae?

Gijmaz lumj ga lae,

Gaq bae raezrangrang?

Dap:

Densen lumj gaeunyangj,

Rangh gvaq gak mbaenq bae,

Dietloh lumj galae,

Gaq bae raezrangrang.