Ngoenzde mbwn rongh, gou dawz moeg bae dingjranz dak, Baeuqbet naengh youq gwnz eijloek youq bakdou ranz de vad fwngz coh gou.

“Daeuj ranz gou naenghnaengh vei!” De riunyumnyum dwk doiq gou naeuz.

“W! Gou dak moeg ndei gonq, yaep he couh bae ra mwngz.” Gou han.

Baeuqbet bineix ndaej 65 bi, deng gyad gaenq ndaej 5 bi lo. Vunzlai naeuz, de dwg guh hong baeg lai ngaiz. De gaenx raixcaix, mbouj sij yietnaiq saek yaep. Miz ngoenz ndeu bae doenghnaz guh hong, laemx youq haenznaz. Soengq bae yihyen, canghyw genjcaz naeuz ndaw uk lwed conh roenx, yw ndaej mboengq ndeu mbouj raen ndei, baenzneix couh deng gyad lo. Baeuqbet hozraez hozswnh, maij riu, caeuq byawz cungj doxndei. Gou lij iq ciengzseiz riengz de haeuj ndoeng langh vaiz. Banhaemh, danghnaeuz duzvaiz ranz gou deuz haeuj ndaw ndoenglaeg bae mbouj ngah okdaeuj, gou lij iq mbouj gamj haeujbae laeh vaiz, Baeuqbet couh simndei bang gou laeh duzvaiz ok rog daeuj. Baezbaez saz maenz roxnaeuz saz haeuxdaeq, de cungj ce gaiq ndei hawj gyoengq lwgnyez dou gwn. Gou gig gyo’mbaiq de.

Dak moeg ndei le, gou couh bae ranz de caeuq de gangjgoj. Baeuqbet goetgangq hung ndang maengh, aen eijloek de miz di iq. Gou ungj de okrog dak ndit, de angqfwngfwng dangq- maz.

Bi’gyai gou dauqranz geij ngoenz. Ngoenz daihngeih gou yaek byag mbanjranz okrog, gyangngoenz gou raen de youq gwnz canz dak ndit, gou couh hwnjbae caeuq de dajcux, de gig angqyangz. Aiq vunz ndaw ranz de bae ganq de caeuq de gangj vah lai, vunz ndaw mbanj siuj bae yawj de. Song dou dajcux ndaej nanzraeuh. De daj ndaw daeh buh gaem aen biujgau ndeu okdaeuj, raemxda doekfoegfoeg naeuz:“Mwngz lij geiq ndaej lwi, aen biuj neix dwg mwhgonq mwngz cawx hawj gou bw!”

Aen biuj neix dwg mwhgonq gou bae haw cawx ndaej, mbouj bengz. Seizde, Baeuqbet naeuz aenbiuj de vaih lo, langh vaiz cungj mbouj rox seizlawz laeh vaiz dauqranz cingq hab. De seizbienh baez naeuz, hoeng gou roxgeiq. Seizde gou lij doeg cuhcungh, rom ndaej 10 maenz ngaenz cawx aen biuj neix soengq hawj de, gyo’mbaiq de geij bi daeuj bang gou baenzlai. Haujlai bi gvaqbae lo, denciz aen biuj neix gaenq liux lo, fagcim mbouj byaij lo. Baeuqbet lij ce youq henz ndang, ndawsim gou raeujrub dangqmaz. Gou caeuq Baeuqbet caemdingh dwk naengh dak ndit, ngeixdauq ndwenngoenz gaxgonq duh dou, miz seizangq caeuq seizdoeknaiq, miz seizvan hix miz seizin. Ndwenngoenz deng namhfok goemq haujlai doxgaiq bae. Hoeng, cijaeu dou nyienh baenq ndang bae cimhra, doenghgij raeujrub couh rox daj ndawsim dou diuq okdaeuj, gij feih caeuq fajnaj sug haenx couh rox ndaetndet got dou. Mizseiz, bungz vunzsug, ngeixdauq gaxgonq gij saeh doengz guh, mboujguenj geijlai bi caengz raen, ndawsim hix raeujrub.

Yaek dauqma seiz, vunz ndaw ranz Baeuqbet gaem geij aen makgam hawj gou, gou dawz aen he mbiq naengmak henjrwg bae, ndit ndongq ciuq daeuj, gou caeuq Baeuqbet caemh gwn aen makgam vanyetyet neix. Baeuqbet fwt raemxda lae roengzdaeuj, gou rox de mbouj dwg aenvih gij feih makgam daej.