Bouxcuengh raeuz daj ciuhgeq daeuj couh miz gwn haemz souh hoj、gaenx guh mbaet yungh、haengj bang bouxwnq doenghgij conzdungj ndei. Mboujguenj mwngz daj vahsug、fwen roxnaeuz gojgeq Bouxcuengh cungj ra ndaej raen gij riz neix. Lumj “gyaez vunz gyaez seiz hoj, coh vunz coh seiz nanh” coenz vahsug neix couhdwg gangj vunz miz hoj miz nanh seiz yaek rox bae bang; lumj“boux bang boux couh ndei, boux gyaez boux couh baenz; vah ndei dangq liengx ngaenz, doxhuz baenz it gya” hot sei neix dwg gangj doxbang doxhuz gig youqgaenj. Aen gojgaeq gou yaek gangj couhdwg gvendaengz vunz ciuhgeq Bouxcuengh baenzlawz bae bang vunz.

Gaxgonq, miz boux goenglaux ndeu, simndei dangqmaz, bingzciengz haengj bang vunz. Hoeng de bang vunz, youh mbouj siengj hawj vunz saetnaj. Bi daengz gyaeuj rom miz di cienzngaenz, ranz lawz mbouj miz haeux gwn, ranz lawz ranz vaih lo, de couh bae bang.

Ndaw ranz goenglaux ciengx miz duzlingz ndeu, ndaejhoengq seiz goenglaux couh son duzlingz, vunzlai raen cungj roxnyinh goenglaux caeuq duzlingz guhcaemz dem. Ngoenz bae ngoenz dauq, goenglaux caeuq duzlingz de ciengx cungj doxliz mbouj ndaej lo. Goenglaux baez gingz fwngz baez yaepda, duzlingz couh gvaileuleu diuq haeuj ndaw loz bae.

Moix bi daengz ndwenseiq ndwenngux, donq haet gwn le mbouj miz donq haemh seiz, couh miz haujlai vunz daeuj ranz goenglaux ciq haeux. Caih byawz daeuj ciq, goenglaux cungj hawj caemhcaiq mbouj dwen aeu saek di co caeuq seizlawz boiz. Vunz daeuj boiz haeux seiz, goenglaux baez iet fwngz, duzlingz couh diuq haeuj ndaw loz caeuq haeux caez caengh, baenzlawz boenq de cungj mbouj deuz.

Boux daeuj boiz haeux naeuz:“Goenglaux, mwngz caengh duzlingz miz geijlai naek, dou couh caiq boiz geijlai haeux hawj mwngz.”

Goenglaux simndei naeuz:“Duz- lingz miz geijlai naek ne, couh song gaem haeux, suenq lo.” Baenzneix, boux ciq haeux haenx youh lw ndaej geij gaen haeux maranz cawj gwn.

Ngoenz doek ngoenz, bi gvaq bi, goenglaux gvaqciuh lo. Hoeng, vunz- mbanj cungj geiq de youq ndawsim, caemhcaiq gij fungheiq doxhuz dox- bang cungj hwng youq ndaw mbanj.

Lwnz daengz daeglan goenglaux danggya lo, de hix swnjciep ndaej gij yiengh goeng de.

Bi ndeu, daeglan goenglaux bae ndaw gingsingz camgya vujgawj, baihnaj de gaenq miz haujlai vunz cungj gauj mbouj gvaq, aenvih aen gung gaujsi geng lai lo, mboujguenj baenzlawz roengzrengz, aen gung cungj beng mbouj hwnj, aen naq hix couh nyingz mbouj okbae.

Daengz daeglan goenglaux lo, de caeuq gyoengq gaujseng gauj gvaq haenx doxdoengz, baez daih’it mbouj- guenj baenzlawz roengzrengz beng, aen gung cungj beng mbouj hwnj, baez daihngeih caiq gya rengz beng hix mbouj ndaej. Baez daihsam de sup gaemz heiq hung baez capmax, yunghrengz beng, “fu” sing ndeu, diuz naq cingqcingq cap haeuj aen bek cungqgyang. Vunzlai raen cungj aj bak loengqloengq, fwt dopfwngz roeb- roeb. Daeglan goenglaux cunggawj lo!

Doeklaeng, miz vunz bae gawj- bauq naeuz gauj nyingz naq seiz, daeglan goenglaux guhgyaj. Aenvih miz vunz yawjraen miz duzlingz he ndwn youq gwnz mbaq de, fwngz he gaemh baihlaeng de, fwngz he iet okbae caeuq de caez beng gung, mbouj dwg de gag beng aen gung ndwi.

Boux hak ndaw yaxmonz dingq- nyi le, sikhaek baij vunz gaemh de daeuj cam:“Miz vunz gangj mwngz gaujsi seiz guhgveij guhgvaiq, aeu duzlingz daeuj bang mwngz beng gung, dwg lwi?”

Daeglan goenglaux naeuz:“Mbouj dwg, mbouj miz maz daeuj bang gou, dwg gou gag beng gung hwnj.”

Boux hak neix youh baij vunz bae daengz ranzmbanj de bae cam vunz ndaw mbanj, cam gij yiengh daeglan goenglaux bingzciengz.

Vunz ranznden de cungj gangj de ndei. Bouxcai youh cam gij saeh goekbyai gvendaengz duzlingz, caez- gya couh lwnh hawj gyoengq bouxcai, duzlingz dwg goenglaux de ciengx, seizneix goenglaux caeuq duzlingz gaenq mbouj youq lo, goenglaux lij youq seizde, duzlingz neix vanzlij caeuq goenglaux guh haujlai saehndei ne!

Gyoengq bouxcai dingq le, lwnh hawj bouxhak, bouxhak bauq hawj vuengzdaeq. Vuengzdaeq rox ranz goenglaux simndei baenzneix, boiqfug raixcaix, ngaekgyaeuj degdeg.

Ok buengj ngoenz haenx, mingz- coh daeglan goenglaux baiz youq naj buengj boux daihdaeuz, daeglan goenglaux baenz boux vujcanghyienz, lij ndaej fung aen guen hung dem.

Bouxlaux cungj gangj, goenglaux guh saehndei, lwglan guh ndaej bae. Daengz ngoenzneix Mbanjcuengh raeuz cungj lij miz haujlai vunz lumj goenglaux caeuq daeglan de dox- doengz guh saehndei, cingq dwg gwnzbiengz vunzndei lai.