Aenhoih Baez It Daengx Guek Cwnghez Cibsam Gaiq、Aenhoih Baez It Cibsam Gaiq Daengx Guek Yinzda faenbied youq ndwen 3 ngoenz 3、ndwen 3 ngoenz 5 youq Baekging hai. Vih guh ndei bineix hong fanhoiz gij vwnzgen “song hoih”, youq seiz daengx guek gwnz laj lij angqhoh ndwencieng, gyoengq vunz Funghranz Sawcuengh Vahcuengh Cungguek Minzcuz Yijvwnz Fanhyiz Giz youq Namzningz caeuq gyoengq lauxhangz fanhoiz Sawcuengh daj Guengjsae gak dieg ciqdiuh daeuj guh hong fanhoiz Sawcuengh vwnzgen hoihhung haenx, ciuqei gij dunghcih iugouz aen cuj fanhoiz saw vah minzcuz, youq ndwen 2 ngoenz 20 bae daengz Baekging, caeuq gyoengq vunz Funghranz Sawcuengh Vahcuengh youq Baekging caeuq lauxhangz vah 6 aen minzcuz vunznoix wnq doxcaez, hainduj guh hong fanhoiz caeuq doengzsing cienz- hoiz gij vwnzgen hoihhung.

Bineix dwg bi vuenhgaiq, yicwngz aenhoih lai、 yinvu naek、seizgan raez、 yiyi hungnaek. Cawz fanhoiz gij baugau guhhong cwngfuj daengj vwnzgen le, lij gyalai gij yinvu fanhoiz gvendaengz fapguek coihcingqanq caujanq、fapgamcaz caujanq caeuq gihgou gaijgwz fueng’anq、vuenhgaiq senjgij daengj gungh 80 lai gienh、ca mbouj geijlai 33 fanh cihsaw, song hoih doengzsing cienzhoiz 14 baez、20 lai fanh cihsaw.

Yungh saw vah minzcuz vunznoix fanhoiz gij vwnzgen daengx guek “song hoih” caemhcaiq guh doengz- sing cienzhoiz, daejyienh le Dangj- cunghyangh、Gozvuyen gig yawjnaek dieg minzcuz vunznoix caeuq gvansim vunzlai minzcuz vunznoix, daejyienh le fapguek gvidingh gak minzcuz vunznoix youq ndaw guekgya cwngci saedceij miz gij gienzleih bingzdaengj yungh saw vah minzcuz bonjfaenh.

Ciuq cam rox, hoihhung sat le, Funghranz Sawcuengh Vahcuengh yaek ciuq gij doengjit anbaiz aen giz neix, vaiqdi guhsat hong saemjgauj、haeddoiq、bienbaiz caeuq yaenq bi 2018 《Gij Baugau Guhhong Cwngfuj》caeuq 《Fapguek Cunghvaz Yinzminz Gunghozgoz(Coihcingqanq)》《Fapgamcaz Cunghvaz Yinzminz Gunghozgoz》daengj bonjdanhengz nem mizgven vwnzgen gyonjbien.

(Cungguek Minzcuz Yijvwnz Fanhyiz Giz hawjgauj)