Mancuengh、aendomq baengz na nyangq maenh、gij doz daegbied、gezgou gaenjmaed、raizva gyaeundei、yienghsaek ronghlwenq, dwg cungj dinfwngz cienzdoengj beixnuengx Bouxcuengh youq bi’ndwen raez- rangh gvaq saedceij caeuq guhhong ndawde cauh okdaeuj ndeu, baenz le gij doxgaiq dijbauj vwnzva Cunghvaz minzcuz haenx. Bi 2006 ndwen 5, dinfwngz daemjguh Mancuengh ndaej Gozvuyen baecin lied haeuj buek daih’it guekgya gaep feihvuzciz vwnzva yizcanj mingzloeg.

Dinfwngz daemjguh Mancuengh baugvat le Mancuengh、aendomq daengj dinfwngz daemjbaengz siuq- seuj. Ciuq gaujguj cingqsaed mwh Ciuhhan Guengjsae gaenq miz dinfwngz daemjguh, seizde vunzcoj Bouxcuengh gaenq rox aeu gij nyinzsei doenghgo daemjbaengz nyibbuh, daengz Ciuhsung couh daemjguh baenz cungj Mancuengh “saek hausak raizva seiqcingq, gaiqbaengz nanwt yiengh ndeiyawj” ciuhnduj lo; daengz Ciuhbwzsung、Ciuhmingz、Ciuhcingh seiz, gaenq caeuq Manyinz Nanzgingh、Mansuj Cingzduh、Mansung Suhcouh bingz- baiz ndaej heuhguh seiq daih man okmingz Cungguek, Ciuhmingz lied guh cungj huqsoengq dijbauj cauz- dingz ndeu, dieg daemjguh Man- cuengh de sanqfaen youq Guengjsae Cingsih、Yinhcwngz、Binhyangz daengj dieg. Daengz Ciuhcingh satbyai seiz Minzgoz mboengq nduj, Mancuengh hainduj byaizbaih raen noix.

Mancuengh aeu maefaiq guh maedaengj, aeu maesei nonsei guh maevang, aeu aendaemjrok faex doqbaenz dangdieg yungh fwngz daemjrok guhbaenz. Fan Mancuengh ndeu, maedaengj itbuen dwg nyuenz- saek, maevang cix yungh gak cungj maesaek, gij noix miz geij cungj, gij lai miz baenz cibgeij cungj, aeu nding、henj、lamz、heu guh saekdaej, gizyawj guh saekbouj, doxboiq habngamj, saek raizva ronghlwenq, gyaeundei naekna, doiqbeij doxhuz, lengjlet cix mbouj sugrwg, gawq dwg huq dinfwngz gyaeundei, youh miz gij dij saedyungh gig sang de.

Mancuengh ginggvaq cien lai bi hwngfat le miz aen dijhi gagbaenz de, faen baenz sam daih cungjloih、ngeihcib lai aen binjcungj caeuq hajcib lai cungj dozanq, aeu nding guh raeblaeng, dakeiq gij heiqfaenh haenqrem haenx; aen heuloeg guh dakdaengh, hamz miz gij cingzdiuh simlangh; aeu henjloeg doxyungz, yienh’ok gij lengjgyaeu hawj vunz sim doengh haenx. Cienzdoengj dozanq dingzlai cungj senj aeu gij doxgaiq ndaw saedceij yawj ndaej raen roxnaeuz gij raizva siengcwngh gitleih vuenyungz haenx, daegbied dwg raizva gijhoz raen lai, lumjbaenz raizva guenghseiqcingq、raizva “《》”、raizva gvaengzraemx、raizva dujfwj、raizva “回”、raizva rizdajsan、raizva “◎” nem gak cungj dozsiengq gova go’nywj caeuq doenghduz, ndawde miz duzmbaj lienh va、duzfungh ciuz vamauxdan、song duzlungz loengh naedcaw、saeceij ringx giuz、byaleix yat doulungz daengj, daegbied dwg gij dozanq duzfungh raen miz ceiq lai. Mancuengh aeu gij raizva dozanq daegbied, saek moq lwenqda, baengz na yungh ndaej nanz, miz daegsaek minzcuz noengznwd cix youq ndaw guek rog guek okmingz.

Daemjguh Mancuengh dwg hangh hong dinfwngz mbwqmbat caiqlij fukcab ndeu, bouxdaemjrok moix ngoenz guh geij fanh baez rag rok con daeuq doxdoengz haenx. Mwh daemjguh, canghdaemjrok ciuq gij dozanq veh ndei haenx, aeu cikseujva dawz raizva seuj okdaeuj, caiq yungh diuz dem diuz faexcuk bienva caeuq maevangraeh hung bienbaiz hwnj gwnz loengzva bae, yienzhaeuh ciuq gij faexcuk bienva gwnz loengzva baez diuz baez diuz bae senjnod, doenggvaq maedaengj ragyinx, fanfoek baedauq, couh dawz gij raizva daemjsan hwnj gwnz najman bae. Mancuengh dwg dahsau Bouxcuengh doxgaiq baehaq ndawde noix mbouj ndaej, binjcungj ciengz yungh miz najdenzbeu、fandamjcongz、saiaemq、daeh’aemq、 baengzdaiz、 fandox、gaen’gyaeuj、biengok buhvaq daengj.