Vanae doekfoenfoen

Gwnz roen giet va moq

Mbwn soengq nae goenghoh

Bauq bi moq demsou

Bineix laebcin caeux

Gyaeuj bi ndei roengz naz

Bangx bo faex hai va

Vunz doek gyaj gyangdoengh

Vunz bi maeuz seizcin

Roeg yaek mbin saenq fwed

Geng naz lae hanh lwed

Fungsou gwed ndaej ma

Raeuz dwg vunz lajmbanj

Ganj hongnaz dwg daeuz

Hong naek rox hong mbaeu

Yienghyiengh aeu oksaek

Guek raeuz gyoengqvunz lai

Hai bak aeu miz haeux

Reihnaz gung gwn daeuj

Sevei raeujrubrub

Raeuz yawjnaek nungzyez

Aeu mbefat swnghcanj

Douz haeuj geijlai fanh

Cungj ndaej canh okma

Geng naz gangj gohyoz

Guenjleix goj cienzmienh

Doenghgo ndaej baujcienz

Maj fag bienqbaenz lai

Bineix cae naz caeux

Ndaem haeuxnaz cabgyau

Cingj conhgyah cijdauj

Canjlieng cauh hwnj sang

Moux canj song cien lai

Sim va hai youh langh

Yenz Lungzbingz mingz

yangz

Baihrog angq daeuj hag

Nungzyez dwg giekdaej

Daiqdoengh ndaej gak nieb

Gak hangz doq doxndiep

Guek biet ndaej hoenghhwd

Byaij sevei cujyi

Miz Cungguek daegsaek

Nungzyez dawz rap naek

Engq haeuj laeg gaijgwz

Cibsam Haj gveihva

Bineix ma youqgaenj

Haeuxsan cang rim daenx

Vunzguhnaz caenh angq

Gwnz gihgai ndaem gyaj

Doenghlaj sau saep miuz

Doenghgyang mbauq ndaem

riuz

Caemhcaez riu mbwn deq

Roeggacak bauqangq

Douh faex sang eu fwen

Baez eu couh byongh ndwen

Dwen coi vunz veh doengh