Youq Ginghcuz Samdauj Guengjsae raeuz, beixnuengx Gingh- cuz binaengz gvaqciet、angq hoh fungsou roxnaeuz diuqfoux ciengqgo, cungj haengj aeu gimzyienzdog danzgvit guhbuenx, caemhcaiq haujlai vunz cungj rox danzgvit gimzyienzdog. Bi 2011 ndwen 8, Dunghhingh Ginghcuz Gimzyienzdog yisuz ndaej lied haeuj le buek daihsam guekgya feihvuzciz vwnzva yizcanj baujhoh mingzloeg.

Gimzyienzdog youq ndawbiengz Ginghcuz heuhguh gimzbeuz, rox- naeuz gimzbeuz yienzdog, dwg cungj yozgi ndawbiengz ciuhgeq Ginghcuz ndeu, gaenq miz 400 lai bi lizsij, youq ranghdieg Ginghcuz Samdauj Gyanghbingz Cin Dunghhingh Si riuzcienz hwnghoengh. Gimzyienzdog gij daegsaek ceiq yienhda de dwg aen de gienjdan hoeng gij sing diuzbuj de danz okdaeuj haenx fagbyau nanwt, yaemdiuh lai yiengh, yaemsaek singjsag, ndei dingq yinx vunz. Boggimz aeu mbokfaexcuk bag aq yungh mbiengj hung guhbaenz roxnaeuz aeu geij gep benjfaex hab baenz habraez guhbaenz, raez sam cik、ciggingq seiq conq baenzneix, mbiengj haibak hoemj coh baihlaj, gyaeuj he ding diuz dingciem ndeu cugndaet yienzgimz, gyaeuj he cix siuq congh iq ndeu baek gep faexcuk na he guh ganjngauz; yienzgimz caenh miz diuz dog, ciuhgeq aeu cagndaij roxnaeuz diuzduk guh yienz, diuzyienz gyaeuj ndeu cug gwnz dingciem gyaeujgvaz boggimz ndaet- ndiq, gyaeuj he cug youq gwnz diuz ganjngauz gyaeujswix boggimz. Danzgvit biujyienj seiz, fwngzgvaz gaem gyamqsae’gyap roxnaeuz gep faexcuk iq dinj ndeu danzgvit yienz- gimz, hawj de fat ok gij singyaem saenqrwd haenx, fwngzswix doengz- seiz gaem ngauz ganjngauz, hawj singyaem rwenzred sang daemq bienqvaq gyoebbaenz yaemwenq.

Gimzyienzdog riengzdwk vwnz- mingz ciuhneix hwngfat caemh ciemhciemh ndaej gaijcaenh, cug- bouh demgya le gungyienz caeuq aenhapgug yiengh lwggyoux, caiq hwngfat baenz aen gimzyienzdog ciuhneix. Aen sigij gonq roekcib nienzdaih co, Dunghhingh Minzcuz Gohvujdonz seizhaenx, hainduj bae soucomz cingjleix bujgo Ginghcuz, hawj gij yaemgo gimzyienzdog aeu bak ciengq rwz dingq doxcienz haenx baez daih’it miz le baenz dauq bujgo, vih gimzyienzdog ndaej baij hwnj daizheiq hung biujyienj caux diuz- gienh ndei. Gyoengq canghyienj lij ginggvaq fanfoek sawqniemh, aeu faexnding、faexgyaemq roxnaeuz faexgvang dingjlawh mbokfaexcuk guh baenz boggimz, aeu gaeuvaiz dingjlawh gep faexcuk dinj guh ganjngauz, doengzseiz youq gwnz yienzgimz cang le aenribyaem, hawj de bienqbaenz le gimzyienzdog singdienh, gij sing engq hung cienz ndaej engq gyae, baenzneix yaemsaek gimzyienzdog couh bienq ndaej engq unqnemq ndeidingq, singyaem engq singjsag rwenzred, engq seprwz, engqgya ndaej daengz vunzlai haengjgyaez.

Bae yawj bae dingq gimz- yienzdog biujyienj, caenh raen boux- yienj fwngzgvax danzgvit fwngzswix ngauznod ganjngauz le, gij sing gimz ndei dingq rwenzred couh cienz okdaeuj, mwngz ndaej youq ndaw yaemgo mbouj doxdoengz haenx maezmwd: Roxnaeuz rumz swnh raemx dingh, aenmbwn gvangqlangh; roxnaeuz raemxlangh fan hwnj gienj roengz, langh laeng gyaep langh gonq; roxnaeuz gij cingz unq gvaq raemxsaw, hopheux yinx vunz……