Liujcouh bi 2018 ndwen 1, mbwn bienq nit，rumzbaek bongjhuhu, gij vunz byaij roen baedauq mbaqmbingh haenx couhcinj bau dwk dan hawj lwgda conh okdaeuj daengxndwi hix dingj mbouj ndaej rumznit haenq bongj. Hoeng youq ndaw aen gvanj- ringeizheih Singzringeizheih Dungh- vanz Dadau Liujcouh Si ndeu, cangh- go Vahcuengh gwnz muengx okmingz Veiz Siujgangh cingq caeuq baengz- youx yiedcingz lumj feiz nei damzlwnh《Gou Dwg Baenzneix Baenzneix Maij Mwngz》 diuz go Vahcuengh de coih- gaij baez daihngeih neix.

Diuz go neix dwg diuz go dandog Veiz Siujgangh bi 2017 raiz, hix dwg diuz go daih cibroek de daj cauhdaeuz、fanciengq go Vahcuengh doxdaeuj haenx.

Bihaenx, de aenvih diuz go Vahcuengh cauhmoq ndeu ok- mingz

《Gou Dwg Baenzneix Baenzneix Maij Mwngz》, dan dwg fanfoek coih- gaij couh yungh bae byongh bi lai lo, hoeng Veiz Siujgangh naeuz dijndaej, cijaeu bonjfaenh lij caengz raen hab- hoz, couh aeu laebdaeb gaij roengzbae.

Gangjdaengz “aen loqsiengj ciengqgo” bonjfaenh, Veiz Siujgangh naeuz de daj iq couh maij ciengqgo, seiz doeg cunghyoz caeuq doengzhag gapbaenz le aendoih gizdah, ndaej- hoengq couh doxcomz boq rag danz ciengq, youq hagdangz lij gaenq dwg vunz gig miz yingjyangj gvaq.

Doeklaeng bizyez le, Veiz Siuj- gangh yienznaeuz sij mbouj ndaej hoeng lij dwg aeu aen gizdah bonj- faenh gig maij haenx yo hwnjdaeuj lo, hoeng aen loqsiengj ciengqgo ndatfwd cix itcig youq ndaw sim de laedoengh. Bi 2005, Veiz Siujgangh seiz ndaej- hoengq nyaenx mbouj ndaej gij siengjmuengh doiq ciengqgo haenx, youh dauq gaem hwnj aen gizdah, caemhcaiq doenggvaq gwnz muengx sugrox gyoengq baengzyoux maij ciengqgo ndeu, gyoengqde ngoenz- naengz doenggvaq gwnz muengx doxgyau ciengqgo, doxcaez fanciengq、raiz go.

Baez ndeu caeuq baengzyoux habciengq doxgyau diuz go Vah- guengjdoeng ndeu le, Veiz Siujgangh nyinhrox daengz gij yinxdaeuz go vah deihfueng lo, cix gag naemj:“Vunz Guengjdoeng maij yungh Vahguengj- doeng ciengqgo, vunz Fuzgen maij yungh Vahminjnanz ciengqgo, yiengh- haenx vunz Bouxcuengh raeuz vihmaz yungh Vahcuengh daeuj ciengqgo mbouj ndaej ne? Seizneix couhcinj dwg lwgnyez Bouxcuengh dan dingq rox mbouj rox gangj Vahcuengh, danghnaeuz gou yungh Vahcuengh daeuj ciengqgo, gangj mbouj cinj bouxcoz caeuq lwgnyez cungj maij dingq.”

Veiz Siujgangh gangj guh couh guh, ngoenz daihngeih sikhaek couh aeu gij yaemwenq diuz go bonjfaenh ceiq maij ndeu fukceiq roengzdaeuj, caemhcaiq yungh Sawcuengh raiz roengz gij swz diuz go 《Daengx Ciuhvunz Gou Couhdwg Yienghneix Gvaq》. Yungh le 3 ndwen, diuz go Vahcuengh《Daengx Ciuhvunz Gou Couhdwg Yienghneix Gvaq》 cingqsik guh baenz. Baez youq gwnz muengx fatbouh couh yinx ndaej haujlai vunz haeujsim, 3 ngoenz ndawde couh miz 30 fanh vunz doxhwnj diemj haeujbae dingq.

Go Vahcuengh baez daih’it fat- bouh couh okmingz hawj gij saenqsim Veiz Siujgangh fatyiengz vwnzva mbanjranz haenx rimrwdrwd, de youh laebdaeb fanciengq、raiz le《Aencingz Bohmeh》 《Doxduenq Ciuhneix》 《Bouxmaijlaeuj Laeujfiz》 daengj geij diuz go Vahcuengh, doenghgij go neix youq gwnz muengx cungj miz haujlai vunz haeujsim caeuq diemj haeujbae dingq.

“Gij go vah mbanjranz bonjfaenh raiz haenx okmingz lo, doiq boux maij ciengqgo daeuj gangj dangyienz dwg cungj gujli gig hung ndeu, hoeng engq hawj gou raen miznaj dwg, gou daiqdoengh le cungj heiq fanciengq、cauhdaeuz go Vahcuengh ndeu, hawj buek bouxcoz ndeu maij hwnj vah minzcuz bonjfaenh.” Veiz Siujgangh naeuz, fatyiengz minzcuz vwnzva dan baengh gij rengz bouxvunz dog caen dwg nanz guh ndaej daengz, hawj engq lai vunz camgya haeujdaeuj cij ndaej hawj vwnzva Vahcuengh byaij ndaej engq gyae. Seizneix Liujcouh、Hoz- sanh、Gveigangj daengj dieg bouxcoz yungh Vahcuengh guh go yied daeuj yied lai, haujlai vunzmoq cauhdaeuz lij ciengzseiz aeu gij go Vahcuengh bonjfaenh gag raiz haenx daeuj hawj Veiz Siujgangh bang coihgaij.

Moix baez daj ndaw fwngz boux- wnq aeundaej gij gomoq ngamq guh baenz haenx, Veiz Siujgangh cungj dwg gig nyinhcaen fanfoek coihgaij.

Seizneix, De Dan Siengj Yungh Gij Fuengsik Bonjfaenh Cienzboq Vwnzva Vahcuengh

Seizneix, Veiz Siujgangh caeuq gij go Vahcuengh de gaenq bienq- baenz aen giuz haujlai vunz roxyiuj vwnzva Bouxcuengh ndeu, gij soq boqcuengq gwnz muengx 《Daengx Ciuhvunz Gou Couhdwg Yienghneix Gvaq》 diuz go Vahcuengh daih’it de neix gaenq mauhgvaq 2660 fanh baez, 10 lai diuz go Vahcuengh de fan- ciengq、cauhdaeuz haenx hix bienq- baenz gij go okmingz gwnz muengx lo.

“Gou yenzgiu le gij go vahdeih- fueng duenh seizgan gig nanz ndeu yawjraen, gij ndaej cienzciengq gig lai gig nanz haenx cungj dwg gij ceiqndei minzcuz vwnzva dangdieg, mboujlwnh dwg aendiuh、gij swz caeuq gij ginggai caeuq cingzdiuh diuz go gangjok haenx, cungj dwg gig hab gij saedsaeh vwnzva minzcuz bonjfaenh roxnaeuz bonjdieg. Ndigah gou daj diuz go Vahcuengh daih’it fanciengq hainduj couh dingh aen moegbiu ndeu hawj bonjfaenh lo, gij swz diuz go guh haenx itdingh aeu dwg Vahcuengh caencingq, mbouj ndaej ‘ciq Gun’.” Veiz Siujgangh naeuz, gij nanzdiemj yungh Vahcuengh guh roxnaeuz fanciengq go couhdwg gij swz mbouj doiqwngq, lengq seiz ciuq gij sibgvenq Vahcuengh raiz baenz lo, hoeng dauq haeuj aendiuh bae lengq giz couh gig mbouj swnh bak, seizneix couh aeu vuenh aen swz Vahcuengh ginggai caeuq cingzdiuh doxdoengz ndeu bae nyinh aendiuh cix ndaej. Lengq vunz caen siengj mbouj ok saek aen swz Vahcuengh lawhvuenh ndaej, vihliux hawj gij swz caeuq aendiuh doeng- swnh couh yungh Vahgun dienz haeuj ndaw swz bae.“‘Ciq Gun’ haeujbae, aendiuh swnh lo, hoeng cungj swz doxcab neix yaek hawj vunz hag loeng gig lai, couh lumj mwngz gangj coenz Vahbujdungh ndeu, ndawde youh cab miz aen song aen swz fatyaem Vahgveiliuj, mboujdan rwix dingq, hix hawj gij vunz siengj hag caeuq roxyiuj Vahcuengh haenx hag loeng.” Veiz Siujgangh naeuz, seizneix bouxcoz gangj Vahcuengh yied daeuj yied noix, couhcinj youq lajmbanj, mbangj sibgvenq yungh Vahcuengh eu sei eu fwen conzdungj daengj hix dan dwg vunzgeq maij camgya daengxndwi. Seizneix gij vunqsik yungh Vahcuengh ciengq goliuzhingz menhmenh youq ndawgyang bouxcoz liuzhingz, neix dwg aen bingzdaiz ndei yiengq bouxcoz nyezrauh cienzdoh、cienzboq vwnzva bonjdieg Bouxcuengh ndeu, ndigah gij go bonjfaenh itdingh aeu baujcingq dwg Vahcuengh yiengh- nduj, couhcinj dwg coihgaij gij ginggai caeuq cingzdiuh gij swz roxnaeuz gij diuh diuz go, hix mbouj ndaej caeuq yenzsu gizyawz doxgyaux.

Gouz caetliengh mbouj gouz soqliengh, aeu ok cingbinj engq aeu miz yingjyangj. Gaenh bi neix daeuj, Veiz Siujgangh yungh engq lai goengrengz bae cienzboq vwnzva Vahcuengh. Moix bi seiz “sam nyied sam Bouxcuengh”, couhcinj gij hong bonjfaenh baenzlawz nyaengq, cijaeu mbanjranz Hozsanh Si iucingj de bae camgya gij biujyienj gvendaengz fatyiengz minzcuz vwnzva, de cungj nyinhcaen caepcawq go hwnj daiz biujyienj; Liujcouh Si banh gij doxdax yungh vah minzcuz ciengqgo, de sikhaek bae ra canghgo Vahcuengh ceiqheiq doxdoengz swhsiengj doxhab gaenxmaenx bauqmingz camgya; caeuq neix doengzseiz de lij aeu gij go Vahcuengh bonjfaenh gag raiz、fanciengq haenx gaek baenz haujlai mbaw gvanghdez, byaij haeuj mbangj hagdangz cungh siujyoz, lwnhgangj vwnzva Vahcuengh hawj daihgya dingq, soengq gij gvanghdez go Vahcuengh, caeuq gyoengq hagseng doxcaez angq ciengq go Vahcuengh.