312. Meh gaenx dah mbouj gik, boh gik lwg caegyouq.

313. Ciengx lwg ciengx lan, bohmeh ciengz guh.

314. Maxlaeuz caiq lingz hix doek dat.

315. Roen gyae buet dai max, naz goz naet dai vaiz.

316. Lwgda caiq raeh hix yawj mbouj raen naj swhgeij.

317. Ruz lau dading roh, ranz lau giek ciengz caem.

318. Bya laeg hwnj nywj gvaiq, haij hung miz bya gvaiq.

319. Siengj gvaq dah, couh dap giuz; siengj gwn bya, roengz dah vax.

320. Gyong mbouj roq mbouj yiengj, vah mbouj gangj mbouj mingz.

321. Conghrum daem ok haeuxsan, seizseiq cauh baenz bouxak.

322. Sim muh faex guh ndaej, sim vunz noh maj baenz.

323. Muh mbouj yoengx mbouj cienq, lingz mbouj ngauz mbouj yiengj.

324. Goekgaen hojheq dingzlai dwg vunz gik, goekgaen guhcaeg dingzlai dwg

dojcienz.

325. Raemxraiz caiq lai, coux mbouj rim congh dinvaiz.

326. Conghbak yiemz iq roh rumz hung.

327. Swx coux mbouj ndaej raemx, faiq naenx mbouj ndaej feiz.

328. Ranz gwnz son lwg ranz laj gvai.

329. Bya hoed mbouj hoemz raemxdah, mojlox buen mbouj ndaej bya.

330. Raemx lai cimq ruz mbouj hung, feiz hung coemh rek mbouj vaih.

331. Gyoux geq ndei guh mbai, vah laux ndei guh yw.

332. Faexsaux roengz raemx rox laegfeuz.

333. Bogfeiz cawj mbouj cug rek haeux.

334. Ndwn hwnj diuq, diuq mbouj sang; maeuq roengz yawj, yawj mbouj gyae.

335. Fajdin vunz ndaw bya ceiq na.

336. Saeh vaih cienz cien leix, saeh ndei mbouj okdou.

337. Vunz lau leix, max lau bien, nengznyaen duznyungz lau hoenzfeiz.

338. Ciengz doemq vunzlai nyoengx, saeh baenz vunzlai guh.

（sat）