Lij iq miz geij baez gauj yinghyij mbouj ndei, bohmeh mwngz roxnaeuz lauxsae mwngz dwg mbouj dwg naeuz mwngz hag mbouj ndei yinghyij? Mwngz dwg mbouj dwg caeuq gyoengqde siengj doxdoengz, nyinhnaeuz swhgeij caen hag mbouj ndei yinghyij dahraix, doeklaeng couh mbouj nyinhcaen hwnj dangz yinghyij lo?

Lauheiq mwngz cijdwg fouzeiq gangj geij coenz vahriu, gij vunz henz ndang dwg mbouj dwg naeuz mwngz gangj vah gig mizyinx? Mwngz dwg mbouj dwg hix doengzeiq gij vah gyoengqde, baezlaeng moix baez caeuq vunz gangjgoj, cungj daeg- daengq bae ra gij vah ndeiriu daeuj gangj, hoeng mizseiz mbouj haeujsim gangj loek lo?

“Hag mbouj ndei yinghyij” hix ndei, “gangjvah ndeiriu hix ndaej”, gij biuciem bouxwnq hawj raeuz nem hwnj neix, yawj hwnjdaeuj lumj gig rox raeuz, hoeng saek seiz dauqfanj dwg miz vunz gik bae siengj couh hawj bingzgyaq. Engq youqgaenj dwg danghnaeuz raeuz hix nyinhnaeuz gij biuciem bouxwnq seizbienh nem hawj deng, daegdaengq bae bauj gij biuciem ndei maenh, roxnaeuz doengzeiq gij biuciem rwix caemh- caiq doiq de mbouj leix mbouj langh, lauheiq gig mbouj leih raeuz hung- maj.

Hwnj cuhcungh seiz, gij cingzcik yinghyij gou itcig baiz youq daengx nienzgaep baihnaj, gij cingzcik suyoz yaez ndaej mbouj baenz gangj. Mboujlwnh bohmeh roxnaeuz banh- cujyin, cungj naeuz daeglwg neix yinghyij baenzneix ndei, hab bae doeg vwnzgoh, doeg lijgoh mbouj habcik. Youq gij biuciem yingjyangj baihlaj, gou hix baenzneix nyinh- naeuz, ndigah couh mbouj yungh geijlai goengfou bae hag suyoz、vuzlij caeuq vayoz lo, fanjcingq swhgeij hix hag mbouj ndei.

Daengz gauhcungh, aenvih haeuj ban ndei, doengzhag cungj dwg youh gaenx youh maenh. Youq gizneix, gij yinghyij gou beij mbouj gvaq bouxwnq, gij suyoz ca ndaej mbouj rox baenzlawz yawj. Gou fatmoengx lo, suyoz yaez mbouj yungh dwen, baenzlawz yinghyij hix bienq ndaej bingzciengz lo. Nanzdauh gou mbouj hab doeg vwnzgoh? Baenzneix gou lij doeg maz saw dem? Sauh nanz he gou cungj mbouj nyienh bae siengj gij vwndiz neix, aeu gij seizgan ceiq ndei hagsib bae ndaw vangjbah dwk youzhi. Hoeng, hwnj gauhcungh ngeih nienzgaep le, gou baez ndaejhoengq couh bae geiq gij danhswz yinghyij, roengzrengz bae gaghag suyoz, doeklaeng gij cingzcik suyoz caeuq yinghyij mauhgvaq haujlai doengzhag, baiz daengz baihnaj lo.

Bonj saw《Gij Fap Hagsib》 ndawde, dwen daengz song cungj swhveiz, heuhguh “cingjdaej lijlun” caeuq “cugciemh lijlun”. Danghnaeuz gij vunz miz “cingjdaej lijlun” nyinhnaeuz swhgeij youq giz he gig miz dungxcaiz, caemhcaiq saenq gij cingzcik dwg aenvih miz gij dungxcaiz, gij dungxcaiz neix nanz ndaej bienq, dwg aen “cingjdaej”. Gij vunz miz “cugciemh lijlun”nyinhnaeuz gij cingzcik dwg baengh swhgeij roengzrengz mbouj daengx, caemhcaiq saenq cijaeu swhgeij menhmenh baenaj couh rox guh ndaej engq ndei. Danghnaeuz bungz diuhcan, boux “cingjdaej lijlun” yungzheih simgip simvueng, boux miz “cugciemh lijlun” lauheiq engq miz saenqsim.

Doiq boux “cingjdaej lijlun” daeuj gangj, gyoengqde doiq gij bingzgyaq swhgeij couhdwg gij “biuciem” bouxwnq fouzeiq mizeiq nem hwnjbae. Doeg cuhcungh seiz, gou doengzeiq gij biuciem bohmeh caeuq lauxsae nem hawj, yungh gij “cingjdaej lijlun” mozsik, nyinhnaeuz swhgeij daj okseng miz dungxcaiz hag yinghyij caemhcaiq fouz gij dungxcaiz hag suyoz, ndigah roengzrengz bae hag hix mbouj miz yungh, baenzneix gij “biuciem” bouxwnq nem menhmenh bienqbaenz gou gik bae hagsib. Caj gou hwnj gauhcungh, doengzhag gaenx hag, miz dungxcaiz gaenbonj couh gangj mbouj doeng, gou youh caeuq gyoengqvunz “cingjdaej lijlun” dox- doengz, hainduj ndojdeuz, mbouj nyienh bae najdoiq yienhsaed. Gyo- ndaej gou gvaq yaep he couh rox bae roengzrengz, fouzeiq baenz boux “cugciemh lijlun”, doeklaeng hix baengh haenqrengz ndaej gij cingzcik ndei.

Mboujgvaq, gij vah gou aeu gangj gawq mbouj dwg roengzrengz caeuq dungxcaiz aen lawz engq youqgaenj, hix mbouj dwg roengzrengz le couh ndaej dawz lwgmak ndei. Gou siengj gangj gij “biuciem” nem hawj raeuz. Gij “biuciem” ndei dangyienz dwg cungj haengjdingh, hoeng danghnaeuz raeuz angqfwngfwng yiengjsouh ndwi, lij daegdaengq bae ra gihvei cwng- mingz gij “biuciem”, baenzneix raeuz couh deng gij “biuciem” laiqcaemq lo. Mbouj dwg buekmingh bae veizciz gij yienghsiengq “biuciem” hawj, couh- dwg deng gij “biuciem” hoenxbaih. Danghnaeuz raeuz doengzeiq gij “biuciem” rwix, raeuz couh nanz ndaej hungmaj, najdoiq gij saetbaih engq yungzheih mbouj saenq swhgeij, ngoenz doek ngoenz doeknaiq roengz- bae.

Gou miz haujlai doengzhag cingzcik itbuen, gyoengqde gig hozhaenz gij doengzhag cingzcik ndei, nyinhnaeuz gij doengzhag cingzcik ndei gig coengmingz, mbouj aeu roengzrengz geijlai couh gauj ndaej ndei. Gwq yiemz bohmeh hawj uk huk, swhgeij roengzrengz le cingzcik hix mbouj ndaej daezsang, yied mbouj saenq swhgeij, yied mbouj nyienh bae hagsib. Youq gwnzbiengz, siuj mbouj ndaej miz vunz aeu “coengmingz daj okseng miz” bae lwnh vunz, itdingh aeu haeujsim bouxwnq diep “biuciem” hawj raeuz, engq aeu haeujsim gag diep “biuciem” hwnj ndang.

Youq gij “biuciem” maenh lajde, raeuz cungj wnggai cingsingj roxnyinh: Swhgeij rox mboujduenh hungmaj, couhcinj dwg “diencaiz”, hix aeu ok hanh. Raeuz aeu geiq maenh gaenx ndaej bouj huk. Bouxhingz mboujlwnh baenzgoeng roxnaeuz saetbaih, cungj gamj mbek gij “biuciem” roengzdaeuj, mboujduenh roengzrengz caeuq dauq- ngeix, baenaj guh engq ndei.

（Veiz Funglingz hoiz）