“Gvangjsih Bouxcuengh Swcigih Lozcwngz Mulaujcuz Swciyen dwg aen yienh gagguenj Mulaujcuz dandog Cungguek, gij vwnzva Mulaujcuz conzdungj youq gizneix goek laeg rag raez.” Ndwen 3 ngoenz 5 banhaemh, daengx guek cwnghez veijyenz、Lozcwngz Mulaujcuz Swciyen yinzda cangzveijvei fucuj- yin Ouh Yenlingz bae guh hek “funghranz cunz gangj Gvangj- sihyinz Baekging 2018 daengx guek song hoih”, ciepsouh caijfangj gij vwndiz baujhoh、swnjcienz caeuq hwngfat vwnzva minzcuz vunznoix daengj.

Ouh Yenlingz veijyenz gangj daengz baujhoh caeuq swnjcienz vwnzva minzcuz Mulaujcuz seiz naeuz:“Mulaujcuz dwg minzcuz gyaeujvunz haemq noix, doengh bi neix aenvih Mulaujcuz vanzging fatseng bienqvaq, gyahwnj haujlai vunz lizhai gyaranz bonjfaenh youq haenx, caeuq giepnoix gij fuengfap baujhoh guh ndaej mizyungh, cauhbaenz gij ndangdaenj minzcuz、vah Mulaujcuz cingq cug- yamq siusaet, ranz gaeuq、mbanj gaeuq vaih gig lai, conzdungj vwnzva gunghyi hix riengzdwk canghheiq banlaux gvaqseiq yaek siusaet. Ndigah, baujhoh gij vwnzva conzdungj raeuz gaenq daengz dieg gip mbouj ndaej menh saekdi.”

Vihneix, Ouh Yenlingz veijyenz genyi daj sam aen fuengmienh bae baujhoh caeuq swnjcienz vwnzva minzcuz vunznoix: Daih’it fueng- mienh dwg baengh dajcauh aen bingzdaiz gvaengh lijyouz cingbinj minzcuz vunznoix baihsaebaek Gvangjsih, dawz gij vwnzva swhyenz minzcuz Mulaujcuz caeuq lijyouz doxcaez giethab, caemhcaiq cugyamq hwngfat baenz diemjcengjdingj ginghci vwnzva. Daihngeih fueng- mienh genyi vwnzva bouhmonz ndaej okdaiz gij banhfap baujhoh engq ciengzsaeq, guenjleix caeuq baujhoh vwnzva conzdungj minzcuz vunznoix, ndaej bued roengz ngaenzcienz cienhangh hwnjguh dieg baujhoh feihvuzciz vwnzva yizcanj. Daihsam fuengmienh aeu gyalai hwnjguh caeuq baujhoh aendoih vunzcaiz, hawj baujhoh、swnjcienz caeuq hwngfat vwnzva minzcuz vunznoix miz vunz swnj.

(Cujbauqlwnh Gvangjsih Yinz- yungz Meizdij)