Heiqcuengh dwg cungj citheiq daiqbiuj Bouxcuengh raeuz, youq Guengjsae baihsae、baihnamz、ranghgyang caeuq Yinznanz Swngj Funingz、Gvangjnanz doenghdieg neix riuzhengz, daengz seizneix gaenq miz song bak lai bi lizsij. Heihcuengh gig miz daegsaek minzcuz, dwg cungj yisuz citheiq beixnuengx Bouxcuengh haengj dingq gyaez yawj ndeu. Bi 2006 ndwen 5, Heiqcuengh ginggvaq Gozvuyen baecinj ndaej lied haeuj buek daih’it guekgya gaep feihvuzciz vwnzva yizcanj mingzloeg.

Heiqcuengq ciuq gij vahdeih- fueng dieg riuzcienz de caeuq gij daegcwng citheiq youq vahgangj gyoebbaenz de bae faen, miz baih- baek、baihnamz caeuq heiqgoengsae sam loih Heiqcuengh. Sam cungj citheiq neix doenghdieg riuzcienz、dieggoemqcw nem yienghbyaij hwngfat de mbouj doxdoengz, suij- bingz biujyienj caemh mbouj bingz- yaenx; gij diuhciengq、funggek biujyienj、biucinj biujyienj de caemh mbouj doengz.

Heiqcuengh baihbaek gaxgonq heuhguh “heiqdoj”, youq Denzlinz、Lungzlinz、Sihlinz、Lingzyinz、Bak- saek、Lozyez daengj dieg riuzcienz haemq hoengh. Heuh de guh Heiq- cuengh baihbaek dwg aenvih youq ranghdieg vahdeihfueng baihbaek Vahcuengh nem aeu vahdeihfueng yienjciengq, gij diuhciengq de daeg- bied gag miz, caemh miz mbangj ciuqei gij diuhciengq aen minzcuz wnq “bienq Cuengh” le gyoeb- baenz gij funggek bonjfaenh. Heiq- moeg miz 《Vwnzlungz Caeuq Sauniq》《Nungz Cigauh》daengj. Heiqcuengh baihnamz youh heuhguh “heiq- yahhah” , youq ranghdieg Dwzbauj、Cingsih、Nazboh、Denhdwngj、Dasinh daengj riuzcienz, diuhciengq dwg youq gwnz goekdaej fwen dangdieg giethab yaem’wenq gangjciengq “moedlaenz” hwngfat baenz. Heiq- moeg miz 《Dahrongnding》《Lwg- gyoux Bauj》 《Nyenz Nding》daengj. Heiqgoengsae Bouxcuengh youh heuhguh “ciengqsae”“heiqsei”, youq ranghdieg Laizbinh、Yizcouh、Gvei- gangj、Vujmingz daengj riuzcienz, caemh heuhguh Heihcuengh rangh- gyang. Heiqgoengsae Bouxcuengh “heiqdaengqgeg” hainduj ciengq gojsaeh haenx dwg gij diuhciengq cingciengq, daih’iek buenq faen cung ciengq hot fwen ndeu, gij daegdiemj de dwg daj gyaeuj daengz rieng cungj dwg ciengq, mbouj miz gangjbeg, baez ciengq couh ciengq daengz daej, gij diuhciengq de dwg youz haujlai aen gizbaiz mbouj doxdoengz haenx lienzrangh hwnj- daeuj gyoebbaenz. Heiqmoeg miz baenz 300 lai aen, lumj 《Samyenz》《Vuengz Byajraez》《Moz It Daih- vuengz》《Daej Meh》《Buhbwnroeg》daengj.

Gij swzciengq、gangjbeg Heih- cuengh aeu vahdeihfueng Boux- cuengh ciengq, gig miz daegdiemj minzcuz, gak cungj diuhciengq cungj dwg gij diuhciengq fwen beixnuengx Bouxcuengh raeuz cungj gig sugsed haenx, louz miz fwen Bouxcuengh gij yaemlwd dawzyinh gag miz haenx, youq gij citheiq Cungguek ndawde daegbied gag miz. Gij biujyienj Heiqcuengh baihbaek, bouxseng、bouxdan cungj gaem fanbeiz, buzcouj gaem beizsen, sengnyaeq、danva gaem beizceij. Heiqcuengh baihnamz biujyienj seiz bouxgiek caemh miz faengoeng, najva miz najva hung najva nyaeq, sengnyaeq miz seng- faenz sengfoux, giekdan miz dan- cingq、danfoux、danlaux. Heiqgoeng- sae Bouxcuengh ne, geiz nduj miz caetcib ngeih cungj mauhngeg, moix cungj daiqbiuj loih vunz ndeu, gak miz gij yienghndang denjhingz bonj- faenh. Gij buenxciengq Heiqcuengh, cujyau yozgi dwg yienzndokmax, lij boiq miz ngeihyienz doj、yienzlwg- gyoux caeuq ngeihyienz、samyienz、digdaengj roxnaeuz digvang, mbangj- seiz lij miz boq mbawfaex buenx- ciengq dem, aen yozdui ndaekndek itbuen miz seiq boux vunz, yozgi miz gyongbenj、moegnyawz、gyongram、gyongrwi、gyongnyaeq、cacemq、laz daengj.

Bi 2009, Denzlinz Yen ndaej aen mingzdaeuz ndei “mbanjranz Heiqcuengh Cungguek”; bi 2012, Dwzbauj Yen aeundaej mingzdaeuz ndei “mbanjranz yisuz yienzndokmax Bouxcuengh” caeuq “mbanjranz yisuz vwnzva ndawbiengz Cungguek”, doenghgij mingzdaeuz ndei neix, hawj Heiqcuengh youq Mbanjcuengh riuzcienz ndaej engq hwnghoengh.