《Bae Ranz Ndaemnaz》diuz go Vahcuengh cauhdaeuz Bahnungz neix, gaenq ndaej ciengj gungyen daegbied “diuz go maij mbanjranz daengx guek bi 2016” Aen Hoih Maij Mbanjranz Cungguek Daihseiq Gaiq youz Cung- guek Nungzyez Dayoz、Cungguek Yinzminz Dayoz、Sihnanz Dayoz、Fuzgen Nungzlinz Dayoz doxgap banh haenx. Bahnungz dwg bouxcawjciengq caeuq bouxraizgo Doihciengqgo Vareihnaz, Doihciengqgo Vareihnaz dwg doihciengqgo Bouxcuengh daj Nanzdanh Yen dieg gapgyaiq Gvangjsih caeuq Gveicouh neix daeuj. Youq gwnz Yahmij Yinhyoz、Vangjyiz Yinhyoz、Douban Yinhyoz daengj mbangj aen yinhyoz yonjgen neix cungj saeuj ndaej 《Sambouh Gonaz》 aen yinhyoz conhgiz Doihciengqgo Vareihnaz neix.

Bi 2017 ndwen 9 ngoenz 24, seiz Bahnungz daj “Cietciengqgo Neiwj Hangzcouh” biujyienj dauqma ging- gvaq Namzningz, gicej bae caijfangj de. Bahnungz bingzseiz gig launyaenq, hoeng baez gangj daengz ciengqgo de sikhaek couh gig dawzyinx, mbouj vueng mbouj muengz gangj hwnjdaeuj lo……

Gvendaengz ciengqgo: Doihciengqgo Vareihnaz ngaem gyaeuj ndaemnaz ngiengx gyaeuj ciengqgo

Bahnungz coh heuh Veiz Gyah- yenz, bi 1979 youq ranz lajmbanj Bouxcuengh bingzciengz Mbanj- bahlingj Cwngzgvanh Cin Nanzdanh Yen ndeu okseng. De yienzlaiz dwg hag vehveh, seiz youq hawsingz dajgoeng guh gij hong dajveh bingzmienh, yienznaeuz caengz ndaej cingqsik hag ciengqgo gvaq, hoeng de daj iq dingq bouxwnq eu fwen majhung, ciengqgo doiq de daeuj gangj couh lumj gij doxgaiq seng okdaeuj couh miz nei, ndigah de daj iq couh gig maij ciengqgo, ciengqgo hix dwg gij siengjmuengh de. Youq geij aen hawsingz hung youzlangh daj- goeng cibgeij bi le, de youh dauqma daengz ranzcoj lajmbanj gvaq gij ndwenngoenz byongh guh reihnaz byongh ciengqgo, nyaengq couh ngaem gyaeuj ndaemnaz, ndaej hoengq couh ngiengx gyaeuj ciengqgo.

Vareihnaz eiqsei dwg doenghnaz vahaeux mbin homfwdfwd. Doih- ciengqgo Vareihnaz dwg aen doih seiz comz ciengqgo seiz sanq guh reihnaz. Doihciengqgo cujyau dwg youz Bah- nungz raiz go, itbuen cingzgvang youz song boux vunz gapbaenz: Bahnungz cujyau fucwz yienjciengq caeuq danzbued gizdah daengj doenghgij gyonglaz gimzyienz, Sozliz fucwz ciengq singdaengh caeuq roq gyonglaz gimzyienz. Gyoengqde cungj dwg vunzguhnaz Bouxcuengh daj Nanz- danh daeuj, ndaw sim miz gij siengjmuengh ciengqgo doxdoengz.

Bi 2005, Bahnungz caeuq Sozliz daj ranzcoj Nanzdanh hwnjdin, gonq- laeng bae daengz Gveilinz、Namzningz dajgoeng, aenvih mbouj miz cienz cawx gij sezbei denswj ciengqgo bengz haenx, gyoengqde hixnaengz couh ansim danz aen gizdahfaex、boq mbaw faex ndeu ciengqgo hwnjdaeuj. Bi 2006 satbyai, gyoengqde bae daengz Gvangjcouh, song vunz cujhoz cingqsik ancoh baenz “Vareihnaz”, caemhcaiq camgya le ciengz biujyienj cienciengz iq Fuzsanh Densidaiz banh ndeu. Doengz bi, gyoengqde cingjleix ok mbawyiengh mbaw conhciz daih’it 《Gwnzmbwn Fwj Mbin》, neix couh- dwg bouh daih’it《Sambouh Gonaz》. Diuz go Vahcuengh《Maenjbalah》caeuq 《Ronghrib》couh youq ndawde, song diuz go neix ndeidingq dangq- maz. Bi 2008, gyoengqde youq Gvangjcouh cingjleix ok mbaw conhciz daihngeih 《Daxboh Baihsae》.

Bi 2012, Bahnungz dauqma daengz ranzcoj Nanzdanh guh ranz, caeuq bohmeh nem Sozliz doxcaez youq gyanghongh guh baenz aen canghaeux caeuq aen ranz loegyaem, ancoh heuhguh “Aen Ranz Vunz- guhnaz Nazdenz”, daj neix hainduj loegyaem. Daengz bi 2014 seizcin, baugvat 《Dahnuengx Siengj Guh Vunz Gyang Singz》mbaw conhciz bi 2009 daengz bi 2013 guh neix, gyoengqde gungh loegguh baenz sam mbaw conhciz, Bahnungz lij gag dajveh gij fungmienh caeuq mbiengj ndaw mbaw ciengqbenq. Bi 2015 ndwen 3, Doih- ciengqgo Vareihnaz caeuq Dauh- majdan Ciengqbenq Gunghswh doxgap ok le 《Sambouh Gonaz》neix.

Gvendaengz Vahcuengh: Gaghag Sawcuengh hawj de raiz go lumj guk miz fwed

Gij vunz daengz yienhciengz yawj Doihciengqgo Vareihnaz biujyienj gvaq cungj rox, Bahnungz dingzlai dwg yungh Vahcuengh yienjciengq gij go cauhdaeuz damzraih mbanjranz.

De youq ranz lajmbanj Boux- cuengh ndeu sengmaj, Vahcuengh dwg vahcoj de, fwen Vahcuengh couh lumj gij doxgaiq youq ndaw lwed de lae nei. Seiz de yungh Vahcuengh raiz go, cungj caenhliengh baumaenh gij singdiuh Vahcuengh, hix couhdwg yungh gij singdiuh vah guh cawjdaej, yaem’wenq aeu gij daegsaek Vah- cuengh guh daeuz. Ndigah youq seiz raiz go Vahcuengh, de cungj daeg- bied yawjnaek baumaenh gij yiengh- nduj Vahcuengh ndaw go Vah- cuengh, liuxle yungh gij yaem’wenq swhyienz genjdanh bae boiqhab cungj diuh neix, yienghneix couh guhbaenz gij funggek ciengqgo daegbied de lo.

De mboujdan maij ciengq go Vahcuengh, lij gaghag Sawcuengh gvaq dem. Daj bi 2011 hainduj de cawx ma cek saw caeuq gvanghdez《900 Coenz Vahcuengh》youq ranz gaghag Sawcuengh.

Hag rox Sawcuengh le, de yungh Vahcuengh raiz go engqgya ngaih lo, gij go Vahcuengh mbaw conhciz daihsam de hix lai gvaq song mbaw gaxgonq lailai, lumjbaenz 《Sam Nyied Sam》 《Haeuxnaengj Haj Saek》 《Dahnuengx Siengj Guh Vunz Gyang Singz》 《Bae Ranz Ndaemnaz》daengj, cungj dwg gij go Vahcuengh.

Gvendaengz ndwenngoenz: De naemj byongh guh reihnaz byongh ciengqgo

Bi 2012, Bahnungz daj Gvangj- couh dauqma daengz ranzcoj Nanz- danh, hainduj dawznaz ciengqgo gvaq cungj ndwenngoenz byongh ndojyouq byongh guh reihnaz byongh ciengqgo ndeu, vihneix gyoengq baengzyoux cungj gangj riu heuh de guh “Canghhaeux” angq maij ciengqgo.

Daj seizhaenx hainduj, de hainduj youq moux naz ranz bonjfaenh sawq yungh gij fuengfap swhyienz dajndaem, gohaeux ndaw naz mbouj vanq vafeiz mbouj dwk ywgajnon, aeu gij cehhaeux gaeuq conzdungj daeuj ndaem. Ngamq hainduj song bi cungj mbouj swnhleih, mbouj dwk ywgajnon ndaw nazhaeux nonz gig lai, haeux sou ndaej noixnet, caiq gyahwnj reihnaz ciengzgeiz dwk vafeiz, doem ndaw reihnaz bienq byom, aeu yungh bwnh ndaw riengh daeuj menhmenh ciengx hawj de bienq biz cij ndaej. Ginggvaq 5 bi roengzrengz mbouj cuengqsoeng, moux nazbiz de dauqdaej miz soucingz onjdingh lo, haeux hix doh gag gwn gag yungh.

Bi’gvaq ndwen 11, de wngqiu bae camgya Aen Hoih Gozci Youjgih Nungzyez Yindung Lenzmungz（IFOAM）youq Yindu banh haenx, baez hoih neix yienh’ok le yawjnaek doengh gomiuz lai cungj lai yiengh vunzguhnaz guekgya cingq hwngfat haenx. De dangguh bouxdaiqbiuj vunzguhnaz moq Cungguek, youq aen hoih neix fatbiuj le gij yienjgangj gvendaengz gij cingzgvang nungzyez dajndaem Cungguek seizneix caeuq gij gyaepgouz de doiq swhyienz dajndaem haenx. Yienjgangj sat le, de yungh Vahcuengh yienjciengq diuz go cauhdaeuz 《Byawz Rox Mbin》, de siengj gangjok “mboujdan dwg haeuxgwn aeu bienq ndaej youjgih, gij ndwenngoenz cingsaenz raeuz hix aeu bienq ndaej youjgih youh lai yiengh hwnjdaeuj”. Yienjciengq ndaej daengz gyoengq baengzyoux gak guek seiqgyaiq haenh, seiz aen hoih sat bouxyawj gak guek haujlai vunz cungj iugouz caeuq de hab’ingj louzniemh.