Mbwn’gvengq ndit raeuj, rumz baet fajnaj daeuj. Gou daeuj gwnz dingjranz yawj saw, sam duz meuz ndaw ranz hix laeglemx riengz laeng gou daeuj. Gou naengh yawj saw, gyoengqde byaij gvaqdaeuj naengh youq henz ndang gou, iet gij linx ndingmaeq okdaeuj rizriz bwn, aeu heuj coengh duzdoih gaeb duzmaet roxnaeuz gaeu humz, doxndiep raix- caix! Dingzlai duzmeuz dak ndit seiz cungj gyaez baenzneix guh. Roi bwn ndei le, gyoengqde duz ing duz ninz roengzdaeuj, gij yienghceij gikgyak- gyak caeuq gij ndit banringz doxhab dangqmaz. Gyoengqde yaep ndeu baenqndang, ndaw hoz lij miz gij sing iq “gulu gulu” dem.

Sam duz meuz neix baengh goetgangq meh gyoengqde hawj, maj ndaej maengh raeuh. Gyoengqde yienznaeuz gyaeundei hoeng gig gik, baenzngoenz ninz youq gwnz cauq. Ndawde miz duz meuzmong ndeu maeuzgwn dangqmaz, lij gyaez caeg doxgaiq, ciengzseiz caeg gwn noh gwnz congz baij, mbouj miz yienghceij duzmeuz saekdi, duzmeuz wnggai gaeb duznou cij deng, hoeng de lumj mbouj yinx gaeb duznou nei. Boh hozndat duz meuz neix caeg gwn noh gwnz congz. Hoeng, de baez caeg gwn noh deng raen le, couh diuqyakyak buetdeuz, buet haeuj gox laep roxnaeuz riengjvaiq ndoj haeuj lajcongz bae, byawz hix moeb mbouj ndaej de. Caj boh hozroengz, de youh menhmenh ndot okdaeuj, caeuq song duz meuz wnq caemh gwn noh. Gyoengqde rox bouxcawj, ndigah hag rox gvaigvetgvet ndoj deuz, mbouj deng bouxcawj moeb.

Duz meuzndaem ndang hung gvaq duz meuzmong, ndang maengh noh maenh, hoeng beij duz meuzmong dingqgangj. De daengx ndang cungj ndaemndutndut, lwgbaed ndongq gvaq duzmeuz wnq. Miz baez he, de ndwn- ngoegngoeg youq gizlaep heuh gou, gou riengz sing bae ra, gig nanz cij ra ndaej de. Gou naemj, gyanghaemh de bae gaeb duznou seiz, youq gizlaep duznou haengjdingh yawj mbouj raen de, baenzneix de gaeb duznou gig ngaih. Daengx ranz vunz cungj gyaez duz meuz neix, aenvih de soqlaiz mbouj caeg doxgaiq gwn gvaq. Caemhcaiq duz meuzmong faen gij noh caeg ndaej seiz, de hix mbouj gwn saek gaemz, cij youq gizgyae ngonz.

Duz meuzndaem gaeb duznou ak raixcaix, duznou de gaeb ndaej lai gvaq song duz meuz wnq. De mbouj ngah ninz youq gwnz cauq geijlai, ciengzseiz youq henz canghaeux cunz bae cunz dauq, lumj bouxbing dawz dieg youqgaenj. Moix gek geij ngoenz, de cungj gaeb ndaej duz nou ndeu. Baeznaengz, de youq gizlaep gaeb ndaej duznou le, couh gamz duznou youq ndaw bak, byaijndiengndieng daengz giz bouxcawj yawj ndaej raen, caiq menhmenh gwn duznou. De rox yienh goenglauz coh bouxcawj, dwg- gyaez raixcaix.

Meuzmeh mizndang moq lo. Gij yienghceij de gig geizheih, dungx lai ok geij gaiq noh, meuzlwg ndaw dungx de doed okdaeuj. Hoeng, duz meuz- meh neix lij caeuq gaxgonq doxdoengz diuq hwnj diuq roengz, de lij gyaez caeuq song duz meuz wnq doxmoeb doxnyex guhcaemz. Gou lij raen de daj gwnz liengz sanggvanggyang yat roengzdaeuj, doek youq gwnz daengq onjdupdup. De lumj mbouj lau lwg ndaw dungx deng sieng. Goulau duzmeuz daj okseng couh maij yat maij diuq.

Duz roeglaej iqetet he mbin gvaqdaeuj, douh youq gwnz batva. De riengjretret youq ndaw byozfaex ndonj bae ndonj dauq. Gij ciuz “cici caca” de cauz ndaej duzmeuz ninzndaek ndiu lo. Duz meuzmong ndwn hwnj- daeuj gonq, de haeujsim dwk yawj- myoegmyoeg, byaijyumyum coh batva. Duz meuzndaem caeuq duz meuzmeh ninz youq mbouj ning, byaengq da yawj duz meuzmong. Duz meuzmong caengz byaij daengz batva, roeglaej couh mbinfokfok deuz lo. De daengj- rieng ngiengxgyaeuj cim duz roeglaej mbin bae, miz di fouznaih caemhcaiq hozbongz. Duz meuzmeh swenj baez ndeu, de cij ngaemgyaeuj byaij doxdauq, youh laebdaeb laep da ninz youq gwnznamh raeujrubrub.