Singhgiz ngeih banhaet, gou daj 4 laeuz hai hoih dauqma, ngamq byaij haeuj bangunghsiz, couh raen lauxsae suyoz hozgaek ngaungau dwk gaen- laeng gou byaij haeujdaeuj.

De byaij daengz dangnaj gou, doq cuengq gobwnj gwnz fwngz doq hujhuhu gangj:“Ngoenzneix mbouj rox gyoengq lwgnyez ban mwngz baenzlawz lo, ngamq haet gyausiz couh baenzneix uq, mbouj miz da yawj. Aen bwzbanj sij rim cih mbouj mad seuq, gwnznamh lij dauqcawq miz vengqceij、naengmak caeuq daehsuliu…… Nanzdauh mwngz mbouj anbaiz hagseng baet?”

Dingqnyi de baenzneix gangj, gou doeksaet caez, ciepdwk couh iet fwngz bongxbongx mbaq de couh byaij bae coh gyausiz lo. Gou ngamq byaij daengz bakdou gyausiz, couh raen aen daehsuliu he hau cingq daj ndaw gyausiz daj gwnznamh menhmenh mbin okdaeuj. Gaiq nyangjbaet hoengz he gaenh raek le, cingq unqnemnem “ninz” youq henz gyangjdaiz.

Raen gou byaij haeujdaeuj, aen gyausiz ngamq lumj raemxgoenj bauq- myangmyang nei sikhaek caemdingh roengzdaeuj, caem ndaej dingqnyi gij sing diemheiq gyoengq hagseng. Gou ndwn youq gwnz gyangjdaiz, lij cing- cuj muengh raen baihlaeng gyausiz “ninz” miz song sam gaiq nyangjbaet. Gou haenqrengz nyaenx dwk mbouj hawj swhgeij fatheiq, gungj hwet iet fwngz gip gij nyangjbaet “ninz” hwnjdaeuj, baet gij nyapnyaj gwnz- namh. Vih mbouj yingjyangj dangz goq baihlaeng, gou sing daemq heuh hagseng caez doenghfwngz, gag gip gij nyapnyaj henz daizsaw swhgeij, gip hwnjdaeuj vit haeuj aen’gyangj cienmonz cang nyapnyaj, ciepdwk hwnjdangz.

Banringzgvaq dangz daih’it dwg hai banhoih. Gou fwngz gaem gij nyangjbaet banhaet “ninz” youq gwnz- namh byaij hwnj gyangjdaiz. Gyoengq hagseng naengh baihlaj miz boux iet hoz daengx da geizgvaiq dwk yawj coh gou, miz boux coh doengzhag henz ndang sing saeq gangjsebseb. Gou ndwn dingh le, couh yaengx hwnj gij nyangjbaet yiemzsuk dwk naeuz:“Gyoengq doengzhag, dangz banhoih neix raeuz daeuj daujlun gij nyangjbaet neix. Sou dingq lauxsae lawh nyangj- baet gangj geij coenz vah gonq.” Gyoengq hagseng mbouj rox gou yaek gangj maz, cungj nyinhcaen dingq.

Gou siengsim dwk gangj:“Gou dwg boux cwngzyenz aen cizdij ndaw ban, vih hawj gyoengq doengzhag ndaej youq aen gyausiz seuqcingh caemhcaiq caezcingj daeuj hagsib, gou moix ngoenz mbouj lau uq mbouj lau naet, baet gyausiz ndaej mbouj miz saekdi faenx. Hai! Mboujliuh aen ndang gou deng dik, in ndaej seizneix ndok daengx ndang lumj yaek sanq, di hong he cungj guh mbouj ndaej. Cij hawj aen gyausiz bienq ndaej baenzneix uq, gou doiq mbouj hwnj caezgya……” Gangj sat, gou lij cang daejnyenye hwnjdaeuj.

Gou gangj vah seiz, couh yawj- raen mizmbangj hagseng youq laj naengh mbouj onj lo. Miz boux hagseng doeng muengh sae yawj, cienq bae cienq dauq. Gvaq mbouj geijlai nanz, couh raen Gyangh Sinhcwng、Liz Veih、Cinz Linzdauh naj hoengzfetfet menhmenh ndwn hwnjdaeuj, byaijsupsup hwnj gyangj- daiz daeuj, youq dangnaj doengzhag daengx ban daj goek daengz byai gangj gij saeh ngoenzlwenz loengh nyangjbaet okdaeuj.

Raen gyoengqde nyinhloek ndaej mizsim mizeiq, gou vah unq hoz raez dwk doiq hagseng daengx ban naeuz:“Ndiepgyaez gij doxgaiq goenggya dwg gij cwzyin moix boux vunz raeuz, raeuz aeu daj gij saeh iq guh hwnj caemhcaiq guh ndei. Gij nyangjbaet deng raek deng vaih, raeuz rox bae haw cawx moq daeuj vuenh. Hoeng, danghnaeuz gij binjdwz ceiq gihbwnj raeuz guh vunz doek, couh nanz ra ndaej dauq lo. Caemhcaiq, nyangjbaet deng vaih, doengzhag wnggai gibseiz caeuq gou gangj, lauxsae cij rox doq bae cawx gij moq daeuj guh veiswngh, mboujnex gyausiz uq luenh lai, hawj vunz simcingz mbouj ndei hix goj rox doiq gij ndang caezgya miz vaihcawq. Gij saeh neix gvaqbae couh suenq lo, daj seizneix hwnj, lauxsae muengh daihgya itheij daeuj gyaez aen gyausiz raeuz.”

Hagseng daengx ban dingq gij vah gou gangj cungj bekfwngz hwnj- daeuj.